24°C , Thunderstorms | Kigali-Rwanda

Sitati nshya y’abarimu itegerejweho impinduka mu burezi – Dr Munyakazi

Yanditswe na Mugisha Benigne

Ku ya 02-12-2019 saa 07:25:46
Dr Munyakazi Isaac, Umunyamabanga wa Leta ushinzwe amashuri y'inshuke, abanza n'ayisumbuye

Umunyamabanga wa Leta muri Minisiteri y’Uburezi ushinzwe amashuri y’inshuke, abanza n’ayisumbuye, Dr. Isaac Munyakazi, atangaza ko Inama y’Abaminisitiri iherutse yemeje sitati nshya y’abarimu, ikaba itegerejweho impinduka nziza mu burezi.

Ibi ni bimwe yagarutseho mu muhango wabereye muri Koleji y’Uburezi ya Rukara mu muhango wo gutanga impamyabushobozi ku barezi n’abayobobozi b’amashuri ndetse n’abafasha babo nyuma y’amahugurwa bahawe ku miyoborere y’amashuri.

Dr. Munyakazi yagize ati “Sitati nshya y’abarimu izafasha mu kwinjiza umwarimu mu kazi, uko afashwa n’uburyo ashobora guhanwa. Twifuje ko umwarimu ashyirwa mu mwanya mu buryo bwihariye kuko byakoreraga mu turere aho Minisiteri y’Uburezi itari ifite ububasha bwo gushyira abarimu mu myanya kandi ari yo ibayobora.”

Akomeza avuga ko iyo sitati yapfunduye ipfundo ryari ripfunditse kuri ubu Minisiteri y’Uburezi ikaba ari yo izajya ishyira mu myanya abarezi ku bufatanye n’izi nzego zari zisanzwe zibikora ari zo Minisiteri y’Abakozi ba Leta.

Dr. Munyakazi avuga ko ikindi iyi sitati izafasha ari uburyo umwarimu wagize ibibazo yasimburwaga ku wataye akazi cyangwa uwirukanwe, aho avuga ko byakurikizaga itegeko rireba abandi bakozi ba Leta kandi icyo gihe cyari kinini nk’uko kigenwa n’itegeko, bikaba byari ikibazo kuko gutegereza ya minsi yagenwe byatumaga abana bahomba amasomo.

Avuga ko kuri ubu umwarimu uzaba wirukanwe, yarwaye cyangwa yataye akazi, azajya ahita asimbuzwa bidatinze kugira ngo abana bakomeze bige neza nk’uko iyi sitati ibiteganya.

Dr. Munyakazi kandi avuga ko iyi sitati ije gufasha ku bayobozi b’uburezi mu mirenge babarirwaga muri Minisiteri y’Ubutegetsi bw’Igihugu, kandi imirimo bashinzwe igenzurwa na Minisiteri y’Uburezi, aho avuga ko bigiye korohera Minisiteri y’Uburezi mu gikorwa k’igenzura mu mashuri kuko noneho ari yo izaba ifite inshingano ku bayobozi b’uburezi mu mirenge, bityo icyo gikorwa kigakorwa neza kurushaho.

Ashimangira ko iyi sitati nshya yemejwe n’inama y’Abaminitiri yabaye tariki ya 28 Ugushyingo 2019 itareba abarezi gusa ko ahubwo inareba abakozi bose bakora mu rwego rw’uburezi.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.