27°C , Mostly cloudy | Kigali-Rwanda

Siriya: Ihagarikwa ry’imirwano ntiryubahirijwe

Yanditswe na KAYIRA ETIENNE

Ku ya 01-03-2018 saa 08:48:58

Gahunda y’ihagarikwa ry’imirwano ibera mu ntara ya Ghouta muri Siriya hagamijwe agahenge k’amahoro nta bwo yubahirijwe nk’uko Perezida Vladimr Poutine w’u Burusiya yari yabyemereye Loni ku wa Mbere tariki 24 Gashyantare.

Iburasirazuba bw’umujyi wa Ghouta ho muri Siriya wongeye kwibasirwa n’ibisasu ku wa Kabiri

Mu nteko y’akanama k’Umuryango w’Abibumbye gashinzwe amahoro ku Isi kateranye ku wa Gatandatu w’icyumweru gishize, ibihugu byose bikagize byemeranyijwe ko nta ruhande na rumwe rurwanira muri Siriya rugomba gusohora isasu mu mbunda mbere y’iminsi 30.

Ibi byumvikanyweho kugira ngo imiryango y’abagira neza ibone uburyo ikora ubutabazi ku basivile ibihumbi amagana bari babuze uko basohoka muri ako gace karimo imirwano ikomeye.

Abaturage bakubiwe muri Ghouta batangarije Radio Mpuzamahanga y’u Bufaransa (RFI) ko, ako gahenge k’amahoro kamaze amasaha make adahwanye n’umunsi wose.

Ibi byahamijwe na Loni ubwayo ibishingiye ku musivile wa mbere ngo wishwe mu masaha make gusa, ihagarikwa ry’imirwano ritangiye. Mu buhamya Mohamed Al-Atrach, umuturage uri muri Ghouta yahaye RFI yagize ati «Ubu tuvugana mu kirere hari indege zo mu bwoko bwa hélicoptères ziri hejuru yacu, zishoreranye n’izindi zishinzwe intambara zirimo kuturasaho. Mumenye ko Vladimir Poutine nta bubasha afite kuri iyi mirwano kuko, yemeye ko imirwano igiye guhagarara by’agateganyo ariko abayirimo bakaba batubahirije ibyo yatangaje».

RFI yemeza ko ubwo bavuganaga n’uwo muturage wo mu mujyi wa Ghouta ngo hari saa tanu n’iminota mirongo  ine z’amanywa yo ku wa Kabiri tariki 27 Gashyantare.

Rami Abdel Rahmane umuyobozi w’umuryango nyasiriya uharanira uburenganzira bwa muntu OSDH (l’Observatoire Syrien des Droits de l’Homme), yatangarije AFP ko imirwano yakomeje nkuko bisanzwe muri Ghouta.  Ati «Guhera saa tatu zuzuye, ni ukuvuga saa moya zuzuye ugendeye ku isaha mpuzamahanga, abasirikare ba Leta ya Siriya bari bamaze gutera ibisasu 9 bya rutura birimo ibyatewe n’indege, ibindi biraswa n’ibitwaro bikomeye».

Ibiro ntaramakuru bya Siriya, SANA, na byo byatangaje ko inyeshyamba na zo ngo zateye ibisasu bya roketi bibyerekeza mu kigo «Al-Rafidain» gicumbitsemo imiryango y’abagiraneza, kugira ngo baburizemo abaturage gusohoka muri Ghouta dore ko ari yo yari intego y’ako gahenge k’amahoro kari kasabwe na Loni.

Umunyamakuru wa RFI uri Beyrouth Paul Khalifeh yegereye umujenarali w’u Burusiya ushinzwe gukurikirana ishyirwa mu bikorwa ry’ibyemeranijweho byo guhagarika imirwano by’agateganyo muri Siriya, amutangariza ko inyeshyamba ngo ari zo zishe amasezerano zirasa bikomeye mu nzira abasivile bari gusohokeramo bahunga imirwano.

Izo nyeshyamba zo mu mitwe ya : Jaych al-Islam, Faylaq al-Rahman na Ahrar al-Cham, ngo bisobanuye ko bashakaga gufasha ibyihebe gusohoka muri Ghouta.

Guverinoma iti «Barabeshya, yari amayeri yo gushaka kujya mu gace birukanwemo  kugira ngo bazabone uburyo bwo kuzakomezamo intambara». Guhagarika imirwano muri Siriya ntibipfa koroha kuko biriya bihugu by’amahanga biyifitemo inyungu biba biryaryana.

TANGA IGITEKEREZO

Leave a Reply

Be the First to Comment!

avatar