2017-11-18 15:01:47 clouds 27o High | Kigali Rwanda

Dukurikire:
 
 

Sugira yanikiye abakuze bwa mbere muri “Cross Country”

Yanditswe na IMVAHO NSHYA

Kuya 2016-12-24 09:05:04

 
Share on:
 
Yasuwe:481
 
Yavuzweho:200
 
10
 
10

Sugira James usanzwe usiganwa mu ngimbi, yegukanye umwanya wa mbere mu cyiciro cy’abagabo mu marushanwa ya “Cross Country” yari agamije gutoranya abakinnyi bazahagararira u Rwanda muri shampiyona y’isi izabera muri Uganda muri Werurwe 2017.

Aya marushanwa yo kwiruka ahantu hagoye azwi kuri Cross Country aho yari yitabiriwe n’abantu bari mu byiciro bitandukanye yabaye ejo hashize taliki 23 Ukuboza 2016 ku Kicukiro.

Sugira ukinira ikipe ya “Mountain Classic Athletics Club” yabaye uwa mbere mu gusiganwa kwiruka ibilometero 10 akoresheje iminota 26, amasegonda 43 n’ibice 69, akurikirwa na Imanirafasha Primien w’ikipe ya Kamonyi akoresheje iminota 26, amasegonda 51 n’ibice 66 ndetse na Myasiro waje ku mwanya wa gatatu akoresheje iminota 27, amasegonda 7 n’ibice 31.

Muri iki cyiciro kandi, mu bagore Iranzi Celine yabaye uwa mbere akoresheje iminota 31 n’amasegonda 54, ku mwanya wa kabiri haza Mukandanga Clementine wakoresheje iminota 33 n’amasegonda 11, ku mwanya wa gatatu haje Yankurije Marthe wakoresheje iminota 33 n’amasegonda 11.

Mu cyiciro cy’ingimbi, mu kwiruka ibilometero 8, ku mwanya wa mbere haje Niyonzima Olivier ubarizwa mu ikipe ya Mountain wakoresheje iminota 22, amasegonda 32 n’ibice 58, ku mwanya wa kabiri haza Abayisenga Iranzi Elisée na we ukinira ikipe ya Mountain wakoresheje iminota 22, amasegonda 57 n’ibice 81 naho ku mwanya wa gatatu haza uwitwa Nkejumuto Ildephonse akoresheje iminota 22, amasegonda 59 n’ibice 64.
Sugira ufite ibihe byiza mu gusiganwa muri metero 1500, yavuze ko yishimiye uko yitwaye mu kwiruka ibilometero 10 kuko yari inshuro ya mbere, ko yabifashijwemo no kwigirira icyizere n’imyitozo yakoze ihagije.

Yagize ati «Nishimiye uko nitwaye, kuba nabashije gusiga abantu bari basanzwe biruka ibilometero 10, nta kindi nabarushije ni imyitozo nakoze mu minsi ishize. Niteguye kurushaho gukora cyane bityo no muri Uganda nzitware neza. »

Munyandamutsa Jean Paul, Umuyobozi w’Ishyirahamwe ry’imikino Ngororamubiri mu Rwanda yatangarije Imvaho Nshya ko yishimiye uko abasiganwa bitwaye muri rusange ko benshi bagerageje kuzamura ibihe n’imyanya bamwe basanzwe bakoresha.

Munyandamutsa yagaragaje kandi ko bagize imbogamizi y’uko nta bakinnyi bashya bitabiriye cyane ko cyari igikorwa bari bagerageje gukangurira abanyarwanda kuba bakitabira bityo babone umwanya wo gukinira igihugu.

Yagize ati “Ubwitabire ntabwo bwari bwiza ugereranyije n’uko twabibwiye abantu benshi, ariko abaje kurushanwa ni ba bandi dusanganywe kandi twashakaga kwagura n’abandi bakabona amahirwe yo kuba bajya mu ikipe y’igihugu”.

Abakinnyi bitwaye neza mu rwego rwo kubongerera imyitozo ihagije, biteganyijwe ko bazajya muri Uganda taliki 14 Mutarama 2017 na bo bazaba bafite irushanwa ryo gutoranya abazabahagararira muri shampiyona y’isi ya Cross Country “World Cross Country Championship” bazaba bakira.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE