2017-07-20 15:18:59 clouds 27o High | Kigali Rwanda

Dukurikire:
 
 

Ibigwi bya Ruhumuriza watwaye Tour du Rwanda inshuro 5

Yanditswe na IMVAHO NSHYA

Kuya 2017-01-08 06:06:46

 
Share on:
 
Yasuwe:11
 
Yavuzweho:200
 
10
 
10

Ruhumuriza Abraham ni izina rizwi na buri muntu wabashije gukurikirana umukino w’amagare mu Rwanda; ni intwari, ni umwami w’igare, ni umugabo wanditse amateka.

Ni umugabo wasezeye nyuma ya Tour du Rwanda ya 2016, asezera amaze imyaka 16 mu muhanda, aharira abana bato atari uko ananiwe kuko yari akiza mu myanya y’imbere nk’uko nawe abyitangariza. Yasoje atwaye Tour du Rwanda inshuro 5 mu gihe yari itaraba mpuzamahanga (2002, 2003, 2004, 2005, na 2007).

Mu gushaka kumenya byinshi ku buzima bwe, Imvaho Nshya yasuye Ruhumuriza mu rugo rwe mu kagali ka Rango B. mu Murenge wa Tumba mu Karere ka Huye, imusanga avuye mu myitozo n’umuhungu we mu rugendo rwa Rusizi-Huye, mu rwego rwo kumufasha kuza nawe umukinnyi wo ku rwego rwo hejuru bya bindi abanyarwanda bavuze bati “Imfura igenda nka se’’.

JPEG - 60.8 kb
Ruhumuriza wahagaritse umukino wo gusiganwa ku magare nyuma y’imyaka 16

Twamusanze mu rugo rw’igipangu kirimo amazu menshi akodeshwa, Ruhumuriza akaba mu nzu nini irimo amagare atatu harimo irye n’abahungu be babiri bifuza kuzatera ikirenge mu cya Papa wabo, hamwe n’akabati karimo ibikombe yagiye atwara.

Ruhumuriza ni umwana wo mu Rwanza i Save

Ruhumuriza w’imyaka 37 yabonye izuba taliki 28 Mutarama 1979 mu Rwinyambo rwa Rwanza mu murenge wa Save mu Karere ka Gisagara. Ni umwana w’umuhererezi mu muryango w’abana 10 barimo bane bitabye Imana ba nyakwigendera Kankindi Bernadeta na nyakwigendera Kabagema Charles.

Ruhumuriza avuga ko yicuza kuba yaranze ishuri kandi aribyo ababyeyi be bifuzaga aho yagarukiye mu mwaka wa gatanu w’amashuri abanza. Cyokora ngo azi kuvuga igifaransa n’icyongereza cyane kuko yagiye mu bihugu byinshi akanakorana n’abatoza b’abazungu.

Ruhumuriza ni umugabo w’abana bane barimo batatu b’umugore wa mbere witabye Imana muri 2007 n’undi w’umugore bari kumwe ubu.

Yatangiye akora akazi ko kunyonga, azamukana abagenzi ahananiye abandi

Ruhumuriza asobanura ko yiyemeje kujya mu kazi ko kunyonga nyuma y’urupfu rwa se mu 1996, atangira gukorera amafaranga menshi kuko yari afite imbaraga nyinshi ndetse yaramaze kubaka izina mu mujyi wa Huye.

Ruhumuriza abisobanura muri aya magambo “Papa amaze gupfa nashatse ikintu nakora kugira ngo nitunge nk’umuntu w’umusore. Nafashe igare njya mu mujyi wa Butare, nkakorera nk’ibihumbi bine cyangwa bitatu bya buri munsi, buri wese ampa amafaranga 50 kandi njye nari mfite abagenzi banjye twarapatanye za Matyazo, Ngoma, Rwabuye kuko abantu bose bari bazi ko mfite imbaraga, ibyo wanabibaza abantu twanyonganye’’.

Yitabiriye irushanwa rya mbere aba uwa kane afite Pinebalo

Mu mpera z’umwaka wa 1999 ni bwo Ruhumuriza yiyandikishije mu irushanwa ryateguwe na Perefe wa Butare witwaga Karemera Pierre aba uwa kane mu bantu 66 ari ku igare rya Pinebalo mu rugendo Rubona -Kanyaru ku mupaka w’Uburundi bakagaruka.

Ruhumuriza ati “Icyo gihe bari batanze amatangazo, ariko njye naranabitinyaga, ariko hakaba umuntu wo mu muryango witwaga Nzeyimana arambwira ngo reka twiyandikishe ariko we gahunda yari afite kwari ugutuma nitabira kuko yari aziko mfite ingufu’’.

Ruhumuriza wari umaze kubona ko bishoboka yatangiye kwitozanya na Musabyimana Charles wari uyoboye Amajyepfo mu magare nyuma ahura na Nsonera Guido wamuhaye igare rya Siporo.

Muri 2001, Ruhumuriza wari utangiye kumenyera amagare yitabiriye Tour du Rwanda ye ya mbere aza ku mwanya wa kane muri iri siganwa ryatwawe na Nsegiyumva Bernard.

Mu myaka yakurikiyeho, Ruhumuriza yatwaye Tour du Rwanda inshuro enye yikurikiranya. Agahembwa ibihumbi magana atanu nk’igihembo cya Tour du Rwanda.

Aha ariko Ruhumuriza na bagenzi be ntibigeze bitabira amarushanwa mpuzamahanga kugeza muri 2008 haje Jonnathan Boyer, Umunyamerika washyizeho ikipe y’igihugu akanazamura umukino w’amagare mu Rwanda.

Muri Team Rwanda, Ruhumuriza yabayemo imyaka umunani atwara irushwana mpuzamahanga ryo Kwita izina mu 2009, anaba umukinnyi uzi kuzamuka inshuro ebyiri muri Tour du Cameroun mu 2011 na 2012.

Ibanga ryatumye amara imyaka 16 anyonga igare

Ruhumuriza ati “Ikintu cyose kirashoboka iyo wabyishyizemo. Njye nkina bwa mbere na Pinebalo narahembwe, umuntu w’umwana bahaye ibihumbi 100 , ndavuga nti ibi bintu reka mbikomeze. Akomeza agira ati “Njye najyaga i Kigali n’igare mvuye i Butare (mu rugendo rwa 126 km) nkahaguruka saa kumi n’imwe n’igice za mu gitondo (05h30) nkagera Nyabugogo nkanywa icyayi nkagaruka ku buryo saa sita n’igice nabaga ndi i Huye’’.

Ruhumuriza avuga ko atigeze yumva ashatse kureka igare kuko rimuvuna kuko nta muntu ugomba kubaho atavunika. Ati “Bagenzi banjye nka ba Bonaventure Uwizeyimana ni bo bavuga ngo ufite umutima w’icyuma, wowe wamaze imyaka 16. Njye ni uko nari mbikunze’’.

Kuki atongeye gutwara Tour du Rwanda imaze kuba mpuzamahanga?

Ruhumuriza avuga ko hari ibintu nka bitatu byatumye atongera gutwara Tour du Rwanda kuva yaba mpuzamahanga muri 2009.

Ngo icya mbere ni imbaraga zatangiye kugabanuka buhoro buhoro, haza abana bato nka ba Niyonshuti Adrien bahise batangira kwigaragaza.

Icya kabiri ni uko bahuraga n’abakinnyi bafite ubunararibonye kubarusha. Ati “Nka za Maroc, Eritrea zaraje ziradusiga dufunguka amaso. Erega kwiga bituruka ku guhangana. Nk’urugero muri 2010, Daniel Teklehaimanot twajyanye mu Ruhengeri, adusigira Buranga dusanga yamaze kuruhuka. Icyo gihe yaturushaga kuba yarakinnye amarushanwa menshi’’.

Icya gatatu ni uko batangiye bataramenya gufatanya. Ati “Icyo gihe twakinaga twireba buri wese. Nyuma twatangiye gushyira hamwe tukavuga ngo niba Ndayisenga Valens arimo nta mpamvu zo ku mugarura, tukabona ko turi umuntu umwe’’.

Ruhumuriza avuga ko isomo yize mu buzima ari ukudasugura akazi ukora iyo ugakunze kuko ngo ibyo atunze (birimo amazu, ibibanza za moto ebyiri no kurera abana be) byose yabikuye mu magare.

Uko agereranya Ndayisenga Valens na Nsengimana Bosco

Ruhumuriza avuga ko Ndayisenga Valens watwaye Tour du Rwanda ya 2014 na 2016 arusha Bosco Nsengimana gukoresha mu mutwe.

Mu magambo ye ati “Ni abahanga bose, ariko Ndayisenga Valens afite mu mutwe kandi igare ni mu mutwe naho Nsengimana Bosco arusha imbaraga Ndayisenga Valens ariko akora ibyo yiyumvishemo. Ni yo mpamvu Ndayisenga Valens azakomeza gutwara Tour du Rwanda’’.

Ruhumuriza yemeza ko Ndayisenga Valens kimwe na Areruya Joseph bazakomeza gusimburana kuri Tour du Rwanda.

Ruhumuriza akomeje kuba mu magare

Ruhumuriza yakoranye n’ishyirahamwe ry’umukino wo gusiganwa ku magare “FERWACY” mu gutoranya abana bafite impano mu mukino wo gusiganwa ku magare. Kuri ubu ari kumwe n’ikipe y’igihugu i Musanze aho afatanya n’umutoza gutoza barumuna be banakinanye.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE