2017-08-18 19:28:21 clouds 27o High | Kigali Rwanda

Dukurikire:
 
 

Byinshi kuri Mukasa Nelson bamwe bitirira “Kigali Car Free Day”

Yanditswe na IMVAHO NSHYA

Kuya 2017-07-31 15:14:25

 
Share on:
 
Yasuwe:555
 
Yavuzweho:200
 
10
 
10

Kuva muri 2013, Leta y’u Rwanda yatangije gahunda ya siporo kuri bose igamije gushishikariza Abanyarwanda muri rusange gukunda no gukora siporo mu rwego rwo kugira ubuzima bwiza ndetse no gukundisha abakiri bato siporo.

Imvaho Nshya yagiranye ikiganiro cyihariye n’umwe mu bantu batangije ibikorwa yo gukangurira abantu gukora siporo, Mukasa Nelson wavuze ko yihaye intego yo gufasha atizigamye ngo Abanyarwanda muri rusange bakunde siporo.

Incamake y’ubuzima bwa Mukasa

JPEG - 61.8 kb
Imwe mu myitozo Mukasa Nelson akoresha

Mukasa Nelson yavukiye muri Tanzania mu 1980. Nyuma y’urugamba rwo kubohora igihugu yaje kujya kwiga muri Burawayo Sports College mu gihugu cya Zimbabwe imyaka 4 aho yize ibijyanye na Siporo cyane cyane imyitozo ngororamubiri. Nyuma yagiye no muri Afurika y’Epfo mu mahugurwa nayo ku bijyanye n’imyitozo ngororamubiri ahava aza gukora muri Nyarutarama Tennis Club.

Mukasa avuga ko yakuze akunda umupira w’amaguru, akaba anafite impamyabushozi yo gutoza abana “Coaching Course of Football Basic Knowledge of Youth- Soccer Training Class C”.

Uko Mukasa yinjiye mu bikorwa bya siporo

Mukasa yatangije ibikorwa yo kujya atoza abana mu biruhuko imikino itadukanye mu rwego rwo kubafasha. Yafunguye kampani ijyanye n’ibya siporo “Health & Fitness Center Ltd” akaba yaratangiye akorera muri Alpha Palace Hotel ubu akaba afite aho bakorera imyitozo ngororamubiri mu ishyirahamwe ry’umupira w’amaguru mu Rwanda “FERWAFA” i Remera.

Uretse ibi kandi Mukasa yaguye ibikorwa byo gufasha abana gukora siporo mu bihuruko ashinga umuryango “Children and Youth Sports Organization” aho afatanyije n’abantu bagera kuri 15 bakaba bamaze umwaka bakora ibikorwa byo gufasha abana gukora siporo no kuzamura impano zabo mu mikino itandukanye irimo umupira w’amaguru, koga, Tennis, Karate, Basketball, Volleyball n’iyindi.

Avuga kuri uyu muryango, Mukasa yavuze ko yawutangije kugira ngo afashe abana mu biruhuko kwidagadura no kudahugira mu bidafite umumaro.

Ati “ Umwana iyo agiye muri Siporo ahungukira byinshi ahava ameze neza, arataha ntagire ikindi kintu akora akarya akaruhuka neza. Iyo aruhutse biramufasha kwiga neza kuri bamwe bagira amasomo yo mu biruhuko”.

Mukasa avuga ko batangiye bakorana n’ababyeyi bakagira icyo batanga kuko bisaba ko bakodesha ibibuga ndetse bakanashaka ibikoresho ndetse n’abatoza. Gusa avuga ko bibutse ko hari n’abandi batishoboye batabona ubwo bushobozi kandi baba babishaka . Ibi ni byo byatumye bishyira hamwe kugira ngo bazajye babasha kwegera abaterankunga.

Kuri ubu Mukasa atangaza ko bafite Sulfo-Rwanda nk’umuterankunga wabemereye kubaha amazi n’amasabune igihe bakoze ibi bikorwa ndetse na Minisiteri y’umuco na Siporo “MINISPOC” ibaha ibibuga.

Ati “Turacyashaka abandi baterankunga, imiryango mpuzamahanga n’abandi”.

Ibi bikorwa barateganya ko byagera mu gihugu hose

JPEG - 79.7 kb
Mukasa Nelson ari mu gikorwa cyo gukoresha imyitozo ngororamubiri abitabiriye Car Free Day

Mukasa yatangarije Imvaho Nshya ko bafite intego yo gukwirakwiza ibi bikorwa bikagera mu turere twose kuko ubu bakorera muri Gasabo gusa.

Ati “ Turifuza ko twajya n’ahandi mu turere bakaduhuza n’amashuri, ariko tuzakorana cyane na Minisiteri y’uburezi bigere mu mashuri yo mu gihugu yose”.

Hari ibibazo bagihura nabyo

Mukasa atangaza ko yatangiye ibi bikorwa mu myaka 10 ishize gusa ubu kuba bashinze umuryango bamaze hafi umwaka bakora gusa avuga ko bahura n’imbogamizi nyinshi zirimo ibikoresho bike, ibibuga ndetse n’abatoza b’abana bafite ubumenyi budahagije.

Yagize ati “Gufasha abana muri siporo bisaba kwitanga ndetse no kubakurikirana cyane kuko umwana ufite impano, iyo azamutse bisaba kumukangurira kwirinda ibiyobyabwenge, SIDA n’ibindi byatuma atagera ku ntego ze”.

Mukasa avuga ko nibabona ubushobozi bagomba kuzakoresha amahugurwa aho bazatumira abafatanyabikorwa barimo MINISPOC, Komite Olempike, Polisi y’igihugu ishinzwe kurwanya ibiyobyabwenge, Minisiteri y’ubuzima ndetse na Minisiteri y’uburinganire n’iterambere ry’umuryango bahure n’abana bityo babasobanurire uko bakwiye kwitwara.

Mukasa yitiriwe “Car Free day”

JPEG - 333.9 kb
Bamwe mu batuye Kigali mu myitozo ngororamubiri isanzwe iba ku cyumweru cya mbere cy’ukweI izwi nka Car Free Day

Mukasa Nelson ni we ukoresha siporo ya bose abaturage batuye umujyi wa Kigali isanzwe iba ku cyumweru cya mbere cy’ukwezi. Aha yatangaje ko yitiriwe iki gikorwa.

Ati “Aho ngeze bahita bavuga ngo dore Car free day”. Gusa Mukasa ashima cyane umujyi wa Kigali yatangije iyi gahunda kuko abatuye muri Kigali bagira umwanya wa guhura bagakora siporo hamwe. Mukasa akaba atangaza ko iyi siporo ya bose irimo kugenda yitwabirwa cyane.

Iyi siporo ya bose ikorwa buri cyumweru cya mbere cy’ukwezi “Car free day”, abantu batandukanye bahera mu mujyi hafi y’ibiro by’umukinnyi wa Kigali bagakora urugendo n’amaguru cyangwa se igare bagakera Kimihurura kuri RRA ari ho habera imyitozo ngororamubiri iyoborwa na Mukasa Nelson.

Icyakorwa ku iterambere rya siporo y’abana

Mukasa atangaza ko Abanyarwanda bakunda siporo ariko ku bwe abona kugira ngo siporo y’u Rwanda itere imbere bigomba guhera mu bana. Ati “Hakwiye kubaho amahugurwa ku bigisha siporo bihereye mu bana”.

Mukasa avuga ko abana bakwiye gukangurirwa kwiga amasomo ariko bakongeraho na siporo zose kuko iyo batangiye kugera mu myaka nka 10 batangira kugaragaza impano. Ati “Aha ni ho umenya umukino umwana afitemo impano ukamukurikirana ukamufasha kugira ngo azagera ku ntego ye yo kuba umukinnyi ukomeye”.

Kugira ngo aba bana bazamuke neza, Mukasa avuga ko bagomba kugira abatoza bihariye kandi bafite ubumenyi buhagije mu kuzamura abana.

BUGINGO FIDELE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE