2017-08-18 19:28:21 clouds 27o High | Kigali Rwanda

Dukurikire:
 
 

Amagare: Areruya afite inzozi zo kuzakina Tour de France

Yanditswe na IMVAHO NSHYA

Kuya 2017-06-19 10:29:21

 
Share on:
 
Yasuwe:173
 
Yavuzweho:200
 
10
 
10

Nyuma yo kwitwara neza muri Giro d’Italia U-23 akegukana intera, Areruya Joseph aratangaza ko afite inzozi zo kuzakina irushanwa rya mbere rikomeye ku Isi rya “Tour de France”.

Areruya Joseph ubu ukinira ikipe ya kabiri ya Dimension Data for Qhubeka yitabiriye irushanwa rya Giro d’Italia mu batarangeje imyaka 23 ryabaye kuva taliki 9 risozwa taliki 15 Kamena 2017. Uyu musore w’imyaka 21 yitwaye neza yegukana intera ya 5 yavaga ahitwa Osima igera Senigallia aho mu ntera y’ibilometero 87,2 yakoresheje amasaha abiri n’amasegonda 52.

Yasoje isiganwa ryose muri rusange ku mwanya wa 49 mu bakinnyi 140 basoje mu 174 batangiye isiganwa aho yakoresheje amasaha 24, umunota umwe n’amasegonda 3 mu ntera 7 zihwanye n’ibilometero 956,3. Uwegukanye iri rushanwa ni Sivakov Pavel, umurusiya w’imyaka 19 akaba akinira ikipe ya BMCD muri Amerika.

JPEG - 243.2 kb
Areruya Joseph wazamukiye muri Les Amis Sportis i Rwamagana akaba akinira Dimension Data for Qhubeka afite intego yo kuzakina Tour de France

Nyuma y’iri siganwa, Areruya yatangarije Imvaho Nshya ko ryari rikomeye ariko yishimiye uko yitwaye. Yatangaje ko rigitangira byari bikomeye dore ko intera ya mbere taliki 09 Kamena 2017 yayoboye igikundi cy’imbere mu bilometero 3 bakaza kumucaho agasoza ku mwanya wa 96 ariko anganya ibihe n’uwa 3.

Ati “ Harimo abakinnyi benshi kandi bakomeye, guhangana n’abakinnyi barenga 150 biba bigoye”.

N’ubwo bitakunze ku munsi wa mbere, intera ya 5, Areruya yanditse amateka arayegukana.

Ati “Ntabwo niyumvishaga ko ndibuyitware gusa naravuze nti reka mbacike ngende ni uko ndagenda birangira mbasize ndayegukana”.

Akimara kwegukana iyi ntera abantu benshi bakurikirana umukino wo gusiganwa ku magare mu Rwanda no ku isi hose bishimiye ibyo yakoze barimo n’amakinnyi bakomeye nka Mark Cavendish n’abandi.

Areruya yagize ati “Byaranshimishije nanjye ku giti cyanjye kuko nerekanye ko umukino wo gusiganwa ku magare iwacu ufite aho igeze”.

Arifuza kuzakina Tour de France

Atangaza ko afite inzozi zo kuzakina Tour de France. Ati “ Kwitwara neza byerekanye ko nshoboye, ikipe yanjye ikina Tour de France mfite intego zo gukomeza kwitwara neza nibabona ko nshoboye bazanzamure mu ikipe ya mbere nshobore kuba nakina iri siganwa rya mbere ku isi”.

Atabwo azitabira shampiyona y’igihugu

Taliki 24-25 Kamena 2017 hateganyijwe shampiyona y’igihugu. Areruya Joseph ntabwo azayitabira kuko azaba yitegura irindi siganwa rikomeye ku mugabane w’u Burayi “Tour de Hongrie 2017” rizaba taliki 27 kamena kugeza 02 Nyakanga 2017. Areruya yatangaje ko azagaruka mu Rwanda mu Kwakira 2017 aje kwitegura Tour du Rwanda 2017 izaba taliki 12-19 Ugushyingo 2017.

N’ubwo Areruya yitwaye neza, Mugisha Samuel bakinana ntabwo byamugendekeye neza kuko ku ntera ya 4 yavuye mu irushanwa nyuma yo kugwa ubu akaba ategereje ibisubizo byo kwa muganga kuko ubu bamushyizeho isima ku kaboko k’iburyo nawe akaba atazitabisha shampiyona y’igihugu.

BUGINGO FIDELE

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE