18°C , Mostly cloudy | Kigali-Rwanda

Sinema yanyubakiye izina, gusetsa mbibyaza umusaruro – Kibonke

Yanditswe na Gisubizo Gentil M.

Ku ya 04-11-2019 saa 08:18:07
Clapton Kibonke ari mu gitaramo cyo gusetsa abantu

Umunyarwenya Mugisha Emmanuel uzwi ku mazina ya “Clapton Kibonke” ni umunyempano mu myuga itandukanye avuga ko sinema yatumye amenyekana naho gusetsa (comedy) byo bikamuhesha amafaranga.

Kibonke ni umwe mu bamaze kubaka izina mu gusetsa, gukina amafirime byose ahuza n’undi mwuga wo kuririmba.

Yamenyakanye cyane ubwo yakinaga muri firime y’uruhererekane ya Seburikoko ica kuri Tereviziyo y’u Rwanda.

Akunze gukina uduce twiganjemo urwenya ari naho yaje kwibonamo impano yo gusetsa atangira nabyo kubikora kinyamwuga.

Kuba abivanga byombi abakunzi baba bafite amatsiko yo kumenya icyo yisangamo cyane ari nayo mpamvu yabibajjwe n’Imvaho Nshya.

Ati: “Byose ndabikunda ariko buri kimwe kimpa ibitandukanye, firimi yatumye menyekana byihuse ariko  gusetsa ni byo  birimo amafaranga cyane.”

Mu rwego rwo gutanga umusanzu mu ruganda rw’Abanyarwenya yashinze ikitwa Daymakers, itsinda ryiganjemo abanyempano bakiri bato.

Kibonke asanzwe afasha abasore bibumbiye muri Day Makers

Ubu abo amaze gusinyisha ni umunani ariko ngo nta bwo ari wo mubare fatizo uko ubushobozi buzakomeza kwiyongera azafasha buri umwe wese ufite impano.

Ati: “Intego yari ugufasha impano nshya no kwagura uruganda rw’abanyarwenya ikabasha kugera ku rwego nk’urw’izindi.”

Gusa nubwo akora uko ashoboye ngo azamure izi mpano ngo amikoro usanga ari ikibazo gikomeye, kuko mu gihe nta bushobozi buhagije usanga kenshi bakora ibintu bidahagije nk’uko baba babyifuza.

Ariko mu mboni ze abona sinema imaze kugera ku rwego rushimishije, aho yagize ati: “Sinema imaze gutera imbere rwose ndetse n’Abanyarwanda bagenda babona ibihembo ku rwego mpuzamahanga, gusa imbere mu gihugu haracyari ikibazo k’isoko, hakiyongeraho kwigana ibihangano by’abandi ugasanga bica intege abakora sinema nyirizina.”

Yakomeje avuga ko  ibijyanye no gusetsa  nabyo birimo gutera imbere cyane ko Abanyarwanda bamaze kujya bitabira ibitaramo  ari benshi, ikindi ngo usanga bakunze Abanyarwenya cyane bitandukanye no mu myaka yashize aho wasangaga bavuga ko nta  bantu basetsa  baba mu Rwanda ahubwo bakirebera abanyamahanga cyane.

Kibonke kandi agira inama abakizamuka muri uyu mwuga ko bareka kwigana, bakagira umwihariko mu bikorwa byabo ndetse bakanigira kubafite aho bageze, ikindi ngo yababwira kiruta ibindi ni uko bwakiriye kugira imyitwire myiza  kuko ari ingezi mu buzima.

Clapton Kibonke washakanye na Mutoni Jacky bafitanye umwana w’umukobwa ari nawe mfura yabo akaba yitwa Mugisha Nellah, uyu mugabo ngo afite ikerekezo cy’uko mu myaka itanu iri imbere yaba afite inzu ikora ikanatunganya sinema.

Clapton Kibonke wamenyekanye kuva mu mwaka wa 2015 afatanya muri Daymakers kugeza ubu ni Mpazimpaka Japhet, Iryamukuru  Etienne, Ndayisaba JMV (Makanika), Sugira florance, Roger, Munyana Divine na Mbabazi Teta Divine.

Umunyarwenya, Mugisha Emmanuel “Clapton Kibonke”

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.