SINA Gérard yagaragaje uko yaharaniye guteza imbere ihame ry’uburinganire

Yanditswe na Kayitare Jean Paul

Ku ya 12-11-2019 saa 10:11:12
Abanyamahanga barimo n'abakorera Imiryango mpuzamahanga, Ambasade na Guverinoma ni kenshi basura ibikorwa bya SINA Gerard - Copy

Umushoramari SINA Gérard Umuyobozi wa, SINA Gérard/ESE URWIBUTSO, ukorera mu Karere ka Rulindo mu Ntara y’Amajyaruguru, hashize igihe atangije ishuri ryitwa Collège Fondation Sina Gérard (CFSG) riherereye ku musozi wa Tare mu Kagari ka Nyirangarama mu Murenge wa Bushoki. Muri iri shuri SINA avuga ko yakoze uko ashoboye kugira ngo abana b’abakobwa batinyuke, bityo bige ibyo basaza babo biga kandi bakabikora, nk’ubwubatsi, ubukanishi, ubuhinzi, ubworozi n’ibindi.

Avuga ko ibijyanye n’uburinganire ndetse no guteza imbere umwana w’umukobwa biri hejuru kuko iyo urebye muri rusange bari kuri 62% kugeza kuri 65%.

Yagize ati Igishimisha kandi gituma n’abandi bakomeza kuza no kubakira, iwange babaha agaciro cyane kandi agaciro ni bo bakiha kuko barashoboye. Biga imyuga yose uhereye mu buhinzi, ubworozi, wagera mu gutunganya imisatsi ugasanga ari uko, ukajya mu kudoda imyenda, mu kubaza, kubaka, gusudira, gukanika aho hose harimo abakobwa”.

Avuga ko iyo abana b’abakobwa bakoze ibizamini baza mu myanya ya mbere ngo akaba ari yo mpamvu hari abagiye barangiza mbere bagahabwa akazi muri SINA Gérard/ESE URWIBUTSO. Agaragaza ko nko mu basudira harimo abakobwa bahafite akazi, mu babaji, mu batunganya imisatsi, mu bwubatsi barimo cyane cyane ko ubuyobozi bwa SINA Gérard/ESE URWIBUTSO bufite za atoliye (Atteliers) bigiramo. Kuba zihari ngo bituma iyo barangije kwiga babashishikariza kwiga kugira ngo bazabahe n’akazi.

Ati: “Ureba uko umukobwa akurikira amasomo y’ubukanishi ukavuga uti Isi igeze aheza ariko rero inkomoko yabyo nta yindi, biva kuri Leta y’Ubumwe, imiyoborere myiza iriho, ikomeza gushishikariza Abanyarwanda kwigira ndetse no kwihesha agaciro. Iryo somo nange nkunda kuritanga mu rubyiruko rwiga ndetse no mu bakozi basanzwe, ko batagomba kwitinya. Kugeza uyu munsi nishimira ko hari ibyari bibujijwe ku mwana w’umukobwa ariko ubu bakabikora kandi bakiteza imbere”.

SINA Gérard avuga ko yishimiye raporo ya HeForShe yasohokeye muri Leta Zunze Ubumwe z’Amerika, igaragaza ko ateza imbere umwana w’umukobwa. Ashimangira ko uko ayobora SINA Gérard/ESE URWIBUTSO na we hari ubushakashatsi akora kandi agatemberera mu zindi nganda akareba uko bakora.

Ati: “Iyo raporo nk’iyo ikozwe, yongera kunyubaka ku rwego rw’Isi. Ukuntu Isi ari ngari ukumva muri Amerika ubwabo bazi neza ko muri SINA Gérard/ESE URWIBUTSO  hari Urwibutso n’ibindi, muri CFSG ko mu bikorwa dukora uburinganire buri ku rwego rwo hejuru kandi nta gushidikanya, kuko baba badusuye ari benshi. Tugira abanyamakuru badusura baturutse hanze, Imiryango mpuzamahanga, za Ambasade, Guverinoma n’abandi banyuranye”.

Akomeza agira ati: “Kuba naribonye kuri iyi raporo, ni ibyongeye kuntera imbaraga zo kumenya ko ibyo nkora na none ngomba kurushaho kubikora kuko nawe ntiwaba wabonye raporo nziza nk’iriya, ikuvuga neza ngo ubure kutagira umunezero”.

Avuga ko yagiye mu ruganda rwo mu Budage rukora ibikoresho by’ikoranabuhanga akarusura ndetse agasura no mu Buhinde noneho akaza kugera ahantu mu gace ku ruganda gakorwamo n’abagore n’abakobwa gusa. Avuga ko yaje kubaza impamvu bakoresha abakobwa n’abagore gusa, bamubwira ko umugore cyangwa umukobwa badapfa kwibeshya, kwibagirwa, ngo ntiwababona basimbukiye hanze y’akazi (kudomoka), n’iyo umugore yaba agize ubukubaganyi mu ruganda, ngo bwaba ari buke ugereranije n’abagabo akaba ari yo mpamvu yabonye mu ruganda igitsinagore kigira imyanya ikomeye, bityo na we akaba yarahisemo kuza agashyira mu bikorwa ibyo yabonye. Ahamya ko igitsinagore kizi ubwenge kandi kikagira n’imbaraga kuko ngo nta kidashoboka.

Avuga ko abakobwa na basaza babo abafata kimwe. Yagize ati: “Abakobwa na basaza babo aho biga muri CFSG ndetse n’aho bakorera bose mbafata kimwe kuko nko mu itorero dufite, uriyoboye ni umugore kandi azi kwivuga akitaka bigatuma akomerwa amashyi.

Mu gusudira abagore n’abakobwa barabikora neza kimwe no mu kubaka, bambara umwenda wabugenewe bakurira bagakora akazi. Birumvikana ko aho ndimo kujya ari ugukomeza gushimangira no gushishikariza abandi ko umwana w’umukobwa n’umugore bakomeza kwigirira ikizere”.

Icyo Raporo yatangarijwe muri Amerika na HeForShe ivuga kuri SINA Gérard

Raporo ku ihame ry’uburinganire muri gahunda ya HeForShe yasohotse mu kwezi gushize k’Ukwakira 2019, igasohokera muri Leta Zunze Ubumwe za Amerika, yagaragaje ko SINA Gérard/ESE URWIBUTSO yateje imbere ihame ry’uburinganire mu kigo k’ishuri, Collège Fondation Sina Gérard cyatangijwe na rwiyemezamirimo SINA Gérard.

Iyi raporo igaragaza ko mbere y’uko ishuri CFSG ritangira, umugore n’umwana w’umukobwa bafatwaga nk’abantu badafite icyo bashoboye cyatuma bagira icyo binjiriza imiryango yabo.

Ibi biterwa nuko igitsinagore hari ibyo kitashoboraga gukora kubera imiterere y’umuco nyarwanda yabonaga ko hari ibyo abagore n’abakobwa badashoboye. Imyumvire ku ihame ry’uburinganire bijyanye no guteza imbere abagore, byatumye bashobora kugera ku nzozi zabo mu muryango nyarwanda ndetse no hanze yawo.

SINA aganira n’abagize uruhare mu gukora iyi raporo, yababwiye ati: “Nashinze Collège Fondation Sina Gérard kugira ngo ntange umusanzu wanjye mu kongerera abaturage ubumenyi bari hafi y’aho nkorera ubucuruzi ariko noneho no guhindura imyumvire ishingiye ku muco mu muryango nyarwanda.

Muri CFSG dutanga amasomo y’ubumenyingiro mu byiciro bitandukanye birimo ubwubatsi, gutunganya umusatsi n’ubukanishi mu rwego rwo guteza imbere umugabo n’umugore, ibyo bikaba byabafungurira amahirwe y’abagore n’abakobwa mu kwiteza imbere kubera rya hame ry’uburinganire”.

Muri iyi raporo, SINA agaragaza ko muri uru rugendo yahuye n’inzitizi nyinshi zirimo umubare muke w’abanyeshuri bagombaga kwiga amasomo y’ubumenyingiro (TVET) no kubitaho mu gihe baje ku ishuri nko kubagaburira, kubacumbikira no kubageza mu bice bitandukanye bituma bashobora kwiga banakora ibyo bigiye mu ishuri (Practices).

Avuga ko kugeza ubu abanyeshuri 500 biga amasomo ashingiye ku bumenyingiro, muri abo 70% akaba ari abakobwa ndetse kandi ko ngo batsindira ku manota yo hejuru ugereranije na basaza babo kandi ko n’aho babonye akazi bagakora neza.

Yagize ati “Abagore n’abakobwa barashoboye nka basaza babo. Nahisemo guteza imbere abagore binyuze mu kubigisha imyuga mu rwego rwo guteza imbere gahunda ya HeForShe kubera ko nizeye ko iyo uteje imbere umugore, na we agira uruhare runini mu iterambere ry’umuryango we ndetse no kugira uruhare mu mpinduka z’iterambere ry’Igihugu”.

Avuga ko yiyemeje gukomeza kongera umubare w’abakobwa biga imyuga ndetse n’amasomo y’ubumenyingiro kugira ngo bahindure aho batuye kandi bahange imirimo kuruta uko bajya gushaka abo bakorera. Nkuko raporo ya HeForShe ibigaragaza, SINA yizera ko abakora imirimo y’ubucuruzi by’umwihariko abanyemari n’abanyenganda, bazamufatiraho urugero rwo guteza imbere ihame ry’uburinganire muri gahunda ya HeForShe.

Uko imitsindire y’abanyeshuri ihagaze muri CFSG

Umwaka ushize w’amashuri wa 2017/2018, Umushoramari SINA avuga ko ikiciro (Promotion) cyose cyatsinze 100% kandi ngo gutsinda bifite aho bikomoka bitewe n’uko yumva yita ku ishuri rya Collège Fondation Sina Gérard cyane cyane ko ahora ashishikariza abarimu ko bagomba kwigisha neza bityo n’abanyeshuri bakamenya ubwenge.

Ati: “Icyo dushyize imbere si amafaranga y’ishuri ahubwo dukeneye cyane ko abiga mu mashuri y’inshuke n’abanza batishyura mu rwego rwo kuvuga ngo inyungu mbona mu ruganda, reka nange mfashe abaturage. Dufite abana nka 600 ariko abo ntitubishyuza kugira ngo hatagira umwana uhezwa kandi intego ari ugutera ikirenge mu cy’ubuyobozi bwacu muri poritiki yo guteza imbere uburezi bufite ireme nkavuga ngo aho ndi reka mbifashemo Igihugu cyange”.

Avuga ko akurikije ubuzima bigiramo, ntabwo ashidikanya ko abana b’abakobwa batazakomeza gutsinda. Yemeza ko yateganyije ko inganda zigomba kuba ziri hafi y’umuhanda, alimantasiyo (Alimentation) ziri ku muhanda wa kaburimbo, ariko ikigo cy’amashuri nk’uruganda rw’ubwenge ngo agahitamo kukijyana ahantu hatekanye, hataba ibirangaza. Ngo yaba umwarimu n’umunyeshuri bose bakora icyabajyanye. Agaragaza ko imfashanyigisho nk’imirima, ubworozi, ari inganda zinyuranye zikora Urwibutso, Akagabanga, Agashya, Akarusho, Akonozo, Akandi, Akiwacu, Akacu, Aka, n’Akineza ngo ubwo buryo bwose bwongera agaciro ku musaruro babona, ni abanyeshuri baba babikoze kuko ntibasaba kwimenyereza umwuga (Internship) kuko iyo bize ikintu mu magambo (Theory) mbere ya saa sita, nyuma ya saa sita bajya kugishyira mu ngiro (Practice) bakabikorera mu ruganda.”

Uko gahunda ya Leta iteye mu burezi, 50% ni ukwiga (theory) indi 50% ni ugushyira mu ngiro ibyo bize (practice), SINA akaba ariho ahera yishimira ko ibyo bajya gushyira mu ngiro babibona hafi kandi bagahurirayo n’abandi batekinisiye babifitemo uburambe bityo bikabafasha mu masomo yabo.

Akomeza avuga ko nyuma y’umwarimu ngo iyo binjiranyemo basangamo abandi batekinisiye b’inzobere bakigisha abana ku buryo n’undi uwo ari we wese amwizeza ko umwana uzamubwira ko yize muri Collège Fondation Sina Gérard aba afite indangagaciro z’Umunyarwanda n’indangagaciro z’ubukirisitu kuko ari yo mpamvu yahubatse Shapeli yitiriwe Mutagatifu Gérard (Chapèlle Saint Gérard) kugira ngo noneho ya myuga yose uko bayiga ariko n’umunyeshuri agire indangagaciro z’ubukirisitu, ku buryo ngo utazasanga umufundi bamuzaniye imifuka ya sima yo kubakisha ngo aho yari gukoresha imifuka 3 ahakoreshe imifuka 2, umugoronome najya gusarura imbuto amenye ko agomba kuzigeza mu ruganda zose uko zakabaye.

Ubwo ni ubundi burere babatoza kugira ngo umwana abe umuntu nya muntu bityo aho na we, aho abonye akazi ngo akomeze kubera ishuri ambasaderi mwiza.

Yishimira Leta y’Ubumwe ikomeje kumugirira ikizere kuko ubu kuri CFSG hahuriye abanyeshuri baturutse mu bigo by’amashuri yisumbuye 10 baje kuhakorera ibizamini bya Leta bisoza umwaka 2018-2019.

Avuga ko impamvu yabyo ari uko Leta iba yabanje kugenzura ikabona ko bishoboka kuhakorera ibizamini bya Leta, ishingiye aho abana bigira, aho barara ku buryo mu gihe bari mu bizamini, batarangara. Yishimira ko bamaze imyaka 3 ibyo bigo by’amashuri yisumbuye bikorera ibizamini kuri CFSG, kandi ngo bakarangiza ibizamini babikoze neza, nta mpaka zahavutse, ntawakopeye, ntawanyuze hirya no hino.

Ati: “Buri Cyumweru ngira umwanya wo kuganiriza abanyeshuri nkababwira uwo ndiwe, icyo nkora n’icyatumye nshinga ishuri, ko nashinze ishuri nshaka kunganira Leta y’Ubumwe muri gahunda yo kugira ngo he kugira umwana n’umwe usigara atize, ndangije ndavuga nti muri aba baturage ndimo hatazagira usigara atize.

Niyo mpamvu iyo bagitangira amashuri y’inshuke n’abanza, mborohereza kuko baba bakiri batoya, ababyeyi bamwe na bamwe batarasobanukirwa kwiga icyo ari cyo, abana na bo ni uko nguko, ariko iyo bamaze kurangiza amashuri abanza baba bafite ubwenge n’inyota yo gukomeza mu mashuri yisumbuye; akaba yakomereza muri aya mashuri y’imyuga kimwe n’uko bagenda bakajya no mu bindi bigo by’amashuri mu gihugu cyangwa no hanze kuko turabafite bityo nanjye nkazagira ibyishimo byo kuzabona umuntu w’umusore cyangwa inkumi barangije iwanjye bafite ikiciro cya 3 cya kaminuza”.

Ubutumwa bwihariye bwa SINA Gérard, ni uko ngo kuri Nyiringarama mu Karere ka Rulindo mu Majyaruguru y’Igihugu abantu bafata umwanya bakahasura, bakajya mu nganda, mu mirima, aho bacururiza, bakajya mu bikorwa byose binyuranye bagasobanuza kandi bagasobanukirwa bityo bakamenya ko umwana w’umukobwa ashoboye.

Kuri we ngo iyo bavuze ko umugore ari Mutima w’urugo, aba ari umuntu ukomeye ku rugo kuko ngo umutima uhagaze umubiri ntiwakora bityo rero ngo igihugu kidafite ba Mutima w’urugo, nta terambere igihugu cyageraho cyageraho.

SINA Gerard yagarutsweho muri Raporo ya HeForShe nyuma yo gusurwa hakarebwa uko yimakaje ihame ry’uburinganire

SINA Gerard, umuyobozi wa Ese Urwibutso, asurwa cyane n’ingeri zitandukanye harimo na bamwe mu bagize Guverinoma

Umushoramari SINA Gerard yatangajwe muri raporo ya HeForShe nk’umuntu wateje imbere ihame ry’uburinganire muri gahunda ya HeForShe muri CFSG

Umushoramari SINA Gerard, umuyobozi wa Ese Urwibutso akaba ari nawe washinze CFSG, ari kumwe n’abana b’abakobwa biga muri CFSG

Abagore n’abakobwa batejwe bityo abakobwa 62% bigamuri CFSG

Abakobwa n’abahungu baba batsinze bahembwa kimwe

Abakobwa usanga ari bamwe mu bakozi bo muri alimentation ya Ese Urwibutso (Foto Kayitare J.Paul)

Ishuri rya College Fondation Sina Gerard

Shapeli yubatswe na SINA Gerard ikitirirwa Mutagatifu Gerard kugira ngo abanyeshuri bakomeze gutozwa indangagaciro z’ubukirisitu

SINA Gerard ateza imbere uburezi by’umwihariko abana biga mu mashuri abanza n’ayisumbuye bakaba bigira ubuntu

Umwanditsi:

Kayitare Jean Paul

One Comment on “SINA Gérard yagaragaje uko yaharaniye guteza imbere ihame ry’uburinganire”

  1. Ntekereza ko Sina Gérard ali umwe mu banyarwanda bakunda igihugu koko, atali amagambo. Ibikorwa bye bifatika ni igihamya gikomeye. Birakwiye ko Mineduc/ HEC/Minicom/RCA bakwigira hamwe ubulyo yajya atanga amasomo/ibiganiro muli za universités zacu mu rwego rwo guhanga imilimo ; naho ubundi umuntu usaziye ku ntebe nkorera abandi (Leta/Abikorera) kubwira abana ngo bihangire imilimo nta n’umwe nerekana nahanze ni nko gucurangira abana wa muziki wa Ludwig van Beethoven

Tanga Igitekerezo

Email yanyu ntigaragazwa ku rubuga. Amazina na Email ni ngombwa.