Sida ntigira umupaka, ibihugu bifatanye kuyirwanya – Kagame

Yanditswe na Nshim Janvier

Ku ya 02-12-2019 saa 20:07:50
Perezida Kagame na Madame Jeannette Kagame n'abandi bayobozi bitabiriye iyi nama

Perezida Paul Kagame avuga ko Sida ari icyorezo kitagira umupaka, asanga ubufatanye bw’ibihugu ari ingenzi mu kuyirwanya, aboneraho gushima bamwe mu bafatanyabikorwa babaye hafi u Rwanda rukagera ku ntambwe nziza yo gukumira icyo cyorezo no kugera ku musaruro mwiza wo kuyirwanya.

Umukuru w’Igihugu yabivugiye i Kigali ubwo yatangizaga inama mpuzamahanga yiga ku cyorezo cya Sida ICASA, ihurije mu Rwanda abahanga kuri Sida, abashakashatsi n’abakora mu nzego z’ubuvuzi, n’abayobozi mu nzego zitandukanye barimo Ishami ry’Umuryango w’Abibumbye ryita ku Buzima WHO, Umukuru w’Igihugu cya Mozambique Nyusi Pilippe, bamwe mu bafasha b’Abakuru b’Ibihugu  by’Afurika bari mu muryango ushinzwe kurwanya Sida, n’abandi.

Mu butumwa bwe, Umukuru w’Igihugu Paul Kagame yijeje abafatanyabikorwa bakoranye n’u Rwanda barimo nka Global Fund, Pepfar, Gavi, n’abandi kuzakomeza gukorana na bo, kuko asanga ari bimwe mu bizatuma u Rwanda rugera ku ntego rwihaye yo kurwanya icyorezo cya Sida, yibutsa ko ubuyobozi bwiza n’ubushake bwa poritiki ari ingenzi mu kurwanya Sida.

Ati “Ni ngombwa ko ibihugu by’Afurika bihagurukira gushora imari no kongera ingengo y’imari mu bikorwa by’ubuzima, Sida ni icyorezo kitagira umupaka, ibyagerwaho byinshi byashoboka ari uko hashyizwe imbaraga mu birebana n’ubukangurambaga mu kurwanya Sida no guhagarika ikwirakwizwa ryayo. Byose byagerwaho ari uko habaye ubufatanye buri ku rwego mpuzamahanga, kuko byose bikorwa mu nyungu z’abaturage bacu kugira ubuzima bwiza.”

Kagame yongeyeho ati “Iyo ugiye kureba hari ibintu by’ingenzi bikenewe, abahanga bize ibirebana n’ubuzima, abayobozi mu nzego z’ubuzima, ndetse n’ikizere kuko gituma abaturage bagendera ku mirongo ngenderwaho irebana n’urwego rw’ubuzima, ariko ik’ingenzi cyane cyagize akamaro ni inzego z’Abajyanama b’ubuzima haba hano mu Rwanda ndetse no mu bindi bihugu bitandukanye.”

Minisitiri w’Ubuzima mu Rwanda akaba na visi perezida wa ICASA, Dr. Gashumba Diane, yagarutse ku ntambwe ndetse n’ingero zibifatika u Rwanda rumaze kugeraho mu birebana n’urwego rw’ubuzima, ndetse no kurwanya icyorezo cya Sida muri rusange kandi bitanga umusaruro ufatika, avuga ko Abanyarwanda bagera kuri 91% bafite ubwishingizi bwo kwivuza, mu gihe abagore batwite 99% bahabwa serivise zo kwipimisha icyorezo cya Sida, naho abana bagera kuri 95% bahabwa amahiwe yo kubona inkingo hakiri kare.

Umuyobozi Mukuru w’Ishami ry’Umuryango w’Abibumbye ryita ku buzima WHO, Tedros Adhanom, avuga ko u Rwanda ari kimwe mu bihugu bike byo ku mugabane w’Afurika byageze ku ntego yo gufasha abaturage bacyo kugira ubuzima bwiza kandi buzira umuze.

Ati “U Rwanda rwateye imbere mu birebana no kurwanya no gukumira kare kuko ubu Abanyarwanda bagize amahirwe make yo kwandura nibura 90% muri bo bazi uko bahagaze, kandi bahabwa imiti igabanya ubukana.”

Perezida wa Mozambique Filipe Nyusi yavuze ko kuba u Rwanda rwarashyize imbaraga mu gukumira no kurwanya Sida hari icyo byafashije kuko nk’urwego rw’ubuzima iyo hari ikibazo bica intege maze bikadindiza imishinga y’iterambere yakabaye igerwaho, avuga ko no mu gihugu ke hari ingamba batangiye zirimo gufasha ababana n’ubwandu kugera ku miti, kuko ari kimwe mu bihugu bifite umubare munini w’abantu banduye mu bihugu biri munsi y’ubutayu bwa Sahara.

Inama mpuzamahanga ya 20 kuri Sida, izamara hafi icyumweru, ifite insanganyamatsiko igira iti ‘Afurika izira icyorezo cya Sida’. Bimwe mu biganiro bikomeje mu rwego wa ICASA n’ibizahuza abafasha b’Abakuru b’Ibihugu bizagaruka ku ngamba n’icyo bisaba kurwanya Sida mu bana b’abangavu, n’abagore bakiri bato bo ku mugabane w’Afurika.

Umwanditsi:

Nshim Janvier

Tanga Igitekerezo

Email yanyu ntigaragazwa ku rubuga. Amazina na Email ni ngombwa.