20°C , Partly sunny | Kigali-Rwanda

Si byiza gusukura amatwi hahoreshejwe uduti turiho ipamba – Dr Dushimimana

Yanditswe na MUKAGAHIZI ROSE

Ku ya 13-02-2018 saa 06:43:29

Dr. Dushimiyimana Jean Marie Vianney, inzobere mu kuvura no kubaga indwara z’amatwi no mu muhogo, asobanura ko  amatwi ari igice cyo ku mubiri  gikenera isuku ihagije kandi ikozwe neza ndetse kigomba kubungabungwa neza ariko bikaba bibi igihe hakoreshejwe udukoresho tuzwi nka “tige  coton” kuko  tutagenewe gusukura mu gutwi imbere ahubwo ni utwo guhanagura ugutwi kw’inyuma.

Ubusanzwe ugutwi ubwako kwifitemo ubushobozi bwo kwikorera isuku

Akomeza avuga ko ugutwi ubwako kwikorera isuku, agira ati “Nta bwo byemewe kwinjiza mu gutwi imbere kuko uretse kuba ipamba ryavungukiramo, ushobora no gusunikira kure ubukurugutwa bityo aho kugira ngo busohoke ukabutsindagira.”

Akomeza yungamo ati “Uburyo bwo gusukura amatwi muri rusange,ubusanzwe nta bwo twebwe dushishikariza abantu gukoresha uduti dufite ipamba  kubera ko ugutwi ubwako gufite uburyo kwisukura, buriya bukurugutwa twe twita ngo ni umwanda ni uburyo bwo kwirinda kuko icya mbere buba bumeze nka kole (colle) ku buryo udukungugu tugiyemo twose duhita dufatwa aho ngaho noneho abantu bakajyamo bagakorogoshora, ugutwi gukora ubukurugutwa kubera ko kubukeneye kuko utuntu twose tugiyemo duhita dufatwa na mikorobi zigiyemo nta bwo zihita zijya ako kanya ku ruhu kubera ko zisanga hariho ubwo bwirinzi noneho harimo n’utuntu duto cyane tutabonwa n’amaso tumeze nk’uburoso bw’amenyo ku ruhu rwo mu gutwi imbere duhora tunyeganyega ariko tukanyeganyega ku buryo tuba dusunika ibyo byose tubizana hanze.”

Avuga ko  ikibi cya ‘tige cotton’ ari uko  umuntu uba uyikoresha aba atareba aho iri bugere, bivuze ko bya bindi byose biba biza hanze bisohoka  byagera ku muryango umuntu  agahita abisubizayo kandi ngo  iyo bisubiyeyo mu gutwi kw’imbere bisubirayo byabaye byinshi,  byaremereye ku buryo twa tuntu duto cyane tumeze nk’uburoso duhita ducika n’intege ntitubashe kubisunika.

Yagize ati “Ikindi ni uko iyo uhora uhanaguramo za mikorobi zigira ubushobozi noneho kuri rwa ruhu, kandi noneho n’ugutwi kuko gukora ubukurugutwa kugira ngo kwirinde uko kwirwanaho kwa mbere iyo uhanaguye ukabumaraho icya mbere guhita gukora bwinshi kurushaho kugira ngo bwirinde ubukurugutwa bukaza ari bwinshi na we ugahora ubusunika uburundamo imbere bikagezaho bigahinduka ikintu kimeze nk’igisheshe.”

Akomeza agira ati “Tige cotton” urabona ni ipamba, hari nubwo ripfukiramo mu bwo bukurugutwa, ikanyunyuzamo utuzi twose twarimo, bigatera  igisheshe kidashobora kuvanwamo na bwa buryo umubiri wifitemo wo kwisukura.  Iyo bimeze gutyo ni ibibazo umuntu aba yiteye.”

Aha, ngo ikiba kihutirwa ni ukujya kwa muganga bagakuramo mu buryo bwabo bashobora kozamo, bakoresheje ibikoresho byabugenewe.

Mu gihe ubukurugutwa bwabaye bwinshi,  umuntu ashobora  guhanagura akoresheje agatambaro keza kuko ubugomba kuvamo buvamo.

Hari n’abantu bagira ubukurugutwa bukomeye, ngo icyo gihe bisaba ko kwa muganga babubakuriramo  ariko ngo abo ni bake cyane.

 

TANGA IGITEKEREZO

Leave a Reply

Your email address will not be published. Required fields are marked *