18°C , Mostly cloudy | Kigali-Rwanda

Shiloh Prayer Mountain Church irashimira Leta yatanze umudendezo wo gusenga

Yanditswe na Amani Claude

Ku ya Sep 19, 2018 saa 11:07

Itorero Shiloh Prayer Mountain ryatangijwe na Bishop Esther Olive Murekatete tariki 20 Kamena 2010 i Nyamirambo mu karere ka Nyarugenge.

Uyu mukozi w’Imana arashimira  Leta yashyigikiye umuhamagaro we wo gushinga itorero n’ubwo yari akiri umukobwa w’imyaka 25 y’amavuko.

Mu kiganiro Bishop Murekatete yagiranye n’Imvaho Nshya yatangaje ko ubwo yatangizaga itorero hari benshi batabyumvaga ariko Leta y’u Rwanda iha agaciro umugore yaramushyigikiye.

Yagize ati “Ndashimira Nyakubahwa Perezida wa Repubulika Paul Kagame ndetse na Guverinoma yose kuko bampaye uburenganzira bwo gushinga itorero nubwo hari benshi batumvaga umuhamagaro wange nk’umukobwa.”

Itorero Shiloh Prayer Mountain rigira uruhare mu iterambere ry’igihugu ryigisha abakirisito kwitandukanya n’ingeso mbi zose bakubaha abayobozi b’igihugu.

Rinategura gahunda yo gusura abarwayi no kubaha ubufasha bw’ibanze, ndetse rikanafasha abatishoboye bo mu itorero n’abo hanze yaryo. Abakirisito bishoboye bahangira imirimo abakene muri bo ndetse buri mpera z’umwaka bagenerwa ibyo kurya n’imyambaro.

Bishop Murekatete arasaba abakirisito gukomeza kwizera Imana, kuba urumuri aho bari hose ku buryo ubabonye akunda Imana ku bw’ibikorwa byabo.