22°C , Partly sunny | Kigali-Rwanda

Shampiyona y’u Rwanda irakomeza hakinwa imikino y’umunsi wa kabiri

Yanditswe na BUGINGO FIDELE

Ku ya 08-10-2019 saa 08:37:30
Ikipe ya APR FC nyuma yo kunganya na AS Kigali mu mukino ufungura shampiyona irakina na Bugesera FC iwayo mu mukino w'umunsi wa kabiri

Tariki 08-10-2019

Rayon-AS Kigali (Nyamirambo-18h00)

Bugesera FC-APR FC (Nyamata-15h00)

Tariki 09-10-2019

Gasogi-Marines FC (Nyamirambo-15h00)

Gisumbi FC-AS Muhanga (Mumena-15h00)

Musanze FC-Police FC (Musanze-15h00)

Sunrise FC-Mukura (Nyagatare-15h00)

Espoir FC-Kiyovu (Huye-15h00)

Heroes FC-Etincelles FC (Nyamata-15h00)

Kuri uyu wa Kabiri tariki 08 Ukwakira 2019, shampiyona y’ikiciro cya mbere mu Rwanda irakomeza hakinwa imikino y’umunsi wa 2 aho ikipe ya Bugesera FC yakira APR FC naho Rayon Sports ikakira AS Kigali.

Ikipe ya Bugesera FC yitwaye neza mu mukino w’umunsi wa mbere itsinda Heroes FC  irakira APR FC yanganyije na AS Kigali igitego 1-1 mu mukino  ufungura shampiyona ya 2019-2020.

Uyu mukino urabera kuri Sitade ya Nyamata  saa kenda (15h00). Kuva Bugesera FC  yazamuka mu kiciro cya mbere  muri 2015 imaze gukina na APR FC imikino 8. Muri iyi mikino, ikipe ya APR FC yatsinze imikino 5, Bugesera FC itsinda umukino umwe mu gihe zanganyije imikino 2.

Ku ruhande rwa Bugesera FC, Umunyamabanga Mukuru, Karenzi Samuel avuga ko biteguye gukomeza gutsinda kandi ko APR FC  batagomba kuyitinya kuko muri iyi minsi itarimo kwitwara neza.

Umutoza mukuru w’ikipe ya APR FC, Mohammed Adil Erradi arasabwa gutsinda uyu mukino kugira ngo yigarurire ikizere nyuma y’aho atabashije kubona amanota 3 ku mukino ufungura shampiyona aho iyi kipe yanganyije na AS Kigali igitego 1-1.

Ikipe ya Bugesera FC yitwaye neza ku mukino w’umunsi wa mbere wa shampiyona itsinda Heroes FC ibitego 2-0.

Rayon Sports irakira AS Kigali

Ikipe ya Rayon Sports  nyuma yo gutangira inganya na Gasogi United 0-0, irakira ikipe ya AS Kigali mu mukino w’umunsi wa kabiri uza kubera kuri Sitade ya Kigali i Nyamirambo saa kumi n’ebyiri (18h00).

Uyu mukino nta bwo uza kuba woroshye kuko izi kipe zombi zirashaka amanota 3.

Kuva muri  2013 izi kipe zombi zimaze guhura inshuro 12 muri shampiyona. Ikipe ya Rayon Sports ni yo yitwaye neza kuko yatsinze inshuro 6 mu gihe AS Kigali yatsinzemo 2 naho izindi nshuro 4 zikanganya.

Muri shampiyona iheruka Rayon Sports yegukanye, umukino ubanza yatsinze AS Kigali igitego 1-0 naho uwo kwishyura izi kipe zinganya  igitego 1-1.

Imikino y’umunsi wa kabiri izasozwa ku munsi w’ejo

Indi mikino y’umunsi wa kabiri izaba ku munsi w’ejo tariki 09 Ukwakira 2019 aho ikipe ya  Gasogi United iheruka kunganya na Rayon Sports izakira Marines FC,  Gisumbi FC yakire AS Muhanga, Musanze FC yakire Police FC, Sunrise FC yakire Mukura, Espoir FC yakire Kiyovu mu gihe ikipe ya Heroes FC izakira ikipe ya Etincelles FC.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.