21°C , Mostly cloudy | Kigali-Rwanda

Shampiyona  y’u Rwanda igiye gusukurwa ikinwe mu matsinda

Yanditswe na BUGINGO FIDELE

Ku ya 06-04-2021 saa 20:28:46
APR FC yegukanye shampiyona iheruka iri mu itsinda A hamwe na Bugesera FC, AS Muhanga na Gorilla FC

Kuri uyu wa Kabiri taliki 06 Mata 2021 ni bwo hatangajwe igihe shampiyona y’umupira w’amaguru mu Rwanda izasubukurirwa n’uko izakinwa kugira ngo irangire muri Kamena 2021.

Shampiyona y’u Rwanda ya 2020-2021 yari yatangiye mu Kuboza 2020 ariko iza gusubikwa kubera ko amakipe amwe n’amwe yananiwe kubahiriza ingamba zo kwirinda COVID-19.

Nyuma y’inama zitandukanye zagiye zihuza ishyirahamwe ry’umupira w’amaguru “FERWAFA” n’amakipe y’icyiciro  cya mbere hemejwe ko shampiyona yasubukurwa taliki 01 Gicurasi igasozwa 29 Kamena 2021.

Kugira ngo shampiyona ikinwe irangire hemejwe ko amakipe azakina mu matsinda  aho itsinda A rigizwe na APR FC ifite igikombe giheruka cya 2019-2020, Bugesera FC, AS Muhanga na Gorilla FC.

Mu itsinda B harimo Rayon Sports yabaye iya kabiri umwaka ushize, Kiyovu, Gasogi United na Rutsiro FC. Itsinda C rigizwe na Police FC, AS Kigali, Musanze FC na Etincelles FC naho itsinda D rigizwe na Mukura, Sunrise FC, Marines FC na Espoir FC.

Uko imikino izagenda, mu matsinda ikipe izakina n’indi umukino ubanza n’uwo kwishyura hanyuma ikipe 2 za mbere muri buri tsinda ubwo zose  hamwe ni 8 zizamuke zizakine hagati yazo habarwe amanota hanyuma ikipe ya mbere yegukane igikombe izanahagararire igihugu mu mikino y’Afurika y’amakipe yatwaye ibikombe  iwayo “Total CAF Champions League 2021-2022” naho iya kabiri ihagararire igihugu mu mikino y’Afurika y’amakipe yitwaye neza iwayo “Total CAF Confederation Cup 2021-2022”.

Ku rundi ruhande amakipe azaba aya 3 na 4 mu itsiinda ubwo nayo ni 8 azakina hagati yayo hakorwe urutonde abiri ya nyuma amanuke mu cyiciro cya kabiri.

Shampiyona ya 2019-2020  yegukanywe n’ikipe ya APR FC  naho ikipe ya Gicumbi FC na Heroes FC zimanuka mu cyiciro cya kabiri.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.