27°C , Partly sunny | Kigali-Rwanda
Kanyange Jeannette, utuye mu Murenge wa Muyira mu karere ka Nyanza aravuga imyato inka yo mu bwoko bwa Jersey

Send a Cow yahishuye ubwiza bw’inka zo mu bwoko bwa ‘Jersey’

Yanditswe na Mukagahizi Rose

Ku ya 11-02-2019 saa 14:08:31

Send a Cow ni umuryango w’Abongereza washinzwe n’aborozi bishoboye, icyo gihe mu Burayi hari amata menshi cyane abantu bakifuza y’uko inka zapfa kugira ngo amata agabanuke.

Kugabanuka kw’amata ku isoko kwagombaga kujyana n’izamuka ry’ibiciro kuko byari byamanutse cyane. Send a Cow ikorera mu bihugu 7 byo muri Afurika birimo n’u Rwanda.

Ubuyobozi bwayo mu Rwanda buvuga ko inka zo mu bwoko bwa ‘Jersey’ zibereye kororwa n’Abanyarwanda, kuko zirya bike kandi zigatanga umukamo mwinshi.

Nsengiyumva André, Umuyobozi wa Send a Cow mu Rwanda no mu Burundi, avuga ko inka zo mu bwoko bwa ‘Jersey’ ari ntagereranywa kuko zihanganira indwara kandi zikagira amata aryoshye.

Avuga ko Send a Cow itita ku by’inka gusa ahubwo ishishikariza abaturage guhindura imyumvire n’uburyo bashobora kwiteza imbere.

Nsengiyumva André, Umuyobozi wa Send a Cow mu Rwanda no mu Burundi

Avuga ko mu mwaka umwe bamaze gutera inka intanga zigera ku bihumbi 11, hari izamaze kuvuka, hari n’izindi zihaka, bakaba bateganya gutera intanga zisaga ibihumbi 40 mu myaka itatu.

Umuyobozi ushinzwe ibirebana no kuvugurura icyororo no kuzamura umusaruro mu Kigo Gishinzwe guteza imbere ubuhinzi n’ubworozi RAB Dr. Shumbusho Felicien, na we ashimangira ubwiza bw’inka zo mu bwoko bwa Jersey.

Yagize ati, “Jersey, inka nziza ni umushinga uterwa inkunga n’ikirwa cya Jersey cyo mu Bwongereza, ugashyirwa mu bikorwa na Send a Cow na RAB, aho ngaho niho dusubiriza gahunda zo kuzamura umusaruro w’amata ariko tukunguka byinshi kurusha ibyo tuba twashoyemo.”

Akomeza avuga ko gahunda yo gukoresha ubwoko bw’inka bwitwa Jersey ari imwe mu zo bakoresha mu gihugu.

Yagize ati, “Jersey ni inka ibereye ubworozi bwo mu Rwanda ku borozi bafite ubushobozi buke kuko ni inka itanga amata menshi yariye bikeya. Ni ukuvuga ngo mu bijyanye no gutanga umusaruro iri mu nka zitanga umusaruro uri hejuru, akaba ari yo mpamvu tuyishishikariza aborozi kugira ngo bayorore kubera ko idasaba kuyiha ibiryo byinshi, ikindi iramenyera vuba ugereranyije n’izindi kuko ni inka ituruka kure, iyo igeze hano bisaba kubanza kumenyera nubwo tuba twazanye intanga tugatera ariko ivutse n’ubundi iba ivutse isa nk’aho yatoranyijwe kugira ngo ibe ahandi.”

Inka zo mu bwoko bwa ‘Jersey’ zishimwa n’aborozi

Aborozi barimo Kanyange Jeannette, utuye mu Murenge wa Muyira mu Karere ka Nyanza, avuga ko mu myaka itanu ishize yari yoroye inka 12 z’Inyarwanda zose zakamwaga litiro 12 z’amata ku munsi.

Nyuma y’amakimbirane yagiranaga n’abaturanyi biturutse ku kuboneshereza, ngo yahisemo kuzisimbuza inka eshatu za Jersey, aho buri imwe imwe ikamwa litiro zirenga umunani z’amata ku munsi.

Yishimira uburyo Send a Cow yamuteye inkunga akabasha kubaka ikiraro cyo mu bwoko bwa kijyambere, akigishwa kuzigaburira ubwatsi yateye ku buso bwa hegitare imwe y’ubutaka, honyine hakabasha kuzitunga iminsi yose, mu gihe k’izuba no mu gihe k’imvura.

Kanyange Jeannette, utuye mu Murenge wa Muyira mu karere ka Nyanza aravuga imyato inka yo mu bwoko bwa Jersey

Kanyange afite izindi hegitare ebyiri z’ubutaka ahingaho imyaka itandukanye akayifumbiza ifumbire akuye mu biraro by’inka ze, akaba avuga ko Jersey zimuha umusaruro urenze uw’abakorera umushahara ku kwezi kuko zima vuba kandi ikaba ahantu hato.

Umworozi Ngendahayo Jean Damascène, wo mu Murenge wa Ntarabana mu Karere ka Rulindo avuga ko iyi nka yababereye igisubizo kuko itavunanye mu bijyanye no kuzigaburira, kuzivuza, ntikunda kurwaragurika cyane nk’izindi ziba zivuye hanze, ikindi ngo igira amata meza.

Yagize ati, “Iyi nka ibereye umworozi ufite ubushobozi buke mu bijyanye n’ubwatsi, ubutaka, ibyo kuyivuza biroshye, bigatuma umworozi yunguka mu mbaraga nke.”

Akomeza avuga ko yatangiye gukorana na Send a Cow muri 2009. Kuva ubwo ngo ubuzima bwe bwarahindutse.

Yagize ati, “Mbere yo korora inka zo mu bwoko bwa Jersey nezaga umufuka umwe w’ibishyimbo ariko ubu nsigaye neza imifuka 10 y’ibishyimbo.”

Uretse ibyo avuga ko nta rutoki yagiraga. Kuri ubu ngo mu cyumweru ntiyabura ibitoki bitatu byeze neza.

Ashima amahugurwa umushinga wa Send a Cow wamuhaye nko gufata neza inka, kumenya uburyo zarinze cyangwa zirya kugira ngo zongere umusaruro aho ngo byamubereye imbarutso yo kugera ku bukire.

Yagize ati, “Iyo umuntu abikurikiranye agahuza ubuhinzi n’ubworozi bimubyarira inyungu. Gufata inka neza ni ukuyigaburira neza ku buryo itanga umukamo. Gufata ibyatsi by’ibinyampeke ukabivanga n’ibinyamisogwe. Iyo ugaburiye inka neza itanga umusaruro. Iyi Jersey ikamwa litiro 8 cyangwa 9 nimugoroba nkabona 4 cyangwa 5 twagize amahirwe tubona ikaragiro hafi kuburyo ubu ngubu ikibazo cyo kunywa amata cyakemutse.”

Yaba we n’abaturanyi be bavuga ko bahinduye ubuzima kuko babona amafaranga mu buryo bugaragarira buri wese.

Ku bwe ngo yishyura ubwisungane mu kwivuza neza, kandi umuryango we ngo ubayeho neza.

Mu bindi ashimira Send a Cow inkunga yamuteye yo kubaka ikiraro neza bitandukanye n’icyo yari afite mbere, ku buryo hari itandukaniro rikomeye, iyo inka yarinze iryamamo akabibona neza kandi mbere ngo ntiyarabukwaga.

Ati, “Bituma n’inka yisanzura, ugasanga igize ubuzima bwiza ugereranyije kuko izuba riyigeraho naho ikiraro twari dufite mbere ntabwo izuba ryageraga ku nka nkuko umuntu abishaka.”

Uretse ibyo Send a Cow yabahuguye ibirebana n’uburinganire n’ubwuzuzanye, gukora akarima k’igikoni, no guhinga imboga kandi kera batarabikoraga.

Mu bindi ngo yahawe imbuto y’insina na we kugeza ubu yabashije koroza abatura nyi be inka n’ insina.

Inka zo mu bwoko bwa ‘Jersey’ zishimwa n’aborozi

Kanakuze Valence, Umuhuzabikorwa mu mushinga Jersey Inka Nziza avuga ko bamaze guterera abaturage intanga zisaga ibihumbi 11, muri izo ngo inka zisaga 60% zarimye.

Agaruka ku miterere y’Inka ya Jersey uburyo ari ntoya bityo mu buto bwayo bukaba butuma irya ibiryo bikeya bitewe n’ingano yayo, bigatuma ku mworozi ufite ubutaka buto, umworozi w’intege nkeya, wo mu kiciro cya mbere n’icya kabiri cy’ubudehe byoroha kuba yabasha kuyitaho ugereranyije n’izindi nka zo mu bundi bwoko ziba zisaba byinshi bitewe na bwa bunini bwazo.

Avuga ko Send a Cow yishimira umusanzu wayo mu iterambere ry’igihugu, ati, “Nka Send a Wow twishimira ko turi abafatanyabikorwa ba Leta y’u Rwanda mu guteza abaturage imbere binyuze mu buhinzi n’ubworozi, tukishimira kandi ko mu kuba abafatanyabikorwa tubona ibyo dukenera byose ku buyobozi bwiza dufite. Iyo tugiye mu mirenge, twakirwa neza, abayobozi bakadufasha kugera ku baturage ni inkunga ikomeye.”

Mu bindi, ngo bishimira ko iyo batangiye ibikorwa n’abaturage n’ubuyobozi bukomeza kuba hafi yabo, ndetse no hafi y’abaturage mu rwego rwo kugira ngo ibikorwa bizarambe.

Ati, “Niba umushinga uzamara imyaka ibiri cyangwa itatu iyo tuwurangije turagenda ariko abaturage n’abayobozi barasigara kandi dushimishwa ni uko iyo dusubiye inyuma tukajya kureba ibyagezweho dusanga bigera kuri wa muturage ndetse n’ubuyobozi bwarakomeje kubigira ibyabwo.”

Send a Cow mu gushyira mu bikorwa imishinga yayo, ifite ibintu 3 ishingirago cyane cyane ishingira ku iterambere ry’umuturage, ishingira ku iterambere ry’umuhinzi n’umworozi ndetse igashingira ku kurengera ibidukikije.

Ku iterambere ry’ubuhinzi n’ubworozi, bagiramo igice cy’ubuhinzi bwa kijyambere aho ngaho cyane cyane bibanda gufasha abaturage kumenya uburyo bwo kubyaza ubutaka buto bakoresheje ifumbire y’imborera byumwihariko haherewe ku butaka bwo ku rugo, babigisha uburyo butandukanye bwo guhinga imboga mu mirima itandukanye yaba imirima y’igikoni, imirima y’imitabo ikoze inshuro 2, hahandi umuturage atera imboga kuko yahinze akageza hasi ubutaka bukaba bufata amazi, bukanafumbirwa neza zamboga zikabaho igihe kirekire, hagamijwe kurandura imirire mibi.

Byongeye kandi uyu mushinga ushishikariza abaturage kunywa amata, niba baboroje, inka ikabyara mbere yo kumva y’uko umukamo wose ukwiye kujya ku isoko ahubwo bakumva ko ari byiza kunywa amata bakanagurisha na bo ubwabo babanjije kwihaza.

Jersey iratuma kuri ubu imibereho ya benshi iba myiza

Banabashishikariza kwishyira hamwe, bagakorera hamwe uwagize icyo ageraho agasangiza abandi hagamijwe kuzamurana.

TANGA IGITEKEREZO

Leave a Reply

Your email address will not be published. Required fields are marked *