18°C , Mostly cloudy | Kigali-Rwanda

Sena yashimye uruhare rwa NURC mu kwimakaza ubumwe n’Ubwiyunge

Yanditswe na Sezibera Anselme

Ku ya 07-11-2019 saa 06:01:17
Bishop John Rucyahana (iburyo) Perezida wa NURC na Ndayisaba Fidele, Umunyamabanga Nshingwabikorwa wa NURC, bari mu Nteko rusange ya Sena (Foto Mucyo R)

Inteko rusange ya Sena yashimye uruhare rwa Komisiyo y’Igihugu y’Ubumwe n’Ubwiyunge NURC mu gukangurira Abanyarwanda kwimakaza ubumwe n’ubwiyunge kandi isaba ko byarushaho kunozwa kugira ngo urwego bigenda bigeraho rubashe kuzamuka bityo Abanyarwanda barusheho kubana neza.

Byatangajwe kuri ya 06 Ugushyingo 2019, ubwo inteko rusange ya Sena yakiraga ku nshuro yayo ya mbere raporo ya Komisiyo y’Igihugu y’Ubumwe n’Ubwiyunge, n’ibikorwa bya NURC bya 2019/2020.

Itegeko No 35-2008 ryo ku wa 08/08/2008 rigena imiterere n’imikorere ya Komisiyo y’Igihugu y’Ubumwe n’Ubwiyunge (NURC) riteganya ko iyo Komisiyo itanga raporo y’ibikorwa bya buri mwaka.

Perezida wa NURC Bishop John Rucyahana, agaragaza ko mu myaka 25 ishize Jenoside yakorewe Abatutsi ibaye n’u Rwanda rwibohoye, ubumwe n’ubwiyunge bugenda butera intambwe nziza nk’uko byagaragarijwe muri gahunda itandukanye z’ibiganiro n’ubushakashatsi iyo komisiyo yakoze mu banyarwanda.

Bishop Rucyahana agira ati: “Ubushakashatsi twakoze mu 2018/2019 ku bana n’urubyiruko mu turere twose ku bagera 6051, mu bisubizo twasubijwe byatugaragarije ko muri bo abagera kuri 91.1% batangaza ko Abanyarwanda bahagaze neza mu bumwe n’ubwiyunge. Gusa benshi batugaragariza ko ababyeyi babo batababwira uko ababyeyi babo bitwaye mu gihe cya Jenoside.”

Bishop Rucyahana kandi avuga ko impamvu y’ibyo byose yatewe n’imbaraga zakoreshejwe bakora ibiganiro mu mashuri.

Avuga ko NURC yakoreye ibiganiro by’ubumwe n’Ubwiyunge muri gahunda na ‘Ndi Umunyarwanda’ mu mashuri 80 yisumbuye, mu mashuri 14 ya kaminuza ndetse n’urubyiruko rutari mu mashuri basaga 8500.

Avuga ko ibyo biganiro byanakorewe ku baturage mu kwezi kwahariwe ubumwe n’Ubwiyunge ndetse habaho n’ibikorwa byo guhemba Abarinzi b’Igihango 3 ku rwego rw’akarere, 7 ku rwego rw’umurenge na 57 ku rwego rw’akagari.

Uretse ibyo NURC yanagaragaje ko ibiganiro nk’ibyo byanatanzwe ku bagororwa bari muri gereza 13 mu gihugu, abantu 635 bitandukanyije n’imitwe yitwara Gisirikare hamwe no mu ngando 5 z’abari muri tije.

Rucyahana kandi avuga ko habayeho n’ihuriro ry’ubumwe n’Ubwiyunge mu turere twose 30 no mu mirenge 416 mu bikorwa by’izo nzego bigira uruhare mu guteza imbere ubumwe n’ubwiyunge, bigaragaza ko uturere 20 muri 30 tubasha kugira amanota 60%.

Mu rwego rw’isanamitima naho, Rucyahana avuga ko habaye ihuriro rya 11 ry’Umuryango Unity Club hashimirwa Abarinzi b’Igihango.

Nk’uko yabigarutseho agaragaza ishusho yerekeranye n’ingengabitekerezo ya Jenoside mu bihe avuga bitandukanye byo kwibuka, aho mu mwaka wa 2017 abantu 193 ari bo yagaragayeho, mu 2018 baba 141 naho mu 2019 baba 224.

Mu ngamba zihari Bishop Rucyahana avugamo gukomeza ibiganiro bya ‘Ndi Umunyarwanda’, gukomeza gahunda z’igihugu ziteza imbere ubumwe n’ubwiyunge no gushyiraho ihuriro ry’ubumwe n’Ubwiyunge ku rwego ry’umudugudu.

Muri rusange Inteko rusange y’Abasenateri yashimye akazi kakozwe na NURC mu gukangurira Abanyarwanda kwimakaza ubumwe n’Ubwiyunge abandi bagenda banatangaho ibitekerezo by’uburyo iryo hame ryagerwaho mu buryo bunoze.

Senateri Mureshyankwano Marie Rose ati: “Ni byiza  ibipimo birazamuka mu kwigisha ubumwe n’Ubwiyunge, gusa hari ahakwiye kongerwa imbaraga muri gahunda ya Ndi Umunyarwanda twongera gutoza abantu kuganira ku mateka yabo ndetse no kugira umuco wo gusabana imbabazi ku bakoze ibyaha.”

Yanabajijwe ababa bitabira ibiganiro bitangwa kubera ubwoba no gutinya ibihano bahabwa bigatuma bitabira ariko atari uko babyiyumvamo, Rucyahana asobanura ko hari intambwe yatewe mu kwitabira ibiganiro ku bushake batitaye ku mpinduka kuri gahunda nshya yashyizweho.

Ku bijyanye n’abitabira ibiganiro kubera ubwoba ariko bitabarimo yagize ati: “Tugize amahirwe bakagira ubwoba bakaza ni byiza aho kwigumira mu ngo zabo kuko byabafasha kugira ibyo bumviramo byiza bibafasha guhinduka.”

Nubwo NURC yashimwe uburyo yakoze raporo yayo n’akazi yakoze, Abasenateri basabye ko abantu bakuru ari n’abo ahanini bafite byinshi byo kuvuga nk’ababaye mu bihe bya Jenoside bakwibandwaho kugira ngo bagaragaze aho imibiri y’abishwe muri Jenoside yaba ikiri ngo ibashe gushyingurwa ndetse imiryango yabo ibashe komorwa ibikomere.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.