25°C , Partly sunny | Kigali-Rwanda
Abasenateri aha bari mu nteko rusange (Foto Gisubizo)

Sena yagaragaje urutonde rw’abakekwaho Jenoside bihishe mu bihugu 16

Yanditswe na TWAGIRA WILSON

Ku ya 14-02-2018 saa 05:55:44

Abagize Komisiyo y’ububanyi n’amahanga, ubutwererane n’umutekano mu Nteko ishinga amategeko umutwe wa Sena ubwo yagezaga  raporo yayo  ku nteko rusange ku birebana no gukomeza gukurikirana abakekwaho kugira uruhare muri Jenoside yakorewe Abatutsi mu 1994 bahungiye mu mahanga,  ndetse   no kugirana amasezerano yo guhererekanya abakekwaho ibyaha bari mu bihugu bitandukanye igaragaza urutonde  rw’abantu basaga 700  bihishe mu bihugu 16.

Abasenateri aha bari mu nteko rusange (Foto Gisubizo)

Raporo ya Sena  yagaragaje   urutonde rw’abakekwaho Jenoside n’ibihugu bihishemo. Ibiza ku isonga ni Repubulika iharanira demukarasi ya Kongo ahari abakekwaho Jenoside yakorewe Abatutsi bagera kuri  254 ikaba ari nayo iza ku isonga mu gucumbikira benshi mu gihe Uganda ikurikiraho n’abagera kuri 226.

Nkuko iyo raporo ibigaragaza,  igihugu cy’u Bufaransa  gifite  abangana  na 42, Malawi 42, u Bubiligi 39, Kenya 28, Tanzania 25, USA 23, u Buholandi 18  Congo Brazzaville 16, u Burundi 14, Canada 14, Mozambique 12, Zambia 11, Centrafrica 8, Cameroon 7, Norvege 6 n’u Budage 6

Hon.  Rugema Michel, uyobora Komisiyo y’ububanyi n’amahanga n’umutekano,  agaragaza ko  impamvu za politiki zifite uruhare runini mu  gutuma abakekwaho ibyaha badakurikirana ngo babiryozwe.

Yakomeje agira ati “Nta bwo muri RDC wavuga ngo igituma batabohereza si ibibazo bya politiki bizwi amakimbirane twamazemo igihe kirekire na bo ndetse ari na bo bacumbikiye umubare munini w’abakekwaho icyaha cya Jenoside ndetse bakomeza no kugira za gahunda zo guhungabanya iki gihugu. Nta kindi cyaba kiziri inyuma kitari ibibazo bya politiki.”

Ku birebana n’ubusabe bwo kugirana amasezerano n’ibihugu arebana no kohererezanya abanyabyaha,  Komisiyo yagaragaje muri rusange ko u Rwanda rumaze kohereza ubusabe bwo kugirana amasezerano yo guhererekanya abakurikiranyweho ibyaha mu bihugu bigera kuri 38 ariko ibihugu bimaze gusubiza bikaba ari mbarwa.

Mu bitekerezo byatanzwe n’abasenateri ni uko,  kuba nka Uganda ari kimwe mu bihugu  bihuriye n’u Rwanda mu muryango umwe wa EAC,   ahubwo yabaye  amahirwe yo gukora ubuvugizi, banongeraho ko hakwiye kubaho ubufatanye bw’Inteko zishinga amategeko, bugamije gutanga ubutabera ku bakekwaho ibyaha bya Jenoside.

Komisiyo yasabye ko habaho abakozi bahagije bashobora gukurikirana igihugu ku kindi hakamenyekana impamvu abakekwaho ibyaha batoherezwa.

Mu bihugu bimaze kohereza mu Rwanda abakurikiranyweho ibyaha bya Jenoside  harimo   Leta zunze Ubumwe z’Amerika yohereje bane; Kagaba Enos, Mukeshimana Marie Claire, Mudahinyuka JMV na Munyakazi Leopold. Canada yohereje Leon Mugesera na Seyoboka Jean Claude. Uganda yohereje batatu; Nkundabazungu Augustin, Kwitonda Jean Pierre na  Birindabagabo Jean Paul.

 

TANGA IGITEKEREZO

Leave a Reply

Be the First to Comment!

avatar