17°C , Partly cloudy with thunderstorms | Kigali-Rwanda

Save Generations Organisation (S.G.O) yiyemeje umusanzu wayo mu iterambere ry’igihugu

Yanditswe na admin

Ku ya Nov 23, 2017 saa 11:08

Ubuyobozi bw’ Umuryango Nyarwanda  utari uwa Leta uharanira iterambere ry’umwana, urubyiruko n’abagore “Save Generations Organisation S.G.O”  ukorera mu kigo cy’urubyiruko cya Kabuga (Kabuga Yego Center) buvuga ko iterambere ry’Igihugu rizagerwaho buri wese abigizemo uruhare.

Nyinawumuntu Yvette, umuyobozi wa S.G.O

Mu kiganiro n’Imvaho Nshya, Nyinawumuntu Yvette, umuyobozi wa S.G.O yavuze ko ari igihe cyacu nk’Abanyarwanda kudategereza undi watugeza ku iterambere twifuza. Yagize ati “ Ni igihe tugomba kumenya ko dushoboye, ko  hari ikintu kiturimo bityo,  nitwiyegeranya, tukakibyaza umusaruro, kizatugirira akamaro kandi tuzubaka igihugu twifuza.”

Amavu n’amavuko ya S.G.O

Ni inzozi zigihe kirekire zagiye mu ngiro

Umuyobozi wa S.G.O avuga ko yari amaranye igihe kinini igitekerezo cyo gutangiza uyu muryango uharanira  iterambere ry’umwana, urubyiruko n’umugore.

Yagize ati “ Nagize igitekerezo cyo gutangiza uyu muryango nk’ Umunyarwandakazi  nyuma yo gutekereza no guha agaciro amahirwe nagize yo kwiga, gukora ari mu Rwanda ndetse no mu mahanga aho nanabashije kwiga mu gihugu cy’Ubuhorandi, nkora  mu muryango waho uharanira iterambere ry’umugore aho nigiye cyane cyane ibijyanye no guteza imbere umugore n’umukobwa utibagiwe umuryango ndetse na sosiyete muri rusange;  ariko nagiyeyo mfite izi nzozi mu gihe kirekire kuva mu mwaka wa 2007 ubwo nibazaga nti ese ko njyewe ngiriwe ubuntu, nkatezwa imbere nk’umukobwa ni iki nanjye natangaho umusanzu mu gihugu cyanjye.”

Akomeza avuga ko yagize amahirwe yo gukora  ikiciro cya gatatu cya kaminuza muri icyo gihugu aho ngo yagiriwe  ubuntu bwo guhura n’abantu batandukanye bafite ibitekerezo bitandukanye kandi byubaka.

Ati “ Inzozi zanjye zarushijeho kwaguka cyane ndibwira nti mu gihe cyanjye nanjye ndumva nifuza kuzataha mu gihugu cyanjye mu mwaka wa  2015 nkashinga umuryango  ubasha kongerera ubushobozi abana n’urubyiruko cyane cyane ndeba ejo hazaza habo. Niyo mpamvu twawise Save Generations Organisation.  Ni ukuvuga ngo uyu munsi turiho ariko nitudategura urungano rw’ejo hazaza, ruzakomeza byabindi bisanzwe biriho ndetse rugakora n’ibindi bikomeye byiza ntaho twaba tugana. Niyo mpamvu  natangije uyu muryango ndetse hamwe n’abandi bafite iyi mitekerereze twiyemeza guharanira  iterambere ry’umwana, urubyiruko n’umugore.”

Umwana, urubyiruko, umugore mbere na mbere

Nyinawumuntu avuga ko  umwana  ari umuntu w’ingenzi cyane bityo, ngo  ntawavuga ejo hazaza yibagiwe umwana dore ko ngo ariwe  muyobozi w’ejo, umubyeyi w’ejo, mwarimu w’ejo, n’ibindi mu kuzubaka igihugu twifuza.

Ni mu gihe urubyiruko rugira  uruhare uyu munsi kandi bafite n’uruhare ejo.

Umugore nawe akagira uruhare rukomeye cyane ari mu kubaka umuryango harimo umwana n’urwo rubyiruko ndetse n’igihugu muri rusange.

Nyinawumuntu arakomeza “ Niba twifuza abayobozi beza ejo, abarimu beza ejo, abaganga beza ejo, n’abandi,  abazabigiramo uruhare cyane n’umuryango.  Mu  myumvire nyarwanda,  umugore afite uruhare rukomeye cyane mu guhindura ubuzima mu buryo bwiza kandi n’igihe atateguwe cyangwa ngo atezwe imbere abasha no guhindura ubuzima  mu buryo bubi.  Niyo mpamvu  twifuje  ko twakorana n’abo bantu kuko bizatanga umusaruro ufatika mu kugera ku gihugu twifuza.”

Kugeza ubu ibikorwa by’uyu muryango biri mu byiciro 4 ari byo: Kwita ku mibereho myiza y’umwana, kubaka ubushobozi no guteza imbere urubyiruko n’umugore, uburezi n’ubuzima. Yagize ati “ Ntitwatekereza ejo hazaza ngo twibagirwe ubuzima kuko iyo turi bazima ninabwo tubasha no gutekereza no  kubaka n’ejo hazaza. Usibye ubuzima, twemera ko uburezi ari inkingi ikomeye  yatugeza ku iterambere n’ejo hazaza heza twifuza. Ni kubw’ibyo dukora ibikorwa bigamije kubaka ubushobozi bw’umwana n’urubyiruko mu burezi aribyo gufasha twishyurira amafaranga y’ishuri abana n’urubyiruko batishoboye.”

Avuga ko batangiranye n’urubyiruko rutagize amahirwe yo kwiga (bacikirije amashuri), batangiza  ibikorwa bijyanye no kubigisha  imyuga iciriritse mu gihe cy’amezi hagati y’atatu n’atandatu bitewe n’umwuga; ndetse bakanabaha n’ amahugurwa y’ubumenyi ngiro agamije guhindura imyumvire, kubongerera ikizere n’iterambere. Muri ayo mahugurwa harimo amahugurwa ajyanye no kwimenya no kwisobanukirwa,  kwihangira imirimo, ubukungu, kwizigamira,  ikoranabuhanga mu gihe cy’ amezi atatu.

Umuryango utewe ishema n’abamaze guhugurwa bafite  icyerekezo kizima

Kuva uyu muryango  watangira bamaze guhugura urubyiruko rutiga rurenga 100 mu myuga iciriritse, baranaremerwa  ndetse bafite ubuhamya. Abandi (urubyiruko n’abagore) barenga 500, babonye amahugurwa atandukanye y’ubumenyi ngiro.

Abagenerwabikorwa ba S.G.O barashimira uyu muryango

Uyu muryango watangiranye n’urubyiruko rutiga, rugahugurwa amezi 3 mu  mahugurwa agamije kubaka ubushobozi bwabo, harimo  amahugurwa ku by’ubukungu, kwihangira imirimo, kwizigama, kwimenya, kwisobanukirwa bigamije kubaka ubushobozi bwabo no kubibutsa ko  bashoboye kandi hari aho bakwikura n’aho bakwigeza.

Igishimishije kurushaho ni uko iyo amahugurwa arangiye  baremerwa kandi bakazakurikiranwa mu gihe kigera ku myaka ibiri.

Kugeza ubu bahugurwa  imyuga ijyanye  n’ubukorikori ndetse n’ubudozi ariko nkuko Nyinawumuntu abivuga ngo babonye ubundi bushobozi bakwakira n’abandi bose babagana.

Yagize ati “ Batangira amahugurwa bari mu itsinda, bamarara guhugurwa ku kwizigama bagakora itsinda ryo kwizigama, iyo bamaze gusoza y’amahugurwa y’ imyuga bagahinduka Koperative, bamara guhinduka Koperative bagakorera hamwe nka koperative hanyuma tukabaherekeresha kubakurikirana mu gihe cy’imyaka 2 ndetse tukanabafasha mu buryo bwo kubahuza n’amahirwe atandukanye harimo kubahuza n’ibigo by’imari nka SACCO,  BDF ndetse n’amasoko. Uretse ibi, tukabahuza n’inzego zitandukanye ku buryo bya bindi bize babasha kugira amahirwe yo kubishyira mu bikorwa bakikura mu buzima bumwe bakinjira mu bundi.”

Abagenerwabikorwa bafite ubuhamya kukomeye

Byiringiro Daniel, umwe mu rubyiruko akora ubugeni n’ubukorikori, birimo imyuga itatu itandukanye, ubudozi, kuboha agaseke, amaherena n’ibindi bijyanye nabyo, ndetse n’ubugeni bwo gukoresha ibintu byo mu mpapuro.  Avuga ko nyuma yo kurangiza amashuri yisumbuye ntakizere cyo kubaho neza yari afite, kuko nkuko abivuga ngo yageze  mu buzima bwo hanze bikabanza kumugora kwiyakira kuko nta bushobozi bwo gukomeza kaminuza yari afite.

Ibikorwa abagenerwabikorwa ba SGO birivugira

Avuga ko  yize ubuvuzi bw’amatungo ariko akabona ari nta handi hantu yabikoresha.  Nyuma yo kubona amahirwe amukikije iruhande  ngo nibwo yatekereje kugana ‘maison des jeunes’ ngo agerageze amahirwe ye naho  yakura ubushobozi bwo gutangira.

Yishimira ko yahasanze umuryango S.G.O asanga hari amahirwe kuko ufite mu nshingano zawo ibikorwa byo guhugura urubyiruko mu buryo bwo kwihangira imirimo, ndetse bagatanga amahugugurwa ajyanye n’imyuga iciriritse.

Yagize ati “Ubwo nibwo nabashije kubegera nubwo  nisanze arijye  muhungu umwe rukumbi mu bakobwa. Gusa , nta pfunwe binteye kwicarana n’abakobwa mu birebana no kuboha ndetse n’iyindi myuga urubyiruko rubona ko ikwiye guharirwa abakobwa.”

Arishimira ko  hari aho bavuye naho bageze. Ati “ Tumaze gutera intambwe ishimishije. Ubu ngeze ku rwego nitabira imurikabikorwa ku rwego rw’igihugu cyangwa ku rwego  mpuzamahanga kandi ibikorwa nkora bigenda bitera imbere umunsi ku munsi.”

Asaba urubyiruko rukitinya ko nta  mwuga ugenewe igitsina kuko nkuko abishimangira ngo yatangiye gukora uyu mwuga  bagenzi be bamuseka  ko ari umwuga wa gikobwa none ageze ahashimishije mu kwiteza imbere ndetse ngo yabashije gushinga  irindi shami  ry’abamurika imideri aho akora nk’umuhanga mu guhanga ( disagn), akaba ari muri ubwo buryo yahisemo gufasha urubyiruko rumugana.

Umutoniwayesu Rachel, ashimira umuryango  S.G.O  kuko wamuhuguye. Yagize ati “ mbere  twabaga mu ngo, nta kindi dukora, nta ntego y’ubuzima, ari ugutegereza guhahirwa n’abagabo, nta kindi gitekerezo, ariko twaje guhuzwa n’umuryango badushyira hamwe, baraduhugura ku bintu birebana n’ihohoterwa rikorerwa abagore (kenshi ntitwamenyaga iryo ari ryo), byatumye twisobanukirwa, baduhugura ku iterambere ry’umugore, badukangurira kwizigamira. Kuri ubu, duhereye ku biceri bibiri by’ijana dutanga buri cyumweru, ubu dufite amafaranga arenga ibihumbi 100 kuri konti twafunguje muri Sacco.”

Yishimira amahugurwa babonye yo gukora ibikoresho by’isuku by’abagore Cotex  kuko ngo asanga kumenya kubikora ari ibintu by’agahebuzo.

Ati “ Nubwo tubikoresha intoki,  dufite intumbero yo kuzajya dukoresha imashini, kandi tuzagera ku ruganda.”

Akangurira abagore gutinyuka  agira ati “ Abagore baba bafite impano bakazicarana bareke  kwisuzugura ahubwo bakwiye kwisunga abandi kuko nta mugabo umwe. Iyo mwishyize hamwe mubasha kugera ku bintu byinshi. Ndakangurira abagore  bose gushaka amatsinda, bakishyira hamwe bakizigama.”

Zayirwanda Clementine, afite imyaka 20, yabashije kwiga ikiciro cya mbere cy’amashuri yisumbuye ariko kubera impamvu zimugoye ntiyabasha gukomeza. Ashimira umuryango uburyo  wabafashije kwiga kwiteza imbere muri rusange nk’urubyiruko ngo abasha kudoda akabona amafaranga.

Aba muri  Koperative Ejoheza aho buri munyamuryango  abona ibiraka bitandukanye byaba ibyo kuboha  ibikapu, amasakoshi y’abadamu, ibikapu byo mu mugongo kandi bakaba babona isoko.

Kimwe na bagenzi be afite intumbero yo gukomeza  kwiteza imbere akazagera ku ruganda.

Igihozo Deborah, afite imyaka 22, ntiyabashije gukomeza amashuri ye nyuma yo gutwara inda itateganyijwe agahita abura ubushobozi. Ashima umuryango uburyo wamukuye mu bwihebe, agira ati “ Uyu muryango watubereye igisubizo kuko baduha amahugurwa mu myuga.  Ndashima S.G.O  kubera ko jyewe nko ku ruhare rw’itsinda Ubumwe yadukuye mu bwihebe bitewe n’ubuzima bubi  twari twaranyuzemo ariko baduhaye amahugurwa atugaruramo ubumuntu, nyuma badushyira mu mwuga, twiga kudoda, yaba imyenda, yaba ibikapu, sinkeneye gusaba umuntu uwo ari we wese, ndadoda, nkagurisha, nkabona amafaranga. Nishimira ko bamfashe ndi umukobwa wabyaye, nibazaga uburyo nzarera umwana, uburyo nzabaho ariko ubu nta kibazo nkigira kuko ubu mbasha kwifasha nkafasha n’umwana wanjye.”

Umuryango S.G.O utewe ishema  n’imiyoborere myiza y’u Rwanda

Umuyobozi wa S.G.O Nyinawumuntu avuga ko yanyuzwe n’imiyoborere myiza y’u Rwanda irangajwe imbere na Nyakubahwa Perezida wa Repubulika Paul Kagame.

Yagize ati “ Dufite imiyoborere myiza niyo yatumye  numva nava mu mahanga.  Kera,  imyumvire ya bamwe mu banyarwanda hari abibwiraga ko iyo ugiye mu mahanga ariho hari ubuzima ariko ikintu cyangaruye nukubera nanyuzwe n’imiyoborere myiza y’igihugu, iduha agaciro, iduha ijambo, iduha kureba kure  ngo natwe tugire  uruhare mu guhindura ubuzima bw’abandi bagenzi bacu bakiri inyuma, baduha urubuga rwo gutanga umusanzu wacu mu iterambere ry’igihugu.”

Akomeza avuga ko iyo  wahawe urubuga,  ubasha gutekereza uruhare wagira kugira ngo ugire impinduka nziza aho uri.

Ati “Ibyo byose tubikesha imiyoborere myiza kuko nta miyoborere myiza umuntu yirebaho gusa, ukigarukiraho ariko imiyoborere myiza ituma twirenga,  ukareba imbere kandi ukagira uruhare mu gihugu cyawe.  Imiyoborere myiza niyo itumye turi muri iki kigo cya kabuga Yego Center kuko bumvise neza iri yerekwa, bakarishyigikira, bakaduha aho gukorera kugira ngo twegere abagenerwabikorwa.  Icyo ni ikindi kimenyetso cy’imiyoborere myiza.”

Byongeye kandi ashima uburyo  kuri ubu  umugore n’umukobwa bamaze gusobanukirwa neza ko nabo bafite uruhare  mu iterambere ry’igihugu.

Ati “ Mbere washoboraga guhugura bigasigara mu mahugurwa ariko ntibikiri amahugurwa kuko bishyirwa mu ngiro kubera ko biva hejuru kuri ya miyoborere myiza imanuka ikagera hasi, ku buryo niyo uhugura umuntu ikintu aracyumva.  Ikindi kintu cy’amahirwe  ni uko urubyiruko, abagore muri iki gihugu bafite amahirwe adasanzwe. Ayo ni amahirwe dukesha ubuyobozi bwiza, ubuyobozi bwiza butariho amahirwe yajya aza akikubirwa na bamwe ariko ni amahirwe ya bose.”

Kugeza ubu uyu muryango urateganya gukomeza gukora ibi bikorwa bigamije guhindura imibereho n’iterambere ry’umwana, urubyiruko n’umugore, ndetse no kurushaho gufasha benshi bashoboka wagurira ibikorwa byawo aho bikenewe mu duce dutandukanye tw’igihugu, nubwo hari ubwo amikoro atabemerera gufasha ababagana bose.

‘Made in Rwanda’ ni  imwe mu nkingi zitajegejega Guverinoma y’u Rwanda ishyize imbere, ngo ishakire igisubizo ibibazo byugarije ubukungu, cyane cyane ibiterwa n’icyuho kiboneka hagati y’ibyoherezwa mu mahanga n’ibitumizwayo, ni muri urwo rwego ubuyobozi bwa S.G.O buhamagarira Abanyarwanda  gukunda no guteza imbere iby’iwacu  kuko nkuko babishimangira ngo igihe ni iki  nk’Abanyarwanda  ko bagira  uruhare mu gukunda no mu guteza imbere iby’iwabo.

Nyinawumuntu yagize ati “ Ntabwo twakunda cyangwa ngo duteze imbere iby’ahandi tutazi dusize iby’iwacu tuzi, byose rero bitangirana no kumenya. Kumenya kwacu gukwiriye gutangirana no kwimenya ubwacu nk’Abanyarwanda, kumenya iby’iwacu, tukabikunda, maze tukabibyaza umusaruro, maze tukabiteza imbere natwe ubwacu twiteza imbere. Icyo ngicyo kizaduha kugira bwa budasa kandi ubudasa bwacu ni urundi rufunguzo rwatugeza ku iterambere rirambye.”