21°C , Partly sunny | Kigali-Rwanda

Saloon Workers Union yubahisha abita ku bwiza itanga serivisi zinoze

Yanditswe na Amani Claude

Ku ya Sep 25, 2018 saa 8:29

Sendika ishinzwe ubuvugizi bw’abogoshi babigize umwuga n’abantanga izindi serivisi z’ubwiza nko gusuka, guca inzara n’izindi  (Saloon Workers Union) iributsa abatanga izo serivisi ko ari ab’agaciro, ikaba ikomeza guharanira ko umwuga wabo wakomeza gutera imbere mu Rwanda.

Abanyamuryango bahagarariye abandi

Mu kiganiro n’Imvaho Nshya, Umunyabanga Mukuru w’iyi Sendika Rushigajiki Haruna, yavuze ko abatanga serivisi z’ubwiza bakora akazi keza kuko nta muntu n’umwe uba udakeneye gukorerwa isuku ku mubiri.

Rushigajiki yagize ati: “Abantu usanga badaha agaciro umwuga wacu kandi tugira uruhare runini mu gusa neza kwabo. Ni yo mpamvu twafashe ikemezo cyo kwibumbira hamwe, dushyiraho urugaga rwacu buri wese yibonamo mu rwego rwo kwihesha agaciro.”

RUSHIGAJIKI Haruna Umunyamabanga mukuru w’ihuriro ry’abogoshi mu Rwanda

Yakomeje avuga ko iki gitekerezo cyaje mu rwego rwo guca akajagari, katerwaga n’abakoresha batangaga akazi bakirukana uwo bashatse nta n’impamvu ifatika yatuma umukozi yirukanwa, rimwe na rimwe ugasanga ntibabishyuye ibirarane by’imishahara yabo.

Zimwe mu ntego zizabafasha kugera kure no gutera imbere zirimo gutanga serivisi nziza, kunoza imikorere no gukora kinyamwuga kuko ngo bizabubahisha ndetse bikazamura ikizere mu kazi kabo ka buri munsi.

Rushigajiki yavuze ko ubu basabye ubufasha Ikigo k’Igihugu gishizwe ubumenyi ngiro (WDA), ko cyakoresha ibizamini abatanga serivisi z’ubwiza bigiye ku murimo bafite uburambe mu kazi, kugira ngo na bo bahabwe impamyabushobozi.

WDA irimo guhugura abagera kuri 26 yahaye  impamyabushobozi (certificats) za A2 kugira ngo abe ari bo bazafasha mu gukoresha ibizamini abatarabona impamyabushobozi ariko barambye mu mwuga.

Kugeza ubu Saloon Workers Union igizwe n’abanyamuryango 5,000 bakorera mu nzu z’ubwiza (Saloons) zitandukanye  ariko biteze ko abanyamuryango bazakomeza kwiyongera kuko umubare w’abakora umwuga wo kogosha mu gihugu hose ugera ku 50,000.

Iyi Sendika ikomeje gukora ubuvugizi bugamije gufasha abatanga serivisi z’ubwiza mu rugendo rwo kwigira binyuze mu gusaba Ikigo cy’Ubwiteganyirize mu Rwanda (RSSB) kugira ngo kibashyire mu mubare w’abagenerwa  ubwiteganyirize bw’abakozi.

Ikindi ni ugushyiraho uburyo buhamye bwo gukorana n’amabanki mu kurandura ubukene bwugarije bamwe mu bogoshi, abakora imisatsi n’abatunganya inzara nk’uko biri muri gahunda z’iterambere zigenewe Abanyarwanda.

Abagize Sendika bakomeje guharanira ko  n’abakoresha bajya babaha amasezerano y’imikorere (contract) kugira ngo byibura bage bakora bumva batekanye kandi bafite ikerekezo k’ejo hazaza.

Mu myaka 5 iri imbere barifuza kuzaba bafite abogoshi b’umwuga bafite ikerekezo kirambye, ku buryo buri wese azajya abaha agaciro bagomba kuko bagira uruhare rukomeye mu gusa neza kw’Abanyarwanda.

Abanyamuryango ba Sendika barashimira Ubuyobozi Bukuru bw’Igihugu  budahwema kubereka ko bubari inyuma,  Ikigo k’Igihugu gitsura ubuziranenge (RSB) ndetse na WDA bidahwema kubagenera inama n’ubundi bufasha.

Bahamya ko byababera byiza cyane habonetse ikigo gitanga amahurwa ku mitangire ya serivisi nziza  kikajya gitanga amahugurwa ku bakora uyu mwuga, kuko byarushaho kubafasha gutanga serivisi zinogeye abakiriya kandi zigezweho ku rwego mpuzamahanga.