18°C , Partly cloudy | Kigali-Rwanda

Saint André Hotel Kabgayi yahinduye isura y’Umujyi wa Muhanga

Yanditswe na Amani Claude

Ku ya Jul 11, 2018 saa 5:47

Hoteli yitiriwe Mutagatifu Andereya (Saint André Hotel) ya Diyosezi Gatolika ya Kabgayi ni imwe muri hoteli ebyiri z’inyenyeri eshatu zubatswe kijyambere ku buryo zahinduye isura y’Umujyi wa Muhanga nk’umwe mu migi yunganira Umujyi wa Kigali.

Hoteli yitiriwe Mutagatifu Andereya (Saint André Hotel) ya Diyosezi Gatolika ya Kabgayi

Ubwiza bw’iyi Hoteli bugaragarira buri wese ukinjira mu mugi ndetse abayigannye bayibarira n’abandi kuko bisanga ahantu hatuje, hari umwuka mwiza bitewe n’ubusitani ndetse na serivisi nziza utasanga ahandi.

Iyi hoteli y’Abihayimana yatangiye mu mwaka wa 2001, itanga serivisi zose zo ku rwego rwa hoteli y’inyenyeri eshatu zirimo amafunguro n’ibinyobwa biteguranwa ubuhanga n’ubunyamwuga, ibyumba by’amacumbi bifite isuku kandi bihendutse, ibyumba by’inama binyuranye bitewe n’ingano n’ubushobozi bw’inzego zibyifuza, umwihariko w’Isoko rya Kijyambere LUMINA Kabgayi, n’izindi serivisi zigera no ku batuye hanze y’umugi.

Mu kiganiro Imvaho Nshya yagiranye n’Umuyobozi wa  Hoteli St. André Padiri Nzasingizimana, yashimangiye ko iyi hoteli igaragaza iterambere ry’urwego rw’amahoteli mu Mujyi wa Muhanga, ndetse ko ari igihamya cy’uko ntawe ukwiye gushidikanya ku iterambere ry’ibyagezweho mu Rwanda.

Umuyobozi wa Hoteli St André Padiri Nzasingizimana

Ati “Nk’ubu uyu munsi aha muri Muhanga hari amahoteli abiri ari ku rwego rw’inyenyeri eshatu harimo iyi hoteli Saint André n’indi imwe […] mbere ya Jenoside yakorewe Abatutsi nta hoteli n’imwe yahabaga, habaga inzu nk’ebyiri zacumbikiraga abantu ahandi hari utubari abantu bafatiragamo amafunguro. Uyu munsi rero kuba tugeze ku rwego rwo kubona amahoteli muri Muhanga ni intambwe ikomeye.”

Iyi ni inyubako ya Hoteli Igaragarira buri wese ukigera mu mujyi wa Muhanga

Ibyumba byo kuraramo biba bifite isuku kandi biteguranywe ubuhanga

Mu gihe Hotel St. André ikomeje kongera umubare w’abakiriya, hari gahunda yo kwagura serivisi itanga kuko ababagana bakomeza kubungura ibitekerezo bya serivisi nshya zarushaho kubanyura.

Hari n’ibyumba by’inama bitandukanye

Mu isoko rya Kijyambere rya Hoteli St André habonekamo ibiribwa, ibinyobwa n’amavuta n’ibindi bicuruzwa bitandukanye

Harateganywa kongera inyubako z’amacumbi mu Mujyi wa Muhanga kugira ngo zijye zakira abagenderera Akarere bakeneye ibindi byumba byo kuraramo hanze ya Hoteli; hazongerwa n’ibyumba byakira inama, iby’imikino n’imyidagaduro.

Hoteli St Andre yahawe igihembo na RDB kubera serivisi zinoze itanga

Padiri Nzasingizimana kandi avuga ko banyuzwe no kwisanga mu gace Guverinoma y’u Rwanda yashyize mu migi igomba kuzamurwa ku rwego rumwe n’Umujyi wa Kigali kuko bibongerera amahirwe yo kwagura ubucuruzi kubera umubare w’abakiriya babagana uziyongera.