19°C , Mostly cloudy | Kigali-Rwanda
Rwemarika Felicite

Rwemalika yatorewe kuba muri Komite Mpuzamahanga Olempike

Yanditswe na NKOMEJE GUILLAUME

Ku ya 11-10-2018 saa 14:17:08

Rwemalika Félicité yabaye umwe mu banyamuryango 9 bashya batorewe kuba muri Komite mpuzamahanga Olempike, akaba yemejwe mu nama y’Inteko rusange yateraniye i Buenos Aires muri Argentine.

Uyu munyarwandakazi, usanzwe ari Visi Perezida wa mbere wa Komite Olempike y’u Rwanda, wari yatoranyijwe nk’umukadinda wigenga n’Akanama Nshingwabikorwa ka Komite Olimpike, hamwe nabo batorewe kuba muri iyi komite, bafite inshingano zo gutegura neza imikino Olempike izabera i Tokyo mu Buyapani kuva tariki 24 Nyakanga kugera 9 Kanama 2020.

Rwemalika wigeze kwiyamamariza kuyobora ishyirahamwe ry’umupira w’amaguru mu Rwanda “FERWAFA” ariko ntabashe gutsinda ni umwe mu bagore bagize uruhare runini mu guteza imbere uburinganire by’umwihariko muri Siporo y’u Rwanda.

Muri aba banyamuryango 9 bashya batorewe kujya muri Komite Mpuzamahanga Olimpike, 5 ni abigenga ku giti cyabo, barimo 3 b’abagore naho 2 ni abagabo. Uretse Rwemalika Felicite abandi ni Gudzineviciute Daina, perezida wa Komite Olempike ya Lithuania, Camilo Pérez López Moreira (Paraguay), Giovanni Malago (u Butaliyani).

Haza kandi Asghari Samira (Afghanistan), Frederick Blick William (Uganda), HRH Prince Jigyel Ugyen Wangchuck (Bhutan), Watanabe Morinari (u Buyapani) ndetse na Parsons Andrew (Brazil).

Muri iyi nama y’inteko rusange ya Komite mpuzamahanga Olempike yateranaga ku nshuro ya 133, kuba yemeje aba banyamuryango 9 bashya, byatumye bagera ku banyamuryango 106.

TANGA IGITEKEREZO

Leave a Reply

Your email address will not be published. Required fields are marked *