Rwanda: Volkswagen yatangiye gukodesha imodoka hakoreshejwe telefone

Yanditswe na Mutungirehe Samuel

Ku ya 01-03-2019 saa 15:49:21

Ukoresheje ikoranabuhanga rya telefone ra VW Move, ushobora guhamagara imodoka ya Volkswagen ikagusanga aho uri muri Kigali, ikagutwara.

Uru ruganda rw’Abadage rwa Volkswagen usobanura ko VW Move igamije gufasha abantu bari mu Mujyi wa Kigali kubona imodoka bitabasabye kujya gutega.

Umuyobozi Mukuru wa VolkswagenW ishami ry’u Rwanda, Rugwizangoga Michealla avuga ko intego ari ugufasha u Rwanda kuba igicumbi cy’ikoranabuhanga.

Ubwo ubu buryo bwatangizwaga ku mugaragaro, kuwa 1 Werurwe 2019, Rugwizangoga yavuze ko hari abantu batangiye kubukoresha.

Ati “Twari tugamije umubare muto w’abantu ariko mu gihe gito gishize twabonye abarenga ibihumbi 12 bashyize muri terefone zabo uburyo butuma babona imodoka aho bari (VW Move App), muri bo ibihumbi 10 barangije kugaragaza ubushake bwabo.”

Yavuze ko ubwo bwitabire bwabaye bwinshi bwatumye batekereza kongera umubare w’imodoka zizakora muri iyo gahunda kuko batangiranye n’imodoka 25 ku buryo zizagera kuri 55 mu byumweru bike biri imbere.

Yakomeje agira inama Abanyarwanda ko muri iki gihe aho ibintu bigeze atari ukwihutira kugura imodoka ngo uge mu mihangayiko yo kuyikoresha yapfuye, ubwishingizi n’ibindi.

Yashimangiye ko hagezweho gukoresha imodoka igihe uyikeneye, ukayibona ku gihe, amasaha yose y’umunsi kandi wifashishije ikoranabuhanga rya terefone ukanishyura bijyanye n’uko wayikoresheje.

Volkswagen imaze amezi 18 ikorera mu Rwanda.

Abakoresha telephone za Android na iOS, ni bo kuri ubu bashobora guhamagara imodoka za Volkswagen ziri hirya no hino muri Kigali ngo zibatwara.

Ubuyobozi bwa Volskwagen bwasobanuye ko iyo ‘app’ ikoresha ikoranabuhanga rya GPS (Global Positioning System) rifasha kubona aho icyo ukeneye giherereye.

Umuyobozi ushinzwe ubucuruzi n’amasoko mu ruganda, Gaju Nadege, yasobanuye ko ku badafite terefone zigezweho zifashisha ikoranabuhanga rya interineti bahamagara imodoka ikabageraho aho bari.

Umuyobozi ushinzwe ubucuruzi mu kigo gitanga izo modoka ku bazikeneye kikanazicunga CFAO, Mugabo Jean Claude, yavuze ko imodoka urwo ruganda ruri gukorera mu Rwanda zihendutse ugereranyije n’izindi z’ubwoko bwose zigurirwa hanze cyangwa mu Rwanda zitarakoreshejwe.

Bamwe mu bashoferi ba VW 57 bamaze guhabwa akazi, mu minsi mike bakazaba biyongereye, biganjemo abanyeshuri abagore n’abandi bazi gukoresha ikoranabuhanga na gutwara (Foto Gisubizo G)

Mu buryo bwo kwishyura, umukiriya uhamagaje imodoka ngo imusange aho ari kugira ngo imugeze aho ashaka kujya, yishyura urugendo yagenze, ku munota umwe akishyura amafaranga make, cyangwa se ku kirometero, bikaba byazamuka bitewe n’umwanya ayikoresheje.

Volkswagen ni uruganda rwashinzwe kuwa 28 Gicurasi 1937, rukaba rufite icyiciro mu Mujyi wa Wolfsburg mu Burengerazuba bw’Umurwa Mukuru w’u Budage, Berlin.

Volkswagen ni ijambo ry’ikidage risobanuye ‘imodoka y’abaturage’, uru ruganda rukaba ari rwo rwaje ku isonga mu gukora imodoka nyinshi ku rwego rw’Isi mu myaka ya 2016 na 2017.

Abakozi barimo guteranya imodoka ya Volkswagen

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.