19°C , Partly cloudy | Kigali-Rwanda
Uwihanganye Jean de Dieu Umunyamabanga wa Leta muri MININFRA ushinzwe ubwikorezi(iburyo) na Minisitiri w’Ibikorwa Ubwikorezi n’Itumanaho muri Tanzania Prof Makame Mnyaa Mbarawa (ibumoso)(Foto Gisubizo)

Rwanda-Tanzania: Hasinywe amasezerano y’iyubakwa ry’umuhanda wa Gari ya moshi

Yanditswe na SEZIBERA ANSELME

Ku ya 10-03-2018 saa 16:07:22

Guverinoma y’u Rwanda ihagarariwe n’Umunyamabanga wa Leta ushinzwe ubwikorezi muri Minisiteri y’ibikorwaremezo Eng Uwihanganye Jean de Dieu na Minisitiri w’Ibikorwa, Ubwikorezi n’Itumanaho muri Tanzania, Prof Makame Mnyaa Mbarawa bashyize umukono ku masezerano yo kubaka umuhanda wa Gari ya moshi uhuza ibihugu byombi.

Uwihanganye Jean de Dieu Umunyamabanga wa Leta muri MININFRA ushinzwe ubwikorezi(iburyo) na Minisitiri w’Ibikorwa Ubwikorezi n’Itumanaho muri Tanzania Prof Makame Mnyaa Mbarawa (ibumoso)(Foto Gisubizo)

Uwo muhango wabereye i Kigali, ejo hashize tariki 9 Werurwe 2018. Eng Uwihanganye Jean de Dieu, avuga ko  habaye inama y’iminsi ibiri hagati y’u Rwanda na Tanzaniya kugira ngo hashyirwe mu bikorwa ibyumvikanyweho n’Abakuru b’ibihugu byombi mu kubaka umuhanda wa Gari ya moshi uturuka Isaka kugera i Kigali, bikazatangira gukorwa bitarenze ukwezi k’Ukwakira 2018.

Atangaza ko inama yabereye i Kigali ije ari iya kabiri ikurikiye iya mbere yabereye muri Tanzaniya aho bemeranyijwe amasezerano y’ubufatanye hagati y’u Rwanda na Tanzaniya y’uburyo uwo mushinga uzashyirwa mu bikorwa.

Eng. Uwihanganye asobanura ko aya masezerano ari ingenzi cyane ku buryo azaba agaragaza uruhare rwa buri gihugu mu kubaka uwo muhanda.

Agira ati: “Igihugu cy’u Rwanda gifitemo ibilometero 150 kuri uwo muhanda wa gari ya moshi mu gihe Tanzaniya ifiteho ibilometero 350 kuko uwo muhanda wose uzaba ugizwe n’ibilometero hafi 500 by’uburebure.

Ayo masezerano agaragaza uruhare rwa buri wese. Twashyizeho itsinda ry’abatekinisiye rizaba rihagarariye ibihugu byombi, n’irindi rizaba rigizwe n’Abanyamabanga bahoraho muri Minisiteri z’impande zombi kugira ngo bage bageza raporo kuri ba Minisitiri babifite mu nshingano”.

Uwihanganye akomeza avuga ko ikindi kizweho ari uguhindura ibirebana n’inyigo yari yatanzwe mbere hakibandwa mu bizaba bifitiye inyungu abaturage b’ibihugu byombi. Aho mu nyigo ya mbere gari ya moshi yari yateganyirijwe kugendera ku muvuduko wa kilometero 80 ku isaha mu gihe itwaye imizigo, ndetse no ku muvuduko wa kilometero 120 ku isaha igihe itwaye abantu.

Yongeraho ko impande zombi zasuzumye zigasanga  kugira ngo izo gari ya moshi zitange umusaruro ku baturage b’ibihugu byombi hagomba guhinduka uwo muvuduko aho u Rwanda na Tanzaniya byemeranyije ko iyo gari ya moshi yajya ifata umuvuduko wa kilometero 160 ku isaha mu gihe itwaye abagenzi, no ku muvuduko wa kilometero  120 mu gihe itwaye ibintu kuko bizarushaho gutuma ibicuruzwa byihuta.

Avuga ko kugeza ubu abantu bakoresha imodoka berekeza Dar es Salaam bakoresha  hagati y’iminsi 6 na 7 bikumvikana ko ikwiye kugabanywa mu gihe hakoreshejwe gari ya moshi abantu bagakoresha amasaha abarirwa muri 14 na 16 bavana ibintu byabo Dar es Salaam babizana i Kigali.

Avuga ko indi mpinduka yabayeho ari uko iyo Gari ya moshi itazajya ikoresha Mazutu nk’uko byari byaremeranyijweho ahubwo ikazajya itwarwa n’amashanyarazi, ibyo bikazaba byanogejwe mbere y’uko ukwezi k’Ukwakira kurangira ngo hashyirweho ibuye ry’ifatizo kandi Ikigo gishinzwe iterambere ry’ubwikorezi mu Rwanda, RTDA kikaba cyahawe izo nshingano zo guhagararira u Rwanda.

Akomeza avuga ko uwo muhanda, uzaca ku Kibuga k’indege cya Bugesera. Inyigo yari yakozwe uwo muhanda wose wasabaga miliyari 2 na Miliyoni 500 z’amadolari, aho miliyari 1 na Miliyoni 300 z’amadolari azatangwa na Tanzaniya, n’andi miliyari 1 na Miliyoni 200 z’amadolari akazatangwa n’u Rwanda, gusa ngo ashobora guhindukaho gato kuko hari ibyahindutseho bizagaragara nyuma y’amezi 2.

Minisitiri w’Ibikorwa, Ubwikorezi n’Itumanaho muri Tanzania, Prof Makame Mnyaa Mbarawa yashimye uburyo amasezerano ari kugenda hagati y’impande zombi kandi afite ikizere ko ibizava muri ubwo bufatanye bizagirira akamaro abaturage ba Tanzaniya n’u Rwanda kandi uwo mushinga ukazagenda wagurwa ukomereza no mu bindi bihugu.

 

 

 

 

 

 

TANGA IGITEKEREZO

Leave a Reply

Be the First to Comment!

avatar