18°C , Mostly cloudy | Kigali-Rwanda

Rwanda Nziza, urugendo mbarankuru ruzagaragaza ibyiza nyaburanga

Yanditswe na GISUBIZO Gentil M.

Ku ya 24-11-2020 saa 00:42:02
Ifoto igaragaza ubwiza bwa Canopy Walk iherereye muri pariki ya Nyungwe ku mugoroba

Rwanda Nziza ni urugendo ruzamaramo amezi atandatu ruhuriwemo n’abafotozi bagera ku 100 rwateguwe hagamijwe kugaragaza ubwiza bw’igihugu binyuze mu mafoto n’amashusho ku banyarwanda bari mu gihugu imbere n’abari mu mahanga bagiheruka kera ndetse bikaba n’umwanya mwiza ku banyamahanga bifuza gusura u Rwanda.

Mu kiganiro na Ishimwe Innocent umuyobozi wa “Image Rwanda” irimo gutegura iki gikorwa  yabwiye Imvaho Nshya ko ari umwanya mwiza wo kumurikira abatuye igihugu ubwiza bwacyo, dore ko ari bake babona cyangwa bafite ubushobozi bwo gusura hamwe mu bwiza nyaburanga igihugu gifite, ikindi iki gikorwa kigamije ni ukureshya ba mukerarugendo.

Ishimwe yagize ati : “Uru rugendo twise Rwanda Nziza ruzifashisha abafotozi n’abakora amashusho kugira ngo bereke u Rwanda Abanyarwanda ndetse n’Isi yose, ibi kandi bizafasha kongera kureshya ba mukerarugendo ko hari byinshi byo gusura mu Rwanda ndetse no gukuza umuco wo gusura iby’iwacu mu banyarwanda. Iyi gahunda izafasha mu kuzahura urwego rw’ubukerarugendo, dore ko icyorezo cya COVID-19 cyarusubije inyuma ku buryo bw’umwihariko .”

Uru rugendo ruzakorwa ku bufatanye n’Urwego rw’Igihugu rw’Iterambere (RDB) hamwe na gahunda ya “Tembere u Rwanda”, Rwanda Nziza izakorwa n’itsinda ry’abantu barenga 100, harimo abafotora, abafata amashusho, abashinzwe kubungabunga umurage n’amateka, abashakashatsi, abanyamateka, abayobora ba mukerarugendo, ndetse n’abakora ibijyanye no kubungabunga ibidukikije.

Rwanda Nziza izaba ari rwo rugendo rwo muri ubu bwoko rwa mbere runini mu Rwanda, aho ruzagera mu turere 30 twose tw’igihugu, iyi gahunda yatangijwe na “Image Rwanda” ndetse n’abanyamuryango bayo, nyuma yo kubona ko hakenewe ibikorwa bituma ubukerarugendo bwongera kuzamuka, kandi amashusho akaba ari bumwe mu buryo bwizewe ibi byakorwamo.

Biteganyijwe ko uru rugendo ruzakorwa mu byiciro 2 by’ingenzi aho harimo ikiciro cyo gufata amashusho kizatangira mu Kuboza 2020 kugeza muri Gicurasi 2021, n’ikiciro cya nyuma cyo kuyatunganya ndetse no kuyatangaza kizakomerezaho kugera mu mpera za 2021.

Amashusho azaba yakusanyijwe mu uru rugendo azagaragarizwa mu mamurika, ndetse hanifashishwe tekinoroji ya “Virtual Reality” haba mu Rwanda ndetse no hanze yarwo. Nyuma yaho, hazakorwa igitabo kizitwa “Rwanda Nziza” kizaba gikubiyemo ibyiza bitatse buri karere k’u Rwanda. Aya mashusho ndetse azamurikirwa kandi acururizwe ku rubuga rwa Image Rwanda (www.image.rw) rusanzwe rucuruza ibihangano by’abanyarwanda.

Image Rwanda ni ihuriro ry’abafotora n’abakora amashusho ndetse n’ibindi bijyanye nabyo. Ikaba kandi ifite urubuga rucururizwaho ibi bikorwa (Stock Photo) rufite amafoto arenga 200.000 n’amasaha arenga 3.000 y’amashusho.

Image Rwanda yashinzwe na Ishimwe Innocent na Habimana Jean Luc kuri ubu ikaba ifite abanyamuryango barenga 100 barimo abafotora, abafata  amashusho n’ abashushanya ku buryo bw’ikoranabuhanga.

Amashusho ya “Image Rwanda” amaze gukoreshwa n’imbuga zinyuranye nini ku Isi, harimo nka Paris St Germain, “Visit Rwanda” n’ahandi.

Amafoto afite umwihariko mu ifatwa n’itunganywa ryayo

Hazafatwa amafoto agaragaza ahantu nyaburanga hatandukanye mu gihugu

Ifoto igaragaza ubwiza bwa KCC mu Ijoro

Ifoto igaragaza ubwiza bw’ibiyaga by’u Rwanda

Ifoto y’Agacurama imwe mu nyaaswa nto ziboneka mu Rwanda

Image Rwanda ikora ibikorwa bijyanye no kugaragaza ubwiza bw’igihugu binyuze mu mafoto

Imwe mu ifoto y’inyoni igaragara mu pariki zo mu Rwanda

Inkura imwe mu nyamaswa eshanu zikomeye zibarizwa muri Pariki y’Igihugu y’Akagera

Iyi foto iragaragaza ubwiza bw’Umugi wa Kigali

Iyi ni imwe mu mafoto yafotowe umwana w’ingagi zo mu birunga zinakurura ba mukerarugendo

Ni bake mu banyarwanda bazi ubwiza bw’ibiyaga n’ibirunga biri mu gihugu

Rimwe na rimwe hifashishwa Indege mu gufata amafoto y’ibikombe n’ibiyaga

Umwanditsi:

GISUBIZO Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.