19°C , Mostly cloudy | Kigali-Rwanda

Rwanda-DRC: Ubucuruzi n’umubano byifashe neza – Amb. Nduhungirehe

Yanditswe na Rutayisire Emile

Ku ya 24-07-2019 saa 15:31:22
Umwe mu mipaka ihuza u Rwanda na Repubulika Iharanira Demokarasi ya Kongo inyuraho abantu benshi

Nk’uko bitangazwa na Amb. Nduhungirehe Olivier, Umunyamabanga wa Leta muri Minisiteri y’Ububanyi n’Amahanga n’Ubutwererane, ubucuruzi hagati y’u Rwanda na Repubulika Iharanira Demokarasi ya Kongo bwifashe neza kubera ko hari ubushake bwa Politiki hagati y’ibihugu byombi, hakaba imipaka yoroshya ubucuruzi n’ingendo z’indege za RwandAir.

Amb. Nduhungirehe mu kiganiro kihariye yagiranye n’Imvaho Nshya, yavuze ko umupaka uri hagati ya Rubavu na Goma ari umwe mu mipaka ku Isi inyurwaho n’abantu benshi ku munsi.

Ati “Uyu mupaka unyurwaho n’abantu bagera ku bihumbi mirongo irindwi ku munsi kandi n’ubucuruzi bwambukiranya imipaka nabwo bwateye imbere ku buryo hari ibikorwa by’ubucuruzi bigaragara, aho ubucuruzi u Rwanda rukorera muri Repubulika Iharanira Demokarasi ya Kongo bugenda bwiyongera ku buryo u Rwanda rwageze ku bohereza ibicuruzwa byavuye kuri miriyoni z’amadorari 13 n’igice mu mwaka wa 2010 zigera kuri miriyoni 120 z’amadorari mu mwaka ushize wa 2018”.

Akomeza avuga ko ibitumizwa muri Repubulika Iharanira Demokarasi ya Kongo byavuye kuri miriyoni z’amadorari 5,6 mu mwaka wa 2010 bigera kuri miriyoni 9,1 z’amadorari mu mwaka wa 2018.

Amb. Nduhungirehe asanga ubucuruzi buzakomeza gutera imbere hagati ya Repubulika Iharanira Demokarasi ya Kongo n’u Rwanda kuko Sosiyete y’indege y’u Rwanda, RwandAir, yatangiye ingendo zo mu kirere guhera tariki ya 17 Mata 2019, ijya mu murwa mukuru wa kiriya gihugu, Kinshasa, inshuro eshatu mu cyumweru. Uyu mugi utuwe n’abaturage bagera kuri miriyoni 14 bakaba ari isoko ryiza ku Rwanda.

Ikindi ni uko tariki ya 25 Mata 2019, Abaminisitiri b’Ubucuruzi b’Ibihugu byombi bahuriye Kigali basuzumira hamwe amasezerano yashyizweho umukono mu 2016 ku bucuruzi bwambukiranya imipaka hagati y’u Rwanda na Repubulika Iharanira Demokarasi ya Kongo, bakaba bateganya kongera guhura mu mezi ane kugira ngo bongere babiganireho.

U Rwanda kandi rwiyemeje gushyira bwa mbere i Kinshasa muri Republika iharanira Demokarasi ya Kongo, ikigo kizajya gihurizwamo ibikorerwa mu Rwanda, kugira ngo byegerezwe ababikeneye muri icyo gihugu.

Abagize urugaga rw’abikorera muri DR Congo barimo na Perezida w’uru rugaga bahuriza ku kuba u Rwanda rufite ibisubizo by’ibibazo abikorera bo muri icyo gihugu bafite, dore ko bemeranyije gutegura byihutirwa amasezerano y’imikoranire yitezweho kwihutisha ubucuruzi ku bihugu byombi.

Ku ruhande rw’abikorera bo mu Rwanda, Sagahutu Aimable, umucuruzi, avuga ko abikorera bafite inyungu mu gukorana n’abikorera bo muri Republika iharanira demokarasi ya Kongo. Agira ati “Ikigo kizashyirwa i Kinshasa kikajya gihurizwamo ibikorerwa mu Rwanda kizadufasha kuko ibikorerwa mu Rwanda bizamenyekana bitume tubasha kugurisha no ku bandi baturuka no mu bindi bihugu bituranye na DRC birimo nka Congo Brazaville”.

Minisitiri w’Ubucuruzi n’Inganda Soraya Hakuziyaremye, agaragaza ko hagiye kongerwa ingufu mu bucuruzi bwambukiranya imipaka busanzwe bukorwa hagati y’u Rwanda na Republika iharanira demokarasi ya Kongo kubera ko n’umubano w’u Rwanda na kiriya gihugu wifashe neza.

Umwe mu mipaka ihuza u Rwanda na Repubulika Iharanira Demokarasi ya Kongo inyuraho abantu benshi

Tanga Igitekerezo

Email yanyu ntigaragazwa ku rubuga. Amazina na Email ni ngombwa.