25°C , Mostly cloudy | Kigali-Rwanda

Rwanda Day 2019 igaragaje umusaruro mu bihe bya COVID-19

Yanditswe na NTAWITONDA JEAN CLAUDE

Ku ya 20-05-2020 saa 16:27:07
Fabrice Goffin ni Umubirigi washinze akaba n'Umuyobozi wa ZoraBots, ikigo gikora za robots

Abanyarwanda baba mu Rwanda, ababa mu mahanga n’inshuti z’u Rwanda bitabiriye “Rwanda Day” mu Kwakira 2019 yabereye i Bonn mu Budage, ntibazibagirwa uburyo yaranzwe n’udushya twinshi, cyane cyane ibiganiro byaranze n’akanyamuneza no gushira urukumbuzi mu bari bamaze igihe kinini badaherukanye.

Fabrice Goffin ni Umubiligi akaba umwe mu  nshuti z’u Rwanda, witabiriye amaze amezi ane arukoraho ubushakashatsi. Yabonye amahirwe yo kuvuga akari ku mutima, agaragaza n’uburyo yakunze cyane u Rwanda ku buryo yifuza no kurusura no kurushoramo imari.

Ni we washinze akaba n’Umuyobozi w’Ikigo mpuzamahanga ZoraBots gikora robots zifashishwa mu mirimo intandukanye mu Buyapani, u Bushinwa, Leta Zunze Ubumwe z’Amerika (USA), Amerika y’Epfo n’ahandi.

Yabonye amahirwe yo guhura na Perezida wa Repulika y’u Rwanda Paul Kagame, bagirana ikiganiro cyabaye urufunguzo rwo kugeza Ikigo ke muri Afurika no gukorera mu Rwanda by’umwihariko.

Uwo munsi ni bwo Fabrice Goffin yahishuye uburyo yakunze u Rwanda n’Abanyarwanda bitewe n’amakuru yari amaze kurumenyaho ndetse n’uburyo yiboneye uko Abanyarwanda bishimye.

Ati: “Nzasura u Rwanda mu kwezi gutaha kandi mbitegerezanyije amatsiko menshi.”

Perezida Kagame yaramusubije ati: “Urakoze cyane ndagutegereje.”

Kubera ko Perezida Kagame yari amaze akanya gato yemereye tike y’indege bamwe mu bifuzaga gusura u Rwanda, Fabrice Goffin na we yunzemo, asa n’utebya, ati: “ese nange ushobora kumpa tike?

Byasekeje Umukuru w’Igihugu, na we amusubiza agira ati: “Nuzana uruganda rwa robots zawe mu Rwanda nzaguha itike.”

Bidaciye Kera Perezida Kagame yatumiye Fabrice Goffin, amwemerera kumufasha mu rugendo rwo gutangiza ishami rya ZoraBots muri Afurika, ndetse bihita biba mu gihe gito cyane.

Fabrice ati: “Ubwo twasuraga u Rwanda twahuye n’abayobozi mu nzego zitandukanye, harimo na Minisitiri w’Ikoranabuhanga na Inovasiyo Paola Ingabire. Ibiganiro twagiranye byageze ku rwego rwo gushinga ZoraRobots-Africa; byashyizwe mu ngiro mu munsi umwe gusa, ku buryo ubu dufite ibiro n’aho twerekanira robots zacu.

Robots za ZoraBots zatangiye gufasha u Rwanda mu buvuzi bwa COVID-19

Ku wa Kabiri tariki 19 Gicurasi, ni bwo u Rwanda rwakiriye ku mugaragaro robots eshanu zatangiye kwifashishwa mu buvuzi bw’icyorezo cya COVID-19, by’umwihariko mu gupima umuriro, gukurikirana abarwaye no kubika amakuru yabo.

Izo robo zakozwe na ZoraBots ya Fabrice Goffin, zifite ubushobozi bwo gupima abantu bari hagati ya 50 na 150 mu munota, ubwo kugeza amafunguro n’imiti mu byumba by’abarwayi, no gufata amakuru zigahita ziyamenyesha abaganga bari ku kazi ku bintu byose bidasanzwe zitahuye mu byumba by’abarwayi n’ibindi.

Robots zakozwe na ZoraBots ni zo zatangiye kwifashishwa mu buvuzi bwa COVID-19 mu Rwanda

Fabrice Goffin yongeraho ko buri robo ifite ubushobozi bwo gufata igipimo cy’ubushyuhe bw’abantu 20 ingunga imwe, n’ubwo gutahura abatambaye agapfukamunwa ikabibutsa kukambara.

Nyuma y’umuhango wo kumurika izo robots, Fabrice Goffins yashimiye Perezida Kagame ubushishozi agira.

Ati: “Biba gake kubona ubufasha bwihuse nk’ubwo yampaye. Ubu turi mu Rwanda, muri Afurika yose, ndetse twatangiye gukorana na UNDP Rwanda mu kuzuza inshingano zayo mu rwego rw’ubuvuzi mu Rwanda.”

Umuyobozi w’Urwego rw’Igihugu rw’Iterambere (RDB) Clare Akamazi, abinyujije kuri twitter, yagize ati: “Uyu ni umusaruro ugaragara wa Rwanda Day… Ikaze mu Rwanda ZoraBots; gukoresha robots bizafasha gukoresha neza igihe, no kugabanya n’ibyago byo kwandura  ku baganga bavura COVID-19.

Ubuyobozi bwa ZoraBots butangaza ko umushinga wo kwifashisha robots mu buvuzi bwa COVID-19 wahereye muri Bubiligi, ari na cyo gihugu Goffin  akomokamo, zishyirwa mu bitaro bitandukanye aho zikomeje gutanga umusaruro ufatika witezwe no kugaragara mu Rwanda.

 

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.