21°C , Mostly cloudy | Kigali-Rwanda

Rwamagana: Imihigo ya 2017/2018 yeshejwe neza

Yanditswe na Amani Claude

Ku ya Aug 7, 2018 saa 3:01

Akarere ka Rwamagana ni ko kabaye aka mbere mu kwesa imihigo y’umwaka wa 2016/2017 kavuye ku mwanya wa 17 kariho mu mwaka wa 2015/2016, bigaragazwa n’imirimo yakozwe igaragarira buri wese utembereye aka karere.

Ibiro by’Intara y’Iburasirazuba biherereye mu mujyi wa Rwamagana

Kugeza ubu Akarere ka Rwamagana gahagaze neza, ndetse kizeye kongera kwitwara neza kuko mu mihigo yahizwe mu mwaka wa 2017/2018 kahereye ku byifuzo by’abaturage, kugira ngo barusheho kuyigiramo uruhare bayibonamo. Iri ni na ryo banga kakoresheje ubwo kazaga ku isonga mu mwaka ushize.

Meya Mbonyumuvunyi Radjab agaragaza imihigo yahizwe n’umusaruro yatanze agira ati: “Twahize imihigo 72 irimo 43 yerekeranye n’ubukungu, 20 irebana n’imibereho myiza y’abaturage n’indi mihigo 9 ijyanye n’imiyoborere myiza. Imihigo y’ubukungu ni yo myinshi kuko Akarere ka Rwamagana kihaye ikerekezo k’iterambere ryihuse kandi nanone iterambere iyo ribonetse n’imibereho myiza y’abaturage biragendana ndetse n’imiyoborere igenda neza iyo abaturage badafite ikibazo kirebana n’iterambere”.

Meya Mbonyumuvunyi Radjab uyobora Akarere ka Rwamagana

Uko imwe mu mihigo ya 2017/2018 yeshejwe

Mu bukungu: Imihigo ya 2017/2018 bashyize ingufu mu buhinzi ku buryo ibihingwa byahinzwe ku butaka buhujwe, uyu muhigo weshejwe ku kigero cya 100,6%.

Ibigori byari guhingwa kuri hegitari 16,401  umuhigo weswa kuri hegitari 16,714, ibishyimbo byari guhingwa kuri hegitari 31,318 umuhigo weswa kuri hegitari 31,382, soya yari guhingwa kuri hegitari 1, 368  umuhigo weswa kuri hegitari 1,378, umuceri wari guhingwa kuri hegitari 654 umuhigo weswa kuri hegitari 654, imyumbati yari guhingwa kuri hegitari 1000 umuhigo weswa kuri hegitari 1000,24.

Imiryango 1,197 itishoboye yorojwe inka binyuze muri gahunda ya Girinka Munyarwanda

Ibihingwa byoherezwa mu mahanga nk’ikawa na byo byongerewe agaciro kandi byezwa uko babiteganyije ku kigereranyo cya 100%.

Mu rwego rwo guhangana n’imihindagurikire y’ikirere, Hubatswe «Valley dam» ya Nyirabidibiri ifite ubushobozi bwo kuhira imyaka ku buso bwa hegitari 125. Hubatswe kandi «Valley dam» ya Rugende izajya yuhira imyaka yo mu gishanga cya Rugende gihuriweho n’uturere twa Rwamagana, Kicukiro na Gasabo. Iki gishanga na cyo kikaba cyaratunganyijwe.

Hagamijwe kongera umusaruro uturuka mu bworozi, inka 6127 zatewe intanga mu gihe bari bateganyije inka 5000, izindi zirakingirwa ku kigereranyo cya 100%. Mu rwego rwo gukwirakwiza ingufu z’amashanyarazi, ingo 4838 zahawe amashanyarazi mu gihe bari bateganyije ingo 4554, hitaweho kandi uburyo bwo gukurura amashanyarazi akomoka ku mirasire y’izuba.

Mu mujyi wa Rwamagana harimo no kubakwa gare y’imodoka zitwara abagenzi, imirimo ikaba yaramaze kurenga ku ijanisha rya 50% ryari ryahizwe mu mwaka wa 2017/2018. Hubatswe umuhanda w’amabuye wa Km 1.1 wo mu mujyi wa Rwamagana n’indi mihanda itandukanye igamije gufasha abahinzi kugeza umusaruro wabo ku isoko harimo umuhanda wa Rwarugaju- Rwimbogo; Nzige –Nyamatete- Karenge; Rugende-Juru; Rugende-Karenge; Bihembe- Isumo; Kadasumbwa-Fumbwe-Gasabo; Muhazi-Gishali-Munyinya; Nyarugari-Nkomangwa.

Imihigo yose yahizwe yo mu bukungu igaragarira mu miturire yo mu mugi no mu cyaro isuku n’isukura, gutwara abantu n’ibintu, guhanga imirimo mu rubyiruko, ikoranabuhanga, ibidukikije n’umutungo kamere yeshejwe 100%.

Mu mibereho myiza y’abaturage: Inzu 40 muri 40 bari bateganyije kubakira abatishoboye barokotse Jenoside yakorewe Abatutsi zaruzuye kandi ba nyirazo bazibamo ndetse n’indi miryango 12 itishoboye yakuwe mu manegeka ituzwa mu mudugudu w’ikitegererezo wa Rwimbogo. Muri gahunda ya Girinka, ubuyobozi bw’Akarere ka Rwamagana bwari bwahize koroza inka imiryango 1000 y’abatishoboye ariko bworoje imiryango 1,197 ingana na 119.7%.

Gahunda zizamura abaturage binyuze mu mishinga nka VUP n’ubudehe yose yeshejwe ku 100%. Iyo ugenzuye mu burezi, ibyumba by’amashuri byarubatswe haba mu mashuri y’imyaka 9 na 12, hubatswe amarerero y’abana bato, ibigo by’amahugurwa, mu buzima bubatse ibigo by’ingoboka by’ubuzima (Poste de sante) no mu buringanire n’iterambere ry’umuryango henshi usanga imihigo yareshejwe ku kigero kiri hejuru ya 100%.

Mu imiyoborere myiza: Mu guteza imbere imikino, umuco n’ubumwe n’ubwiyunge usanga imihigo yareshejwe ku kigero cya 100%: Gahunda ya Ndi Umunyarwanda yeshejwe ku 100% kuko ibiganiro byabereye mu mashuri, mu midugudu, utugari, imirenge ndetse no ku Karere. Abitabiriye itorero babaye 1,551 mu gihe hari hateganyijwe 1241.

Ibibazo by’abaturage byakiriwe byarasubijwe, havugururwa ibiro by’utugari ndetse hubakwa n’Umurenge wa Munyiginya ku buryo imihigo yeshejwe ku 100%. Imanza 132 mu manza 132 zagombaga kurangizwa zose zararangijwe.

Ubuyobozi bw’Akarere ka Rwamagana bufatanyije n’abafatanyabikorwa bako mu iterambere (JADF) bashimira cyane, ntibazahwema gukora ibishoboka byose ngo bihutishe iterambere ry’abaturage mu bijyanye n’ubukungu, imibereho myiza y’abaturage, imiyoborere myiza n’ubutabera.