21°C , Partly cloudy | Kigali-Rwanda

Rwamagana: Ibigo nderabuzima byahawe imashini zipima ababyeyi batwite

Yanditswe na Uwimana Donatha

Ku ya 23-01-2020 saa 14:52:12
Abahawe izi mashini basabwe kuzazifata neza

Mu kigo nderabuzima cya Rwamagana habereye igikorwa cyo gushyikiriza imashini za Echographie 7 (imashini zipima ababyeyi batwite) mu bigo nderabuzima 7 ari byo: Muyumbu, Murambi, Rwamagana, Rubona, Munyaga, Nyagasambu na Karenge. Izi mashini zije ziyongera ku yari isanzwe mu kigo nderabuzima cya Ruhunda.

Izi mashini zipima abagore batwite zizifashishwa mu gupima ababyeyi batwite hagamijwe kurushaho kugabanya umubare w’imfu z’ababyeyi n’abana, zikaba zaraguzwe ku bufatanye bw’Akarere ka Rwamagana n’umushinga wa “Health builders” nk’umufatanyabikorwa.

Itangwa ry’izi mashini zirindwi (7) ryabanjirijwe no guhugura abazazikoresha. Igikorwa nacyo cyakozwe ku bufatanye bw’Akarere ka Rwamagana n’uyu mufatanyabikorwa.

Michel Musirikare uyobora umushinga wa ‘Health builders’ ku rwego rw’igihugu, yashimiye ubuyobozi bw’Akarere ka Rwamagana ku mikoranire myiza igaragara ku mpande zombi.

Avuga ko umushinga ayobora usanzwe ufatanya na Leta mu kongerera ubushobozi abakora mu rwego rw’ubuzima binyuze mu mahugurwa, kubaka ibigo nderabuzima no kongera ibikoresho bikenerwa mu rwego rw’ubuzima ari naho haturutse igurwa ry’izi mashini 7.

Musirikare yasabye ubuyobozi bw’Akarere, ibigo nderabuzima n’imirenge gushishikariza ababyeyi kurushaho kwitabira kwipimisha nibura inshuro 4, ku buryo imibare izazamuka bikagaragaza impinduka nziza.

Umutoni Jeanne, Umuyobozi w’Akarere ka Rwamagana wungirije ushinzwe iterambere ry’imibereho myiza y’abaturage, yibukije abitabiriye iki gikorwa bose kuzirikanana ko buri wese umwanya akoreraho awurimo kugira ngo ateze imbere imibereho myiza y’umuturage.

Visi Meya Umutoni Jeanne yijeje ubuyobozi bw’umushinga wa “Health builders” ko nk’ubuyobozi bw’Akarere, imirenge n’ibigo nderabuzima bagiye gushishikariza abaturage kwitabira kwipimisha no gukoresha iyi serivise, kugira ngo zizahe serivise abantu benshi bashoboka.

Yasabye abayobozi b’ibigo nderabuzima kuzafata neza izi mashini, zikabikwa ahantu hizewe kandi zigacungirwa umutekano ku buryo buhagije.

Mukamakuza Alice, umuforomo ukorera ku kigo nderabuzima cya Rwamagana, yavuze ko izi mashini zizatuma ababyeyi barushaho kwitabira kwipimisha igihe batwite ndetse binagabanye ibyago by’imfu z’ababyeyi bapfa babyara n’abana bapfa bavuka.

Yavuze ko hari igihe ku kigo nderabuzima bajyaga bakira umubyeyi utazi neza igihe aherukira mu mihango bakamwohereza ku bitaro bikuru. Akaba yongeyeho ko izi mashini zizagabanya umubare w’ababyeyi boherezwa ku bitaro kubera iyi serivise nshya.

Umwanditsi:

Uwimana Donatha

One Comment on “Rwamagana: Ibigo nderabuzima byahawe imashini zipima ababyeyi batwite”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.