18°C , Mostly cloudy | Kigali-Rwanda
Dr Asiimwe ubwo yaganiraga n'abaturage bo mu mudugudu wa Bigabiro muri Rwamagana aho yabakanguriraga kwitabira gahunda yo kuboneza urubyaro no kurwanya imirire mibi mu bana (Foto Hakizimana Y)

Rwamagana: Dr Anita yasobanuye uko kubyara indahekana bivuna

Yanditswe na HAKIZIMANA YUSSUF

Ku ya 12-10-2018 saa 15:27:43

Umuhuzabikorwa wa gahunda y’igihugu yo kwita ku mikurire y’umwana akiri muto, Dr.Anita Asiimwe, yasabye abaturage kwitabira gahunda yo kuboneza urubyaro.

Ni bumwe mu butumwa yatangiye mu Murenge wa Kigabiro mu Kagari ka Cyanya mu Karere ka rwamagana mu gikorwa cyo gusura igikoni cy’umudugudu uburyo gikora.

Dr. Asiimwe yagize ati: “Icyo nshaka kubabwira ni ukuboneza urubyaro, iyo ubyaye umwana umwe ukamukurikiza undi na we agakurikirwa n’undi harimo ibibazo byinshi. Icya mbere urananirwa wowe mubyeyi nta mbaraga uba ugifite, iyo ufite umwana umuhetse undi yonka undi na we akeneye ko umwitaho murumva ko biba bikomeye ni yo mpamvu yo kuboneza urubyaro”.

Akomeza agira ati: “Iyo ubyaye umwana ukamurera agakura na we birakorohera, tugomba kubyara abo dushoboye kurera babiri batatu ariko ubundi iyo dutangiye kurenza abo ngabo kaba katubayeho, imibiri yacu irananirwa ariko iyo ubyaye ukareka umubiri wawe ugasubirana ukita kuri wa mwana umubiri wawe urasubirana ugakomeza kugira itoto”.

Dr Asiimwe ubwo yaganiraga n’abaturage bo mu mudugudu wa Bigabiro muri Rwamagana aho yabakanguriraga kwitabira gahunda yo kuboneza urubyaro no kurwanya imirire mibi mu bana (Foto Hakizimana Y)

Abaturage bashima gahunda yo kuboneza urubyaro, Usengimana Olive ni umubyeyi w’abana 4 yagize ati: “Abajyanama b’ubuzima baje kudukangurira kuboneza urubyaro, ubwa mbere baza basanze ndi ngenyine mbimbwira umutware wange abanza kubyanga ambwira ko adashaka kuzongera kumva abo bantu bamuziye mu rugo, ariko kubera ko banyigishije nange nakwibuka uburyo navunikaga nyuma yo kubyara we nta kintu amfasha, nasabye abajyanama kuzaza mu rugo umutware wange ahari, baraje baratwigisha ntiyabyumva neza, barongera baragaruka noneho turasobanukirwa yemera ko mboneza urubyaro. Ubu nta mvune ngihura na yo”.

Mukansanga Aimée ni umugore w’imyaka 26, atuye mu mudugudu wa Bigabiro, yagize ati: “Icyo abajyanama batwigishije kugira ngo tuboneze urubyaro, batwerekaga ukuntu igoranye gutera imbere ubyara buri munsi, twarabyumvise, dufata gahunda yo kuboneza urubyaro, kandi abenshi muri twe yagenze neza ni yo hari ikibazo umuntu agize ajya kwa muganga bakamufasha”.

Bamwe mu bajyanama bakorera muri uyu mudugudu wa Bigabiro bavuze ko usibye abagore batwite bari mu kiciro cya mbere n’icya kabiri cy’ubudehe abandi bose bitabiriye gahunda yo kuboneza urubyaro.

TANGA IGITEKEREZO

Leave a Reply

Your email address will not be published. Required fields are marked *