Rwamagana: Abaturage bitunganyirije umuhanda w’ibilometero 6

Yanditswe na NYIRANEZA JUDITH

Ku ya 14-02-2021 saa 20:55:50
Uyu ni umuhanda watunganyijwe n'abaturage bikemura ikibazo cy'ubuhahirane

Abaturage bo mu Murenge wa Nzige mu Karere ka Rwamagana barishimira umuhanda barimo kwitunganyiriza bifashishije itaka rya laterite, kuko wari warangiritse, none bakaba bamaze kuwutunganya kuri kilometero zisaga 6, bikaba ari igisubizo ku buhahirane bwari bwarakomwe mu nkokora no kwangirika k’uwo muhanda.

Ibyo bilometero birenga bitandatu by’umuhanda bimaze kubakwa n’abo baturage binyuze mu misanzu y’amafaranga n’imiganda, bifite agaciro ka Miliyoni eshatu n’ibihumbi 800.

Ibi babikoze nyuma y’aho bamaze imyaka babangamiwe n’umuhanda mubi utagendwa n’imodoka na moto, bikabangamira ubuhahirane n’indi mirenge ndetse n’Umujyi wa Kigali, dore ko ari umwe mu mirenge itanga ibiribwa byinshi mu Mujyi wa Kigali.

Umurenge wa Nzige ukungahaye ku buhinzi cyane bw’urutoki, ibigori, ibishyimbo ndetse n’igishanga cyeramo imboga.

Nsengiyumva Fabien, utuye mu Mudugudu wa Ndinda, Akagali ka Murama, Umurenge wa Nzige mu Karere ka Rwamagana yavuze ko bajya gufata icyemezo cyo gukora uyu muhanda byaturutse ku kuba wari warangiritse, bigatumma abashorammari bajyaga baza gutwara umusaruro wabo bari batakijyayo kuko umuhanda wari warapfuye.

Yagize ati: “Mu nteko z’abaturage hari ibitekerezo twagiye dutanga nk’abaturage twemeza yuko tugomba gukora uno muhanda. Tumaze kubyemeza tubyohereza ku murenge udukorera inyigo hanyuma barongera barabitugarurira turongera turicara dushyira hamwe umusanzu buri muturage akajya agenda atanga amafaranga yu Rwanda 5,000 kugira ngo uyu muhanda wacu tuwukore.”

Abaturage ubwabo bishakamo ibisubizo

Undi muturage witwa Sinayobye Jean Marie Vianney, utuye mu Mudugudu w’Agasharu, Akagali ka Murama, we yavuze ko n’abaturage ubwabo wabagoraga nko kugera ku isoko ugasanga amagare yabo yasaye kubera ubunyerere. Yongeyeho ko iyo umuntu yabaga ashaka gutega moto bacaga amafaranga menshi kubera umuhanda mubi.

Umumotari Nsanzimana Jean Bosco umaze imyaka 12 akora akazi ko gutwara abagenzi kuri moto i Nzige, we avuga ko moto bazisigaga mu nzira bagataha n’amaguru iyo imvura yabaga yaguye.

Umunyamabanga Nshingwabikorwa w’Umurenge wa Nzige, Karangwa Alphonse avuga ko uyu muhanda utangirira mu rugabano n’Umurenge wa Muyumbu, ahamaze gukorwa ibilometero bitandatu bigera ku biro by’umurenge.

Ati: “Iyo imvura yagwaga imodoka nyinshi zarahararaga zikahahera, ntizibashe kuzana umusaruro cyangwa se n’ibihahwa.”

Yakomeje avuga ko abaturage ubwabo ari bobagize igitekerezo bakakigeza ku buyobozi bw’Umurenge na bwo bubyigaho, bunabiganiraho cyane ko bwabonaga ko uwo muhanda ufite ikibazo.

Njyanama y’Umurenge, Abavuga rikumvikana, abacuruzi, abarimu, harimo n’abandi bikorera bahisemo kugira icyo babikoraho nubwo Akarere gafite gahunda yo kuzawutunganya.

Bemeranyijwe ko umuturage ufite ubushobozi buciriritse atanga amafaranga yu Rwanda 2,000; abandi bifite bakagenda batanga bijyanye n’ubushobozi bwabo, hari abatanze ibihumbi 100, ibihumbi 200.

Umunyamabanga Nshingwabikorwa w’Umurenge wa Nzige, Karangwa yavuze ko ubu itunganywa ry’uwo muhanda riri mu cyiciro cya kabiri, kandi ko abaturage bamaze gutanga miliyoni eshatu n’ibihumbi 800, ari na yo yakoreshejwe.

Yongeyeho ko hakiri andi akiri mu midugudu, ndetse ubishinzwe watowe muri komite, akaba yamubwiye ko miliyoni enye n’ibihumbi 650 akiri muri SACCO.

Gitifu Karangwa avuga ko uyu muhanda ufite agaciro k’amafaranga y’u Rwanda miliyoni 24. Uwatanze amafaranga n’utarabashije kuyatanga, bose bafatanyaga imirimo itandukanye yo gutunganya umuhanda, nko gusanza itaka.

Yanongeyeho ko uyu muhanda wubakishije itaka rya laterite uzakomeza gutunganywa kuko ahamaze gukorwa ari kimwe cya gatatu cy’umuhanda.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.