27°C , Partly sunny | Kigali-Rwanda

Rwamagana: Abaturage bamenye ko ruswa igira ingaruka mbi

Yanditswe na Rutayisire Emile

Ku ya 13-02-2020 saa 16:54:50
Kwanga ruswa ni igisubizo k'iterambere

Mu gihe abaturage bo mu Karere ka Rwamagana bari mu cyumweru cyo kurwanya ruswa mu nkiko ndetse hagatangwa ibiganiro bivuga kuri ruswa mu nkiko, abaturage bavuga ko bamaze kumenya ingaruka mbi za ruswa harimo gutera ubukene bakagira, inama abayitanga n’abayihabwa kuyirinda.

Mu kiganiro Imvaho Nshya yagiranye na bamwe mu baturage bahawe ibiganiro bo mu Karere ka Rwamagana, bayitangarije ibibi bya ruswa.

Munyarukiko Pierre yemeza ko ruswa itera ubukene, akagira inama umuntu wese utanga ruswa. Agira ati “Ruswa ikibi cyayo icya mbere itera ubukene kuko utanga amafaranga ugura serivise wagombaga guhererwa ubuntu. Inama ngira buri wese ni uko yareka ruswa kuko imunga ubukungu bw’abaturage n’Igihugu muri rusange”.

Mukanoheri Marie Rose avuga ko ruswa igira ingaruka ku muryango. Agira ati “Ikibi cya ruswa ni uko n’ubwo wayitanga ntufatwe amafaranga utanze uba umeze nk’uyibwe kuko ajya mu biganza bimeze nk’iby’umujura kuko ayakira atayakoreye. Indi ngaruka ni uko ushobora gufatwa bikagira ingaruka k’uyitanze ndetse no k’uyihawe kuko bose bahanwa”.

Akomeza avuga ko ibihano bihabwa utanze ruswa n’uyihawe birimo gufungwa bituma uwakoraga akazi gahagarara niba afite umuryango ugahangayika bagemura ariko umutungo w’urugo uhatikirira.

Mu biganiro byahawe abaturage bo mu Karere ka Rwamagana byatumye bavumbura amayeri abasaba ruswa bifashisha kandi basobanukirwa neza n’ingaruka za ruswa.

Shoneri Muganwa Dickson Perezida w’Urukiko rukuru, Urugereko rwa Rwamagana, avuga ko mu cyumweru cyo kurwanya ruswa bagirana ibiganiro n’abaturage baje mu nkiko. Agira ati “Ibikorwa dukora mu cyumweru cyo kurwanya ruswa mu nkiko ni ukuganira n’abaturage baje mu nkiko no kuganira n’abakozi ubwabo kuko aho ari ho ipfundo riri, niba bumva ko batagomba kwaka ruswa n’umuturage ntiyabona uwo ayiha”.

Kakoza Henry, Umunyamabanga Nshingwabikorwa w’Akarere ka Rwamagana, arasaba abaturage gutanga amakuru ku gihe ku muntu usaba cyangwa utanga ruswa kugira ngo iranduranywe n’imizi.

Agira ati “Icyo dusaba abaturage, ni ukumenya uruhare rufatika abaturage bafite mu gutanga amakuru ndetse no gukurikirana ibyaha bya ruswa kugira ngo bigere mu nzego zibishinzwe maze na zo zikore akazi zigomba gukora”.

Akomeza asaba abaturage kwirinda abiyita abakomisiyoneri ba ruswa bakunze kwitwa abatekamutwe bahamagara abagize umuryango w’ukurikiranwe n’ubutabera bavuga ko bamufasha gufungurwa.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.