17°C , Partly sunny | Kigali-Rwanda
Urugo mbonezamikurire rwatashywe ku mugaragaro ruzafasha abana kugira imikurire myiza (Foto Iyaremye Y)

Rutsiro:Barashimira Imbuto Foundation yabubakiye urugo mbonezamikurire

Yanditswe na IYAREMYE YVES

Ku ya 10-07-2018 saa 09:21:06

Abaturage bo mu murenge wa Kivumu mu karere ka Rutsiro, barishimira ko imikurire y’abana babo igiye kurushaho kuba myiza, kuko begerejwe urugo mbonezamikurire y’abana bato, bubakiwe n’Umuryango Imbuto Foundation.

Urugo mbonezamikurire rwatashywe ku mugaragaro ruzafasha abana kugira imikurire myiza (Foto Iyaremye Y)

Uru rugo mbonezamikurire y’abana bato rwa Karambi rwatashywe ku mugaragaro ku wa 9 Nyakanga 2018, ruzakira abana bagera ku 120. Ni igikorwa remezo abaturage bavuga ko kizagira akamaro gakomeye mu guteza imbere imikurire y’abana.

Musengimana Jeanne, umwe mu bafite abana barererwa muri uru rugo, yagize ati “Turashima uburyo twahawe urugo mbonezamikurire, nta bwo twari tuzi ko ibyiza nk’ibi byatugeraho ubuzima bwacu bwamaze guhinduka.

Ubu tubona aho dusiga abana bacu bakitabwaho tubigizemo uruhare, natwe tukabona uko twita ku zindi gahunda ziduteza imbere.”

Akomeza avuga ko kugira urugo mbonezamikurire hafi byatumye bahabwa amahugurwa agamije gutegura indyo yuzuye, ndetse banahabwa umwanya wo guhugurwa ku mibanire barwanya amakimbirane, bakaba bizeza ko imikurire y’abana igiye kurushaho kugenda neza.

Umuyobozi Mukuru w’Umuryango Imbuto Foundation, Umutoni Sandrine, avuga ko uru rugo mbonezamikurire rw’ikitegererezo ruri muri gahunda yo guhigura umuhigo Madamu Jeannette Kagame yahize ubwo yari mu karere ka Rutsiro muri Mutarama 2018, aho yari yiyemeje guteza imbere imikurire y’abana.

Yakomeje agira ati “Ndashima ababyeyi kuko ari ari bo bafatanyabikorwa ba mbere kuko turafatanya kwita ku bana babo, gusa  mbasaba gukomeza gushyira imbaraga mu kwita ku bana cyane ko igiti kigororwa kikiri gito.

Intego yo gutangiza urugo mbonezamikurire ni ugufasha mu gutegura neza ahazaza h’igihugu, dutegura neza abana bakiri bato, ndasaba ko uri rugo buri wese arugira urwe akarwitaho kandi akaruba hafi.”

Ubuyobozi bw’Akarere ka Rutsiro buvuga ko uru rugo ruzabakura ku mwanya mubi bari bariho mu kugira abana bagwingiye, na bo bakajya mu turere dufite abana bake bagwingiye, ndetse hagakomeza gukorwa ibishoboka byose kugeza ubwo nta mwana n’umwe uzongera kugwingira.

Guverineri w’Intara y’Iburengerazuba Munyantwari Alfonse ataha ku mugaragaro urugo mbonezamikurire rw’ikitegerezo mu karere ka Rutsiro yashimiye uburyo Imbuto Foundation bafashe iya mbere mu gutekereza kuri iki gikorwa yemeza ko kiganisha ku hazaza heza h’igihugu gusa asaba buri muryango kugira urugo rwe urugo mbonezamikurire.

Guverineri w’Intara y’Iburengerazuba Munyantwari Alphonse, yasabye abagize umuryango gukomeza kurangwa n’ubufatanye mu kwiteza imbere no guharanira imikurire myiza y’abana.

Yavuze ko bikwiye ko urugo rw’umunyarwanda wese ruba urugo mbonezamikurire, bikaba umuhigo, buri wese akemera kwigishwa, guhugurwa, ibyo yabonye mu rugo mbonezamikurire akabishyira mu rugo rwe.

Yakomeje agira ati “Umwana uzi ubwenge bamusiga yinogereza, twatashye urugo mbonezamikurire ariko abafatanyabikorwa bakwiye kuzagaruka tubagaragariza uko buri muryango wabaye urugo mbonezamikurire kuko ni mu nyungu z’abana bacu.

Umubyeyi ushaka gusaza neza arera neza abana yabyaye, abana bacu bitaweho mu rugo mbonezamikurire bataha bagasanga n’iwacu ari ko bimeze, igihugu cyacu cyazaba gifite ahazaza heza.”

TANGA IGITEKEREZO

Leave a Reply

Your email address will not be published. Required fields are marked *