23°C , Partly cloudy | Kigali-Rwanda

Rutsiro: Ivuriro ry’ingoboka rya Nturo rizatanga ubuvuzi mu tugari 4

Yanditswe na Twagira Wilson

Ku ya 14-01-2020 saa 17:08:34
Visi Meya w'Akarere ka Rutsiro Marie Chantal Musabyemariya

Ivuriro ry’ingoboka rishya rya Nturo mu karere ka Rutsiro mu murenge wa Kigeyo ryatashywe abaturage biteze ko rizatanga serivise z’ubuvuzi ku baturage bagera ku bihumbi 8 bo mu tugari 4.

Mu kiganiro n’Imvaho Nshya, Umuyobozi w’Akarere ka Rutsiro wungirije ushinzwe imibereho myiza y’abaturage Marie Chantal Musabyemariya, avuga ko ari inkuru nziza kuba abaturage begerejwe ivuriro ry’ingoboka cyane ko hari serivise zigiye kuboneka hafi yabo zirimo ibirebana no kuboneza urubyaro, gukangurira abaturage imirire myiza, isuku n’izindi.

Akomeza agira ati «Ni inkuru nziza twishimira nk’ubuyobozi kuba umufatanyabikorwa ahaye abaturage ivuriro, kuko ubu serivise nyinshi bagiye kuzitabira, kuko hari nk’igihe wahamagaraga umuturage umubwira ngo ku munsi runaka tuzahurire kwa muganga kure yaho atuye kugira ngo ahabwe serivise runaka, bikamugora kuko ari kure ariko ubu ubwo ivuriro ribegereye bizoroha ahabwe serivise akeneye kandi vuba bitamugoye kandi yishimye, nko kuboneza urubyaro ni servise zije hafi yabo kuko wasangaga n’imyumvire ikiri hasi’’.

Iryo vuriro ry’ingoboka rya Nturo ribarizwa muri zone y’ubuvuzi ya Cyimbiri, mu Kagari ka Buhindure mu murenge wa Kigeyo mu Karere ka Rutsiro rimaze amezi atatu kuva ritangiye ritanga serivise z’ubuvuzi bw’indwara z’ubuhumekero, kuvura ibikomere, marariya n’indwara zo mu ngingo ku baturage barikikije bo mu tugari twa Rukaragata, Buhindure, Nkora na Nyagahinika.

Abatuye muri iyo mirenge barishimira amavuriro y’ingoboka nk’ayo yabaruhuye ingendo ndende bakoraga z’amasaha asaga abiri bajya kwivuza mu bigo nderabuzima bya Kivumu, Kinihira, Cyimbiri n’ahandi.

Muri ayo mezi atatu, ivuriro ry’ingoboka rya Nturo rimaze kwakira abaturage 1801. Bamwe mu barigana baje kwivuza, bifuza ko serivise zihatangirwa zakongerwamo n’iyo kubyaza kugira ngo be gukora ingendo ndende bajya kwivuza mu tundi turere ndetse ngo iryo vuriro rigakora amasaha yose.

Muganga Mukuru uyobora ibitaro bya Murunda ari naho ivuriro ry’ingoboka rya Nturo ribarizwa, Dr. Niringiyimana Eugene yijeje abagana iryo vuriro ko mu minsi mike abaganga bahoraho bazaba batangiye akazi kugira ngo igihe cyose umurwayi akeneye umwitaho amubone bitamugoye.

Iryo vuriro rya Nturo ryuzuye rifite agaciro ka miriyoni 86 z’amafaranga y’u Rwanda yatanzwe n’abafatanyabikorwa mu iterambere ry’Akarere ka Rutsiro ‘DO GOOD HEALTH’ basanzwe banafite uruganda rutunganya Kawa yera mu murenge wa Kigeyo.

Amakuru atangwa n’ubuyobozi bw’Akarere ka Rutsiro avuga ko mu karere kose hari amavuriro y’ingoboka 30, ubwitabire mu bwisungane mu kwivuza buhagaze kuri 70.9%. Visi meya w’akarere ushinzwe imibereho myiza y’abaturage agaragaza ko bagifite ikibazo cy’abakozi bake mu mavuriro nko ku mavuriro y’ingoboka.

Ati «Nubwo Minisiteri y’Ubuzima yijeje ko hagiye kuboneka abakozi 15 hamaze kuza abagera ku ikenda gusa, turategereje, icy’abakozi badahagije kiracyahari  ikirimo gukorwa ubu ni uko abo ku bigo nderabuzima bajyayo mu rwego rwo kubifashisha igihe gito nk’icyumweru, uretse ko ubu twatangiye gukangurira n’abafatanyabikorwa kuzifata bagatangira kuzikoreramo mu buryo buhoraho, kugeza ubu hari abatangiye kugaragaza ubushake twizeye ko kizakemuka vuba».

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.