22°C , Mostly cloudy | Kigali-Rwanda

Rutsiro: Ikibazo cyo gusana imiyoboro kizakemura ibura ry’amazi meza

Yanditswe na Sezibera Anselme

Ku ya 14-01-2020 saa 11:07:45
Umuyobozi w’Akarere ka Rutsiro Ayinkamiye Emérence

Bamwe mu baturage batuye mu murenge wa Murunda mu karere ka Rutsiro mu Ntara y’Uburengerazuba bahangayikishijwe n’ibura ry’amazi meza amaze igihe kinini ataboneka, ubuyobozi bw’ako karere bwo bukizeza ko batangiye gahunda yo kubikemura hasanwa imiyoboro kandi mu gihe cy’amezi ane gusa azaba abageraho ku kigero gishimishije.

Umuturage Mukamana Beatrice avuga ko muri uwo murenge habaye ibikorwa byo gutunganya umuyoboro w’amazi ariko kuva mu kwezi kwa Gashyantare 2019 nta mazi meza yigeze abageraho aho basanzwe bavomera.

Mukamana avuga ko hagiye gushira umwaka wose mu mavomo amwe n’amwe atandukanye muri uwo murenge nta mazi abaturage babonye bigatuma basubira kuvoma amazi mabi ashobora no kubagiraho ingaruka z’uburwayi.

Yagize ati: “Kuva muri Gashyantare 2019 kugeza ubu nta mazi meza tugira mu mavomo yacu kuyavuga ni nko kuvuga amateka yabayeho. Hashize hafi umwaka abaturage tubayeho dutyo, mu gihe twayahoranye mbere y’uko habaho gusana umuyoboro wayatugezagaho”.

Undi witwa Mugunga Berchimas na we yasobanuriye Imvaho Nshya ko habaye ibura ry’amazi kuva mu kwa Kabiri 2019, kugeza n’ubu batari bayabona kandi barayiyishyuriye ubwabo.

Mugunga ati: “Amazi ahandi hirya ya Murunda arameneka ariko twibaza impamvu twe atatugeraho muri Murunda ngo natwe twongere tuyabone, niba ari no kutwishyuza nta bwo twanze kwishyura, no kugura za Mubazi ntitwabyanze, ariko nta mazi, tuzazigura ngo tuzimaze iki se kandi nta mazi tubona”.

Umuyobozi w’Akarere ka Rutsiro Ayinkamiye Emerence ubwo yaganiraga n’Imvaho Nshya, yavuze ko koko kubura kw’amazi muri ako gace byatewe n’uko rwiyemezamirimo wakoze imirimo yo gusana uwo muyoboro w’amazi mu murenge wa Murunda atabikoze uko bikwiye bikarangira bimunaniye.

Yagize ati: Mu murenge wa Murunda by’umwihariko, hari igikorwa twakoze mu minsi ishize cyo gusana umuyoboro wagezaga amazi ku bitaro, ku mashuri, kuri Paruwase [Gatolika] ya Murunda no ku baturage bahegereye bikozwe na rwiyemezamirimo SOCOBACO Ldt.  Haje kugaragaramo ibibazo by’uko umufatanyabikorwa atabikoze uko bikwiriye, abaturage batangira kubura amazi, bigaragara ko babaye benshi bakeneye amazi noneho amazi akaba makeya”.

Nk’uko abivuga ngo mu gukemura icyo kibazo habayeho gusesa amasezerano n’uwo rwiyemezamirimo hashakwa undi kandi twizera ko biri gukorwa neza kandi icyo kibazo kiri hafi gukemuka.

Ayinkamiye atangaza ko nubwo icyo kibazo kimaze amezi 6 kiriho ariko amazi atagiye burundu ahubwo ari uko aboneka ari make, gusa ngo hari kampani yiyemeje gufasha abaturage mu isaranganwa ryaho bayafite akabasha kugera ku bayabuze nubwo adahagije koko.

Ati: “Igisubizo gihari ni uko twabonye undi mufatanyabikorwa ugiye kudufasha kuyongera bityo ikibazo k’ibura ry’amazi kigakemuka burundu. Mu by’ukuri twamaze gusinyana amasezerano kandi turizeza abo baturage ko mu mezi 4 gusa bazaba bagerwaho n’amazi meza uko bikwiye kuko twabyumvikanye na rwiyemezamirimo”.

Uretse kuba muri uwo murenge wa Murunda muri Rutsiro harabayeho icyo kibazo cy’amazi makeya ku baturage, muri rusange ubuyobozi bw’ako karere ka Rutsiro bugaragaza ko amazi meza ku baturage ari ku rwego rwa 75% nk’uko EICV ya 5 yabyerekanye.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.