25°C , Partly sunny | Kigali-Rwanda

Rutsiro:  Abahinzi bavuze uko basezereye ubuhinzi bw’akajagari

Yanditswe na MUKAGAHIZI ROSE

Ku ya 05-11-2019 saa 06:05:29
Minisitiri w'Ubuhinzi n'Ubworozi Dr. Mukeshimana Gerardine yasuye imurikabikorwa rya Hinga Weze aha ari kumwe n'umuyobozi wa Hinga Weze Daniel Gies

Abahinzi batuye mu murenge wa Nyabirasi mu karere ka Rutsiro baravuga ko bihagije mu biribwa nyuma yo gusezerera ubuhinzi bw’akajagari.

Mu kiganiro n’Imvaho Nshya Muhawenimana Candida abarizwa muri Koperative Hinga Weze igizwe n’abanyamuryango barenga 5000 hamwe na bagenzi be bashimye Leta y’u Rwanda yabazaniye abatera nkunga barimo USAID Hinga Weze ni umushinga watangijwe ku bufatanye n’Ikigo k’Igihugu Gishinzwe Guteza Imbere Ubuhinzi n’Ubworozi (RAB) ku nkunga y’Umuryango w’Abanyamerika wita ku iterambere mpuzamahanga (USAID) ukaba wibanda ku buhinzi no kunoza imirire ukorera mu Turere 10 aho igomba gufasha abaturage 530.000.

Yagize ati: “Mbere Hinga Weze itaraza twakoraga ubuhinzi bw’akajagari tukavanga ibihingwa mu murima umwe tugahingamo n’imbuto zirenga 3 washaka umusaruro wa buri gihingwa wahinzemo ukawubura.”

Akomeza agira ati: “Ikindi twapfaga guhinga tutarwanyije isuri, nta materasi, nta miringoti ubutaka bugatemba ubundi bugatwarwa n’isuri ariko USAID Hinga Weze ije badukoreye amaterasi ndinganire, ubu ntitugihinga mu kajagari, duhinga imbuto z’indobanure, duhinga ibishyimbo bikungahaye ku butare kandi Hinga Weze yanadukanguriye guhinga imboga n’imbuto ubu ku rwego rwo kurwanya imirire mibi turi ku isonga mu murenge wacu wa Nyabirasi.”

Akomeza avuga ko bateye imbere, abagore bamenye gutegura indyo yuzuye kubera ko Hinga Weze ngo yabibahuguyemo ibafasha gukorera mu matsinda kandi ngo yabakanguriye gukorana n’ibigo by’imari kuri ubu ngo basobanukiwe akamaro ko kwizigamira.

Byongeye kandi ngo bahawe ubumenyi ku bigendanye n’isuku n’isukura nta kibazo cy’umwanda ukibarangwaho ndetse buri umwe wese yahagurukiye isuku n’isukura, abana babo bariga.

Habimana Alphonse, umuhinzi mu murenge wa Nyabirasi we avuga ko kuri ubu bihagije mu biribwa, bafite ibishyimbo ibijumba, ibigori n’ibindi. Yagize ati: “Icyo twakwirata, icyo twabwira n’abandi bakakibona imisozi yacu yose ihinze ibishyimbo kuko twahuje ubutaka, ibyo twirata ni byinshi.”

Byukusenge Marie Ange, umuhinzi mworozi mu murenge wa Nyabirasi akorana na koperative Twiteze imbere mu buryo bw’inyongeramusaruro aho ngo kuri ubu bahinga bakoresheje amafumbire babifashijwemo na Hinga Weze bityo  umusaruro ukiyongera.

Yagize ati: “Mbere umusaruro wari muke nta bwo twahunikaga ariko ubu dusigaye duhunika tugasagurira n’amasoko nyuma yo kubifashwamo na Hinga Weze kuri hegitari 20 duhingaho ibishyimbo n’ibigori ku butaka buhujwe mbere twahingaga mukajagari kera nahingaga kuri hegitari imwe nkasarura nk’imifuka itatu y’ibirayi ariko kuri ubu kubera gufumbira ubu umusaruro mbona  wikubye nka 3, ubu twasezereye imirire mibi kuko turahugurana mu matsinda kandi ubu twatangiye guhinga dutekereza gusagurira amasoko kandi dukora n’ubworozi bukaza bwunganira ubuhinzi bityo tukagera ku ifaranga.”

Umuyobozi w’Akarere ka Rutsiro Ayinkamiye Emerence ashima abafatanyabikorwa mu iterambere akavuga ko ku bufatanye bazarandura ikibazo k’imirire mibi n’igwingira bikibasiye bamwe mu bana babarizwa muri aka karere.

Yagize ati: “Tuzakomeza gutera intambwe mu kunoza ubuhinzi n’ubworozi kubera ko dufite amahirwe akarere kacu akaba ari akarere kera kakaba gafite n’ubworozi buteye imbere, Gishwati, gahunda ya Girinka Munyarwanda byose bizadufasha kurwanya imirire mibi yagiye ikunda kugaragara mu karere kacu tukaba twishimiye abafatanyabikorwa bafasha muri iki gikorwa tuzakomeza gutera intambwe tujya imbere dukumira igwingira ry’abana.”

Ubwo hizihizwagwa umunsi Mpuzamahanga w’ibiribwa ku Isi, ukabera mu karere ka Rutsiro, Minisitiri w’Ubuhinzi n’Ubworozi Dr. Mukeshimana Geraldine yavuze ko uyu munsi ari  umwanya mwiza ku gihugu cy’u Rwanda  wo kwishimira ibimaze kugerwaho mu rwego rwo kwihaza mu biribwa ndetse no kurandura imirire mibi n’ingaruka zabyo ariko cyane cyane ni umunsi wo gufata ingamba zo kusa ikivi gisigaye.

Insanganyamatsiko igira iti: “Ibikorwa byacu ni byo shingiro ry’ejo hazaza, indyo yuzuye mu rugamba rwo kurandura inzara ku isi.”

Avuga ko iyi nsanganyamatsiko ishimangira gahunda y’intego z’iterambere rirambye zigamije kugerwaho mu mwaka wa 2030 ku Isi yose.

Ijyanye kandi by’umwihariko na Gahunda ya Guverinoma y’u Rwanda y’imyaka 7 mu bijyanye no kwihaza mu biribwa ndetse no kurandura imirire mibi mu bana b’Abanyarwanda.

Leta y’u Rwanda yiyemeje kurandura ikibazo k’imirire mibi

Avuga ko Leta y’u Rwanda nka kimwe mu bihugu bigize umuryango w’Abibumbye yiyemeje gushyira iyi gahunda mu bikorwa hakagerwa ku bisabwa mu mwaka wa  2025 ari yo mpamvu ngo bakora  ibishoboka byose ngo bagere ku ntego hatarindiriwe umwaka wa 2030.

Yagize ati: “Inyigo yakozwe n’Ishami ry’Umuryango w’Abibumbye rishinzwe ubuhinzi n’ibiribwa ku Isi yerekana ko hafi miriyoni 820 z’abatuye Isi bacyugarijwe n’inzara, muri Afurika ni ho hari 20% byabo bantu. Aha mu Rwanda dufite ingo zigeze hafi  mu Rwanda dufite ingo hafi ibihumbi 4000 zugarijwe n’ikibazo n’ikibazo cyo kwihaza mu biribwa cyane cyane ingo zikuriwe n’abantu bakuze cyangwa babana n’ubumuga, abantu bo mu kiciro cya mbere cy’ubudehe ndetse n’abantu batagira ubutaka bakora imirimo ijyajye no gukorera abandi.”

Avuga ko Rutsiro ari kamwe mu turere tukigaragaramo ibibazo byo kutihaza mu biribwa ariko cyane cyane ni akarere kaza ku isonga mu turere tugaragaramo abana benshi bagwingiye, abwira abaturage baho ko bashyigikiwe bityo ababwira ko icyo kibazo kigomba kuranduka.

Yagize ati: “Ku bijyanye n’ubuhinzi n’ubworozi aka karere gahagaze neza si akarere kateza ariko bigenda bigabanuka yuko mu mibare y’abafite abana bagwingira itagabanuka ku kigero kifuzwa. Ni yo mpamvu twagiye dukora inyigo zitandukanye kugira ngo tumenye impamvu yabyo, ikintu gikomeye ni ubumenyi bwo gutegura amafunguro yaba amafunguro y’abana ndetse n’amafunguro y’abantu bakuru twifuza yuko uburyo bwo gutegura amafunguro ababyeyi batwite aboneye ndetse n’abana yakwira mu ngo zose abana bakayahabwa bakiri bato ntidutegereze yuko bazakirira mu ngo mbonezamirire kuko igihe bagerera muri ibyo bigo biba bitinze ariko cyane cyane ubumenyi mu ngo abaturage mu bijijukirwe bityo ubumenyi bwo gufata amafunguro bugende bukwira mu ngo zacu.”

Aboneraho kubakangurira  ngo ibihari bitunga imiryango byabanza bikayitunga ntibamarire ibyo basaruye ku isoko, amata bakamye, cyangwa amatungo ngo mu ngo hasigaremo icyuho.

Ati: “Hari aho tugera hirya no hino tugasanga ababyeyi barakama ritiro 10 ariko yose akajya ku isoko ugasanga ibibazo by’imirire mibi mu ngo birahari,  ugasanga hari bamwe mu bagore boroye inkoko 5 ariko amagi yose ashirira ku isoko, ugasanga abana bafite ibibazo by’imirire mibi. Abanyarwanda dushyize hamwe dufatanye guhashya ikibazo k’imirire mibi n’ingaruka zayo.  Dufite gahunda nziza z’akarima k’igikoni dukwiye kwitabira, tukayigira iyacu, kuko imboga zihingwamo zifite akamaro. Leta irakataje muri gahunda yo kwihaza mu biribwa.”

Yaboneyeho umwanya mwiza wo gushimira Abafatanyabikorwa mu rugamba rw’iterambere ariko anabakangurira gukomeza gufatanyiriza hamwe mu kurandura ikibazo k’imirire mibi.

Umuyobozi w’Umushinga ‘Hinga Weze’ Daniel Gies (hagati) ari mu bitabiriye umunsi mpuzamahanga w’ibiribwa wabereye mu murerenge wa Nyabirasi mu karere ka Rutsiro

Byukusenge Marie Ange, umuhinzi mworozi mu murenge wa Nyabirasi akorana na koperative Twiteze imbere afite ubuhamya bw’ukuntu bavuye mu buhinzi bw’akajagari ( Ifoto Rose M)

Umwanditsi:

MUKAGAHIZI ROSE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.