19°C , Partly cloudy | Kigali-Rwanda
Abanyekongo batuye mu karere ka Rusizi basaga 200 (Foto Ingabire A)

Rusizi:Abanyekongo batuye i Kamembe barishimira umutekano n’iterambere

Yanditswe na INGABIRE RUGIRA ALICE

Ku ya 05-03-2018 saa 08:14:27

Abaturage bakomoka muri Repubulika iharanira Demokarasi ya Kongo batuye mu mujyi wa Kamembe mu karere ka Rusizi, barishimira umutekano bafite bakesha imiyoborere myiza mu Rwanda.

Abanyekongo batuye mu karere ka Rusizi basaga 200 (Foto Ingabire A)

Ibi byagarutsweho mu birori byabahurije mu mujyi wa Kamembe, bishimira uburyo ubuzima bwabo bukomeje kuba bwiza mu Rwanda, babikesha imiyoborere myiza, ituma babona umutekano usesuye.

Muri ibi birori bashimiye cyane Leta y’u Rwanda yabahaye umutekano. Munyerenkane Pascasie, yagize ati “Ibyatumwe mva iwacu nkaza kwibera hano mu Rwanda ni uko hano ari heza, hari amahoro, tubana neza n’abavandimwe bacu b’Abanyarwanda, baradukunda cyane, ahubwo turashaka baduhe Indangamuntu twibere abanyarwanda.

Hano tumeze neza, turarinzwe umutekano turawufite, nge nahisemo kwibera hano, abana bacu barajya ku ishuri, abagabo bacu nabo baragenda bagakorera i Bukavu bakaza hano, mu Rwanda ni heza Abanyarwanda tubanye neza nta kibazo.”

Patrick Mulumba, umuyobozi w’abanyekongo batuye mu mujyi wa Kamembe, yagize ati “Hano mu Rwanda tumeze neza, dutuye muri Kamembe turi abanyekongo turashima ubuyobozi bw’igihugu cy’u Rwanda, turafatanya mu kuzamura ubukungu bw’ibihugu byombi.

Impamvu duhura aba ari mu rwego rwo kungurana ibitekerezo tukareba ibitagenda neza tukabishyikiriza inzego zidukuriye, ubu ikibazo gikomeye dufite ni umurongo dutonda twe tujya gukora i Bukavu tuvuye mu Rwanda, uhasanga abantu benshi abajya Burundi n’abambuka baza mu Rwanda bigatuma dukererwa, turasaba abayobozi b’ibihugu kudukemurira icyo kibazo.”

Yakomeje agira ati “Naho ubundi tubanye neza n’abanyarwanda ni beza, batubwira neza, turafatanya tugakorera hamwe, n’iyo afite butike aguha ideni ukazamwishyura mu gihe mwumvikanyeho nta kibazo.”

Umuyobozi w’Akarere ka Rusizi Harelimana Frederic, yavuze ko kuba aba banyekongo bishimira amahoro n’umutekano bafite mu Rwanda ari ikintu cyo kwishimira, na cyane ko umutekano ari kimwe mu byashyizwemo imbaraga nyinshi, kugira ngo abaturarwanda babeho mu mudendezo, bakore imirimo yabo nta cyo bikanga, maze iterambere rirusheho kwihuta.

Yasabye aba banyekongo kandi kugira uruhare muri gahunda zitandukanye Leta y’u Rwanda ishyiraho hagamijwe guteza imbere umuturage no kumufasha kurushaho kugira imibereho myiza, kandi bakagira uruhare mu kubungabunga umutekano.

Uyu muyobozi yavuze ko muri uyu mujyi wa Kamembe hashyizweho gahunda y’irondo ry’umwuga, kugira ngo hakumirwe ubujura n’ibindi bibazo bishobora guhungabanya umutekano.

Yagize ati “Twatangije irondo ry’umwuga ryujuje ibisabwa, ari byo  gutanga amakuru ku gihe abaturage nabo bakemera ko babacungira umutekano, turi gukora urutonde rw’ibisambo aho biba biri hose hakamenyekana, tugiye gukurikirana inzererezi, gufunga utubari tutujuje ibyangombwa.

Irondo ry’umwuga ryatangijwe mu kwezi kwa kabiri, tugiye gufatanya n’inzego z’umutekano, Dasso na Polisi mu kurishyigikira, bityo iki kibazo cy’ubujura kizasigare ari amateka hano Kamembe.”

Mu mujyi wa Kamembe hatuye imiryango 200 y’abaturage b’abanyekongo, bose bahamya ko babayeho neza cyane, ku buryo badateganya kongera gusubira gutura iwabo.

Aba banyekongo kandi muri ibi birori baniyemeje kuzaganiriza Leta y’igihugu cyabo, kugira ngo Abanyarwanda babayo n’abagendayo nabo bajye bafatwa neza nk’uko nabo bafashwe mu Rwanda.

 

 

 

 

TANGA IGITEKEREZO

Leave a Reply

Be the First to Comment!

avatar