17°C , Partly cloudy with thunderstorms | Kigali-Rwanda
Abacururiza muri santere y'ubucuruzi ya Bugarama bavuga ko bacuruje menshi kuri Noheli n'ubunani,umwaka ukaba utangiye bunguka (Foto Bahuwiyongera S)

Rusizi: Kurushaho kunoza serivisi byatumye abacuruzi babona abakiliya benshi

Yanditswe na admin

Ku ya 04-01-2018 saa 09:08:24

Abacururiza ibintu binyuranye muri santeri y’ubucuruzi ya Bugarama, mu murenge wa Bugarama mu karere ka Rusizi baravuga ko gutanga serivisi nziza byatumye babona abakiliya benshi mu minsi mikuru ya Noheli n’ubunani.

Bamwe mu bacururiza muri iyi Santeri bayicururizamo batangarije Imvaho Nshya ko iyi minsi mikuru yagenze neza, cyane cyane ku bunani aho buri wese icyo acuruza cyaguzwe cyane bakinjiza amafaranga menshi, cyane cyane ko bari bakanguriwe n’ubuyobozi kurushaho guha serivisi nziza ababagana, bakaba bari bafite n’umutekano usesuye ku buryo hari ngo n’abagejeje mu masaha akuze y’ijoro bagicuruza.

Abacururiza muri santere y’ubucuruzi ya Bugarama bavuga ko bacuruje menshi kuri Noheli n’ubunani,umwaka ukaba utangiye bunguka (Foto Bahuwiyongera S)

Abacuruzi b’ibiribwa, cyane cyane ibirungo, ab’imboga n’imbuto n’ab’imitobe bavuga ko bacuruje cyane kurusha abandi nubwo n’ab’imyenda na bo ngo bungutse cyane, bikaba byaraterwaga n’abanyekongo babaguriraga cyane ku bwinshi, abaturiye imirenge y’ikibaya cya Bugarama bashakaga kwishimisha bakagura byinshi, ibindi bikajyanwa mu mujyi wa Rusizi, mu karere ka Nyamasheke n’ahandi, byose ngo bikaba byaragurikaga.

Dusabe Jolie ukorera muri koperative ikora umutobe w’imbuto zinyuranye, avuga ko na we ari mu bishimiye uko ubunani bwagenze ku bacuruzi ba Bugarama ndetse na Noheli kuko na yo  ngo bayibonyemo amafaranga menshi.

Yagize ati “Ubunani bwagenze neza hano iwacu pe! Twaracuruje turunguka, twe twagejeje hafi ku mafaranga tumaze amezi 5 yose ducuruza kuko abana bashakaga ko ababyeyi babagurira ku mitobe yacu ku bunani, abanyekongo bakayiguraho bakayijyana, abaturutse Kamembe, Kigali n’ahandi, dore ko hari n’abari baturutse imihanda yose baje gusangira n’imiryango yabo iminsi mikuru, bose bashaka kuduhahira.”

Avuga ko amafaranga babonye agiye kubafasha gukomeza kwiteza imbere bunguka n’ibindi byinshi, cyane cyane ko isoko risanzwe rihari, kandi bazanakomeza kwakira ababagana neza kugira ngo bakomeze bunguke.

Abandi bacuruzi na bo bavuze ko iyi minsi mikuru ibasize heza kuko umwaka utangiye babona amafaranga bakizera ko bitazagera hagati ngo bihagarare, cyane cyane ko uko aka gace ka Bugarama kagenda kamenyekana, binakubitiyeho umuhanda wa kaburimbo ucamo bubakiwe, babona bafite amahirwe y’iterambere yabagirira akamaro gakomeye cyane igihe bakomeza kuyabyaza umusaruro ufatika.

Umuyobozi w’aka karere Harelimana Frédéric na we yabwiye Imvaho Nshya ko ubunani bwagenze neza mu bikorera b’aka karere, uhereye ku bacuruzi batandukanye, amabanki n’abandi bose bakorera amafaranga, bikaba bishimishije.

Ati “Bacuruje neza cyane, cyane cyane ko twari twabanje kubakangurira kunoza serivisi ku babagana bose muri iyi minsi mikuru bakagaragaza isura nziza y’akarere. Uhereye mu Bugarama, ukagera mu mujyi wa Rusizi n’ahandi imikorere yagenze neza, nta n’uwo twumvise avuga ko yakiriwe nabi, byose bikagaragaza imyumvire abaturage bacu bagezeho muri bizinesi.

BAHUWIYONGERA SYLVESTRE

TANGA IGITEKEREZO

Leave a Reply

Be the First to Comment!

avatar