19°C , Mostly cloudy | Kigali-Rwanda

Rusizi: Inyubako zizamurwa i Kamembe ziratanga isura nshya y’umugi

Yanditswe na INGABIRE RUGIRA ALICE

Ku ya Sep 17, 2018 saa 8:07

Umujyi wa Kamembe ni umwe mu migi 6 yatoranyijwe kunganira Umujyi wa Kigali, abikorera ku bufatanye n’Ubuyobozi bw’akarere biyemeje guhindura isura y’umugi ukaba mwiza kurushaho bazamura inyubako z’amagorofa mu rwego rwo kurushaho kuwongerera agaciro.

Inyubako y’isoko ni imwe mu nyubako ziri kuzamurwa mu karere ka Rusizi (Foto Ingabire A)

Nshumbusho Idarus atuye mu mujyi wa Kamembe mu karere ka Rusizi avuga ko atewe ishema nuko Umujyi wa Kamembe watoranyijwe kunganira Umujyi wa Kigali.

Ati: “Twe abatuye aha muri uyu mugi dutewe ishema nuko watoranyijwe kunganira umurwa mukuru w’u Rwanda Kigali, ni yo mpamvu twiyemeje natwe kwagura imishinga n’ibikorwa twari dufite, ubundi nta bwo twabitekerezaga ko tuzagera aho tugira ijambo bigeze aho, tubikesha imiyoborere myiza yaduhesheje ishema.”

Avuga ko barimo kubaka inyubako zijyanye n’igihe, muri uyu mugi hari isoko rya kijyambere, hepfo yaryo hubatswe Hoteli nziza cyane izatuma ubukerarugendo butera imbere iwacu.

Ati: “Natwe rero turimo gukora imishinga yagutse kuko uyu mujyi wa Kamembe ni umugi urimo amafaranga kubera ko duhura n’ibihugu bibiri Abanyekongo baza gushakira imari hano iwacu Kamembe, n’Abarundi. Ni yo mpamvu twiyemeje kurushaho gukora cyane amafaranga dukuyemo tukaza tukayubakisha natwe tukazamura inyubako, turizera neza tudashidikanya ko mu myaka iri imbere uzaza Kamembe azayiyoberwa.’’

Kayumba Euphrem ni Umuyobozi w’Akarere ka Rusizi yemeza ko Umujyi wa Rusizi ari umwe mu migi yatoranyijwe kunganira Kigali bakaba bafite gahunda yo kwihutisha imishinga yasaga n’iyari yaradindiye kugira ngo ibyo bikorwa bitangire guteza imbere umuturage.

Yagize ati: “Umujyi wa Rusizi ni umugi ukataje mu iterambere ni umujyi washyizwemo ibikorwa remezo bitandukanye akaba ari yo mpamvu dushimira Perezida wa Repubulika Paul Kagame we wabisezeranyije abaturage akabibagezaho kuko imvugo ye ni yo ngiro.

Inyubako zirimo kuzamurwa muri uyu mugi rero ni nyinshi hari izo natwe akarere turimo kuzamura dufatanyije n’abikorera hakaba n’izo abikorera bizamurira ubwabo. Tunashimira abaturage ko bamaze kumenya agaciro ko kwishyira hamwe.

Yavuze ko isoko ryiza rya kijyambere n’inyubako ya Kivu Marina Bay izo nyubako zombi biteganyijwe ko mu kwezi kwa 12 zizaba zuzuye ku buryo umwaka utaha zizaba zatangiye gukorerwamo.

Ati: “Izo nyubako nizuzura rero isura y’umugi izaba isa neza, kandi biteganyijwe ko n’abandi bazahita bavugurura inyubako zabo bakahashyira inyubako zijyanye n’igihe kuko nanone tutazihanganira inyubako zishaje gukomeza gusiga isura mbi Umujyi wa Rusizi.”

Umujyi wa Kamembe uhana imbibi n’ibihugu nka Repubulika Iharanira Demokarasi ya Kongo n’igihugu cy’u Burundi, bikaba amahirwe ku bawuturiye dore ko ukora ku mipaka itanu ihuza ibi bihugu, ikindi ni umugi wiganjemo imirimo y’ubucuruzi ari yo iha amahirwe abawuturiye.