21°C , Intermittent clouds | Kigali-Rwanda
Mubazi ikoreshwa muri Taxi Voiture

RURA irasaba abatwara Taxi Cabs kwirinda imikoreshereze idahwitse ya mubazi

Yanditswe na Sezibera Anselme

Ku ya 13-08-2019 saa 19:39:58

Umuyobozi w’Ishami ry’Ubwikorezi mu Rwego rw’Igihugu rushinzwe imirimo imwe n’imwe ifitiye igihugu akamaro (RURA) Kulamba Anthony, yongeye gusaba abatwara abagenzi bakoresheje imodoka ntoya kongera imbaraga mu gukoresha mubazi (meter) kugira ngo uwo mwuga ukorwe kinyamwuga.

Ibyo byasabwe mu nama nyunguranabitekerezo yahuje RURA n’abahagarariye koperative zishinzwe gutwara abagenzi mu Mujyi wa Kigali bakoresheje izo modoka ntoya mu rwego rwo kurushaho kunoza imikoranire no kureba uburyo ibibazo birimo byakemuka.

Kulamba avuga ko bamwe mu bakora uwo mwuga wo gutwara abagenzi bakoresheje Taxi Cabs badakoresha mubazi babiterwa no kudaha agaciro ikoranabuhanga begerejwe kandi ribafitiye akamaro.

Agira ati: “Iyo twabahaye ikemezo (licence) cyo gutwara taxi,  hari ibyo muba musabwa kubahiriza harimo no gukoresha mubazi. Ibyo abatwara taxi basabwa biba byanditse no muri icyo cyemezo. Abakora amakosa barahanwa ariko si cyo tuba tugamije, icyo twifuza ni uko birinda amakosa ntibahure n’ibihano. Umwuga wanyu ufitiye igihugu akamaro, ni yo mpamvu tugomba gufatanya namwe kugira ngo ukomeze utere imbere. Mu gihe mwirinze aya makosa tubabwira mukora bizaduha umwanya wo gukumira babandi babavangira mu kazi kanyu bagakora mu buryo bunyuranyije n’amategeko.”

Kulamba ashimangira ko ikoranabuhanga rya mubazi rifitiye akamaro kanini abari mu mwuga wo gutwara abagenzi kandi rikanabungura.

Nyiringabo Joseph, umukozi wa RURA ushinzwe igenzura mu by’ingendo n’ubwikorezi, avuga ko 99% mu bakoresha mubazi bishimira inyungu babona, asobanura ko abibwira ko ibahombya ari ubumenyi mukeya.

Ati: “Musabwa kumenya ko igihe cyose mubazi igomba guhora icanye ariko itangira kubara ari uko ubonye akazi utwaye umugenzi, bityo bizabafasha kugira ngo ingendo ntoya mukora zibe arizo zitishyura hanyuma indende zibe arizo zishyurwa. Muri make udakoresha mubazi neza uko bikwiye nta mbabazi ahabwa igihe afashwe”.

Amwe mu mabwiriza RURA igaragaza ahabwa ukoresha mubazi harimo kuba buri kigo cyose kigomba kugira uburyo bw’ibaruramari bukorwa byemewe n’amategeko ku buryo buri kampani yose itwara abagenzi igomba kuba yagaragaje ibisabwa bitarenze tarfiki ya 30 werurwe.

Hari ukuba buri wese ukora taxi asabwa kubahiriza ibiciro byashyizweho na RURA, akagomba kandi kwirinda guteza akajagari ahahagarara abagenzi cyangwa parikingi. Abashoferi basabwa gukoresha mubazi mu buryo bwose bwo kwishyura nta bundi bukoreshejwe kandi bakirinda gucuruza mubazi bahawe ku wundi muntu.

Hanagaragajwe ko utabashije kubahiriza ibisabwa ahanishwa amande y’amafaranga 200.000, ariko RURA ivuga ko mu gihe birinze amakosa ayo mafaranga ari bo agirira akamaro mu kwiteza imbere.

Umukozi wa Yego Cabs ishinzwe gutanga mubazi ku bakora uwo mwuga Uwamahoro Aline, avuga ko hari bamwe muri ba nyirimodoka batagira umuco wo gucana mubazi kuko hari abo usanga bazicana iminsi 2 indi 2 ikurikiyeho bakazizimya.

Agaragaza ko hakigaragara ikibazo cyo kuba hari abafite imodoka bahawe mubazi barangiza bakazigurishanya n’imodoka nyamara atari izabo bataraziguze bityo bagasabwa kubanza kuzisubiza.

Uwamahoro kandi avuga ko hakigaragara na bamwe mu bashoferi babura mubazi bahawe kubera kuzibwa barangiza ntibabimenyeshe Yego Cabs ndetse na nyuma aho baziboneye nabwo ntibabimenyeshe bigatuma biviramo Yego Cabs igihombo kuko ikomeza kuzishyura, akavuga ko mu bafatiwe imodoka na RURA harimo abanze kwishyura.

Uwiringiyimana Silas ukora umwuga wo gutwara abagenzi akoresheje imodoka ntoya, yemera ko ibyo bashinjwe aribyo ariko ariko nawe agaragaza ikibazo baterwa n’imikorere ya Yego Cabs.

Agira ati: “Iyo mfite ikarita yanjye nkoresha kuri mubazi menya ingano y’umwenda mfitiye Yego Cabs, ariko iyo nyirobesheje uwo nyihaye akozaho ikarita ye bigatuma ntamenya umwenda afitiye Yego Cabs kuko ikarita ye ayigumana kandi nkaba ntafite uburenganzira bwo kubibaza Yego Cabs.”

Ku byerekeranye n’izo mbogamizi, uhagarariye Yego Cabs Uwamahoro yemera ko ibyo bibaho hagati y’abatizanyije imodoka imwe ariko igihe cyose ikibazo gisigarana imodoka kuko ari yo iba yarabaruweho  mubazi.

Muri rusange iyo nama nyunguranabitekerezo hagati y’impande zose yanzuye ko abayobozi ba Taxi Cabs bicarana bakanoza imikoranire n’abo bayobora kugira ngo babashe gukurikirana imikorere yabo no kubagira inama.

 

RURA yemereye abatwara tazi kubafasha kunoza umwuga wabo binyuze mu nzira y’amahugurwa

Abatwara abagenzi na bo bifuje ko mu gihe bafatiwe mu ikosa bajya bahabwa akanya ko kwisobanura kuko hari ubwo amakosa atabaturukaho.

Umuyobozi wa Taxi Cabs Munyaneza Savion, yemeye ko bagiye gukoresha mubazi uko bisabwa, guhana amakuru n’izindi nzego hamwe no gukangurira abo bayobora kubishyira mu bikorwa, hakabaho no guhana abatabyubahiriza.

Yego Cabs yiyemeje kunoza ihana ry’amakuru hagati yayo n’abatwara taxi no kureba uko yanoza ibigendanye na interineti iri mu bituma mubazi iteza amwe mu makosa.

Ku ruhande rwa RURA yiyemeje gukaza gukurikirana imikoreshereze ya mubazi no kuyiteza imbere nk’ikoranabuhanga Leta ishyize imbere.

RURA yavuze kandi ko hagomba kubaho guhana yihanukiriye abarangwaho abakoresha nabio mubazi n’abatayikoresha.

RURA kandi yongeye kwibutsa abafanyabikorwa bayo ko amarembo afunguye ku wifuza kuyigisha inama.

Ku bakora taxi badafite ibyangombwa bya RURA, baragirwa inama yo kugana RURA ikabagira inama y’uko bakora mu buryo bukurikije amategeko, uzafatwa adafite ibyo byangombwa azahanwa bikomeye.

TANGA IGITEKEREZO

Leave a Reply

Your email address will not be published. Required fields are marked *