20°C , Mostly cloudy | Kigali-Rwanda
Inzego zitandukanye na bamwe mu bikorera bo mu Karere ka Rulindo bitabiriye inama yabahuje na Guverineri Gatabazi (Foto Kanamugire E)

Rulindo: Abikorera basabwe kuvugurura Umujyi wa Base

Yanditswe na KANAMUGIRE EMMANUEL

Ku ya 08-10-2018 saa 16:56:57

Ubuyobozi bw’Intara y’Amajyaruguru bwasabye abikorera gushora imari mu mishinga ibyara inyungu hagamijwe kuvugurura Umujyi wa Base ugahuzwa n’ikerekezo igihugu kiganamo.

Ni mu biganiro Guverineri w’iyi Ntara, Gatabazi Jean Marie Vianney yagiranye n’abo mu Murenge wa Base, aho bagaragarijwe igishushanyombonera cy’Umujyi wa Base nk’uko kemejwe n’Inama Njyanama y’Akarere.

Mu biteganyijwe gukorwa mu rwego rwo kuvugurura Umujyi wa Base harimo kubaka inzu z’ubucuruzi z’amagorofa, gare, ikimoteri, agakiriro, ibikorwaremezo by’imyidagaduro n’ibindi.

Gatabazi yasabye abikorera gushyira hamwe bagakora imishinga minini ibyara inyungu ijyanye n’uburyo Base irimo kwaguka bitewe n’ibikorwa remezo birimo imihanda ya kaburimbo igiye kuzaba iyikikije.

Yagize ati: “Iyi mihanda ya kaburimbo igiye kunyura hano mukwiye kuyibyaza umusaruro kuko abaturutse ahandi ntibakwiye kuza ngo babubakane parikingi, ikimoteri n’ibindi bikorwa bibyara inyungu ngo babimure kandi namwe muhari mufite igishoro.”

Inzego zitandukanye na bamwe mu bikorera bo mu Karere ka Rulindo bitabiriye inama yabahuje na Guverineri Gatabazi (Foto Kanamugire E)

Umuyobozi w’Urugaga Nyarwanda rw’Abikorera (PSF) mu Karere ka Rulindo, yavuze ko abikorera bazakomeza kubyaza umusaruro ibikorwaremezo aka karere gafite.

Ndoli Ildephonse yagize ati: “Dufite amahirwe y’uko Akarere kacu ka Rulindo kazengurutswe n’imihanda ya kaburimbo turashima ko tugenda tubona ibikorwa remezo, amazi, amashanyarazi, amashuri n’ibindi bifasha abikorera kwihuta mu iterambere. Aya mahirwe abikorera twatangiye kuyabyaza umusaruro hubakwa inganda zirimo izitunganya ibikomoka ku bigori zigera kuri eshatu, Entreprise Urwibutso, Shekina ikora isombe, uruganda rutunganya ibikomoka ku bitoki, urukora amasabune n’izindi.”

Yakomeje agira ati “Turabasaba gukomeza kutuba hafi muri byose kugira ngo iterambere rirusheho kwihuta hashyirwa mu bikorwa igishushanyombonera cy’Umujyi wa Base no kubaka Gare, agakiriro n’ibindi bikorwa bikomeye bihuriweho n’abantu benshi. Turakomeje kugira ngo tugende twiyubakira igihugu cyacu tunatanga imisoro ari na yo idufasha kugera kuri bya bikorwa remezo.”

Guverineri Gatabazi yashimiye abikorera uruhare bagira mu iterambere ry’igihugu binyuze mu misoro batanga, akazi bahanga n’ibindi bikorwa by’iterambere bagiramo uruhare.

Yagize ati: “Nta muntu n’umwe utera inkunga imishahara n’amafaranga ahabwa abaturage bimuwe ku nyungu rusange, byose biva mu misoro, amafaranga duhembwa ni mwe muyatanga. Leta y’u Rwanda iha agaciro gakomeye abikorera kuko bafite uruhare rukomeye mu bukungu no mu iterambere.”

Yabasabye kwirinda kugurizanya amafaranga mu buryo butemewe n’amategeko bibutswa ko bigira ingaruka zo guhombya bamwe ndetse bigakurura n’amakimbirane.

TANGA IGITEKEREZO

Leave a Reply

Your email address will not be published. Required fields are marked *