22°C , Partly cloudy | Kigali-Rwanda
Inyama zatunganyijwe mu ibagiro rya kijyambere ziba zujuje ubuziranenge (Foto archive)

Ruhango:Abikorera biteze inyungu nyinshi ku ibagiro ryatwaye miliyoni 360

Yanditswe na NIYONSENGA SCHADRACK

Ku ya 09-07-2018 saa 08:53:16

Bamwe mu bikorera bo mu karere ka Ruhango baravuga ko biteguye kubyaza umusaruro ibagiro bubakiwe n’akarere, aho ngo kuri ubu bamaze no kubona isoko bagurishaho inyama mu gihugu cya Omani.

Inyama zatunganyijwe mu ibagiro rya kijyambere ziba zujuje ubuziranenge (Foto archive)

Ni ibagiro rimaze imyaka 6 ryubatswe aho ubuyobozi bwemeza ko ryatwaye amafaranga y’u Rwanda angana na miliyoni 360.

Koperative ‘Umuhore Mwiza Ruhango’ ihuriwemo n’abaturage bose bakora akazi ko kubaga kuri ubu ni yo icunga iri bagiro, abanyamuryano b’iyi koperative bahuriza ku gushimira ubuyobozi bwabubakiye iri bagiro ngo kuko ryagabanyije ikibazo cy’umwanda wagaragaraga mu mwuga w’ububazi, ndetse ngo ryanakumiriye ubujura bw’inka bwagaragaraga hirya no hino muri aka karere.

Uwitwa Riberakurora Zacharie yagize ati “Tukibaga mu buryo busanzwe wasangaga ubujura bw’inka bwiyongera hirya no hino kuko abajura bibaga inka bakayibagira aho babonye hose ugasanga ni ikibazo, ikindi byari umwanda kuko urumva ko umuntu yabaga yabagiye mu byatsi isazi nyinshi zituma ku nyama.”

Naho Sibomana Aimable we yagize ati “Ugereranyije iri bagiro no kubagira mu byaro usanga hano mu ibagira harimo inyungu nyinshi uhereye ku bacuruzi ukageza no ku barya inyama.

Umucuruzi yakoreshaga abakozi benshi ugasanga nk’inka imwe ibagwa n’abantu hagati ya 10 na 15 ariko ubu ngubu inka iyo ibazwe n’abantu benshi baba 5 kugeza igeze aho bagurishiriza inyama (Boucherie).”

Nk’uko byemezwa na Nywandwi Bernard, umunyamategeko w’urugaga rw’abikorera bo muri Ruhango, ngo kugeza ubu inyama zibagirwa muri iri bagiro zamaze kubonerwa isoko hanze y’u Rwanda mu gihugu cya Omani.

Ati “Ni amahirwe dushaka kubyaza umusaruro, twatangiye gushaka amasoko ndetse twamaze no kumvikana n’Abarabu bo muri Omani kugira ngo tuzage tubagemurira inyama zingana na toni 400 ku kwezi, tuzajya tubaha inyama z’ihene n’iz’inka.

Ubu twamaze kumvikana igisigaye ni ukuza kugira ngo basure iri bagiro bareba ko inyama tuzajya tubagemurira koko zujuje ubuziranenge.”

Umukozi ushinzwe ubworozi mu karere ka Ruhango, Rugwizangonga Dieudonne, na we ashimangira ko kuva iri bagiro ryakubakwa byazamuye ubuziranenge bw’inyama zijyanwa ku masoko yo muri aka karere, ibintu ngo bituruka ku kuba imirimo myinshi yo kubaga ikorwa n’imashini aho gukorwa n’intoki z’abantu.

Rugwizangoga yagize ati “Mbere inka bazibagiraga hasi noneho ugasanga uko babaga ariko uruhu rw’inka yamaze kwicwa rwanduza inyama cyangwa ibyo mu nda bikazanduza ariko ubu muri iri bagiro iyo bari kubaga inyama yose igira ahantu hayo igomba kujya bigatuma ibyashobora kuzanduza bigabanyuka, bidufasha guha abaturage inyama zifite isuku.”

Abikorera bo muri Ruhango bavuga ko bamaze no gusaba amasoko y’inyama mu gihugu cya Gabon, icyakora basaba akarere ko kakomeza kubafasha kubungabunga isuku y’iri bagiro kugira ngo inyama zabo zikomeze kuba ku isonga mu isuku.

TANGA IGITEKEREZO

Leave a Reply

Be the First to Comment!

avatar