23°C , Mostly cloudy | Kigali-Rwanda
Itorero ry'Urunana rw'urungano ikiciro cya gatatu ryatangijwe(Foto Kanmaugire E)

Ruhango: Urubyiruko rwitabiriye Itorero ryo komora ibikomere by’amateka

Yanditswe na Kanamugire Emmanuel

Ku ya 07-12-2018 saa 14:55:44

Urubyiruko ruturutse hirya no hino mu Rwanda no mu mahanga, rwitabiriye Itorero Urunana rw’Urungano ikiciro cya gatatu.

Iri torero rirabera mu Ishuri ry’Ubumenyi rya Byimana mu Karere ka Ruhango.

Ryitabiriwe n’abagera kuri 536, barimo 447 baturutse mu turere twose tw’Igihugu na 89 baturutse mu mahanga barimo 43 bo muri Kenya, 30 bo muri Uganda, 5 bo mu Bushinwa n’abandi baturutse mu bindi bihugu, aho biteganyijwe ko rizasozwa ku itariki ya 11 Ukuboza 2018.

Abaryitabira ni abari urubyiruko mu gihe cya Jenoside yakorewe Abatutsi, ikaba yarabateye ibikomere.

Bigishwa amateka y’Igihugu, bakabibwamo kugikunda ndetse bagahabwa umwanya wo gukira ibikomere kugira ngo babone uko bakorera Igihugu.

Umuyobozi w’Itorero ry’Igihugu, Bamporiki Edouard, yagize ati: “Twibanda cyane ku bana bari bato ubwo igihugu cyahuraga na Jenoside yakorewe Abatutsi, amateka akaba yarabateye ibikomere. Bamwe babyawe n’abakoze Jenoside, abandi basigwa n’abahitanywe na Jenoside yakorewe Abatutsi. Gukurira rero muri ibyo bikomere, twatekereje ko ari byiza ko hajyaho itorero ribahuza nk’abantu politiki y’uyu munsi iha uburenganzira bumwe haba ku mashuri, imirimo n’imibereho ya buri munsi.”

Bamporiki yakomeje agira ati: “Ku bajyana muri icyo kerekezo batarakira ibikomere twasanze bishobora guteza ikindi kibazo, guha umuntu amashuri, uburenganzira ariko utaramuhaye umwanya wo gukira ibikomere ntibishobora gutanga umusaruro. Iri torero ni umwanya wo gukira ibikomere, kuganira, kumenya amateka yabo n’amahirwe Igihugu kibahaye kugira ngo bamenye ko nubwo bakomeretse ari bo Igihugu gitegerejeho amakiriro.”

Uyu muyobozi yavuze ko umusaruro umaze kuva mu byiciro by’iri torero byamaze gutozwa ugaragarira ku baryitabiriye bakaba barakize ibikomere batari baratekereje ko kubaka igihugu bibareba ariko ngo uyu munsi bari mu mishinga yabo, biga neza, nubwo ibikomere bigeraho bikaba byagaruka mu bitekerezo ariko ntibyabagize imbata.

Itorero ry’Urunana rw’urungano ikiciro cya gatatu ryatangijwe (Foto Kanmaugire E)

Minisitiri w’Urubyiruko, Mbabazi Rosemary, yibukije abitabiriye iri torero ko bafite inshingano yo kurinda igihugu bahereye aho batuye, barwanya ibiyobyabwenge aho batuye; gusigasira ibyagezweho no gutera intambwe kurushaho.

Minisitiri Mbabazi yongeyeho ko Igihugu gifite ikerekezo cyo kugira urubyiruko rufite intego n’ubuzima buzira umuze, ruzira gutwita kw’abangavu, icuruzwa ry’abantu n’ibindi bizitira iterambere.

Ati: “Gutwita imburagihe, ibiyobyabwenge, icuruzwa ry’abantu, ibyo byose ni ibintu bidusubiza inyuma.”

Guverineri w’Intara y’Amajyepfo, CG Gasana Emmanuel, yasabye abitabiriye iri torero guhora bazirikana politiki y’igihugu, politiki ya Ndi Umunyarwanda, indangagaciro zibagira abo bari bo kandi bakumva ko ari bo Rwanda rw’ejo.

TANGA IGITEKEREZO

Leave a Reply

Your email address will not be published. Required fields are marked *