Ruhango: Ubuyobozi bwasobanuye icyadindije  ikiciro cya kabiri cyo kubaka gare

Yanditswe na Tumukunde Georgine

Ku ya 02-12-2019 saa 15:48:28
Hategerejwe abashoramari bashora imari mu kubaka ikiciro cya kabiri cya gare ya Ruhango

Mu gihe bamwe batuye mu Karere ka Ruhango n’abakagendamo bakoresha gare y’aka karere iherereye mu Murenge wa Ruhango bavuga ko babangamirwa no kuba idafite ahantu hasakaye abagenzi bakwikinga izuba n’imvura, Ubuyobozi bw’Akarere buvuga ko ari ikibazo kibuhangayikishije bukaba burimo gukora ibishoboka byose ngo gikemuke.

Mu kiganiro n’Imvaho Nshya, umwe mu baturage ukunze gutegera muri iriya gare witwa Maniraguha Anicet yagize ati: “Ni byiza kuba barubatse iyi gare kuko mbere wasangaga nta hantu heza kandi  hisanzuye  dufite ho gutegera imodoka, gusa iyi bubatse hari byinshi bikiburamo nk’aho kugama imvura n’izuba, umugenzi ntabona n’aho kwicara ategereje imodoka, ubuyobozi bwadufasha iki gikorwa k’iterambere kikuzura.”

Tuyiringire Anisie na we ati: “Iyo hano habaye isengesho  ubona abantu baba ari benshi bagatinda kubona imodoka, kuba batabona aho bikinga imvura mu gihe iguye ni ikibazo, iyo abagenzi ari bake byo biba byoroshye kuko  uhita wicara mu modoka cyane cyane ziriya zihagurukira ku masaha.”

Mugenzi we Nyirimana Elisabeth na we yagize ati: “Iyo habaye isengesho ry’Abagatolika ku cyumweru cya mbere cy’ukwezi usanga hano muri gare huzuye kubona imodoka bigoranye, iyo imvura iguye abantu babura aho bugama, iki ni ikintu gikwiye gutekerezwaho, ubuyobozi bukagira icyo bukora kuko iyi gare yakira abantu benshi.”

Yakomeje avuga ko hafi ya gare hakwiye no kongerwa ishoramari muri serivisi zigamije iterambere ry’ubukerarugendo nyobokamana, bugatuma abahatuye batera imbere n’Akarere kakazamuka.

Ku bijyanye no kuzuza gare igashyirwamo ibyagombwa bikiburamo, Umuyobozi w’Akarere ka Ruhango wungirije ushinzwe ubukungu n’iterambere Rusilibana Jean Marie Vianney, yavuze ko bakomeje kubishyiramo imbaraga binyuze mu gukangurira abashoramari gushora imari mu mushinga wo kuyubaka.

Mu kiganiro n’abanyamakuru,  yasobanuye ko  Gare ya Ruhango ari  umushinga watangijwe n’Akarere kawufatanyijemo na  kompanyi ikurikiranwa na  RIC ( Ruhango Investment Company), hari abashoramari babiri ariko hakaba hagomba kuzamo n’abandi kuko hari imigabane igomba kugurishwa ingana na 55%. Akarere gafitemo imigabane ingana na 35%.

Hari hateganyijwe ko Gare ya Ruhango izubakwa mu bice bibiri, aharangiye ubu abagenzi banakoresha ni ikiciro cya mbere.

Rusilibana yagize ati: “Gare ya Ruhango yari iteganyijwe kubakwa mu byiciro bibiri, kiriya ni ikiciro kimwe cyarangiye, ikiciro cya kabiri twateganyaga ko kigomba kujyamo hamaze gukorwa ibikorwa bibiri; icya mbere kwari ugushishikariza abashoramari bashyashya kujyamo, ibyo byarakozwe; hari abikorera bo mu Karere ka Ruhango ndetse twateye  intambwe tujya no ku bari i Kigali bakomoka mu Ruhango n’abandi bamenyereye kubaka za gare nka RFTC dukorana inama na bo turabibashishikariza.”

Yavuze ko mu nama bamaze gukorana zigera kuri enye abo bose hari ibyo bagiye biyemeza, igisigaye ni uko bagura iriya migabane isigaye ya 55% kugira ngo ikiciro cya kabiri kirimo no kubakamo inzu kibone gutangira.

Avuga ko abanyamigabane bari muri RIC bafite amafaranga agera kuri miriyoni 50 yatangirirwaho.

Ati:  “Turashaka gutangira n’abandi banyamamigabane bazamo kugira ngo na bo imigabane yabo ihabwe agaciro tuge mu kiciro cya kabiri. Biraduhangayikishije nk’akarere katangije iki gikorwa kugira ngo kige ahagaragara gifashe Abanyaruhango n’abandi bahaca bagenda.”

Abashoramari barakangurirwa gushora imari muri uriya mushinga kugira ngo imirimo yo kubaka isubukurwe.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.