26°C , Partly sunny | Kigali-Rwanda

Ruhango: Ubuhinzi-bworozi bwongereye umuvuduko w’iterambere ry’Akarere

Yanditswe na Amani Claude

Ku ya Jul 11, 2018 saa 5:22

Abaturage bo mu Karere ka Ruhango bishimiye umusaruro bakura mu buhinzi n’ubworozi, kubera ubufatanye buri hagati yabo, ubuyobozi bw’inzego z’ibanze n’inzego zishinzwe ubuhinzi n’ubworozi mu Rwanda.

Madamu Mukarugambwa Eulerie, utejwe imbere n’ubuhinzi n’ubworozi akora nk’umunyamwuga. Aha yagaburiraga inka ze

Mu gihe abakora umwuga w’ubuhinzi bavuga imyato ubuyobozi budahwema kwerekeza amaboko ahakenewe imbaraga ngo buri wese yibone mu iterambere, Ubuyobozi bw’Akarere ka Ruhango na bwo burishimira urwego bugezeho mu guharanira iterambere ry’abaturage mu nzego zose u Rwanda rwerekejeho amaboko.

Imwe mu ngamba Akarere kafashe ni uguharanira ko abaturage bakwihaza mu biribwa ariko bakabona serivisi z’uburezi n’ubuvuzi, ndetse bakubakirwa ibikorwa remezo bibafasha mu mibereho yabo ya buri munsi.

Mukarugambwa Eularie umuhinzi-mworozi ukomoka mu Murenge wa Ntongwe, mu Kagari ka Kebero akaba yoroye inka agahinga n’imyumbati, yatangarije Imvaho Nshya ko yatangiye ubuhinzi ahinga mu buryo bwa gakondo afite n’inka yamuhaga umukamo wa litiro imwe ku munsi.

Nubwo yatangiye ahuzagurika, mu mwaka wa 2006 yatangiye ubuhinzi n’ubworozi by’umwuga, abona amahugurwa y’Ikigo k’Igihugu gishinzwe guteza imbere Ubuhinzi n’Ubworozi (RAB) ku  buryo yabaye  umufashamyumvire mu bworozi.

Aho amenyeye guhinga no korora kijyambere akamenya n’ibyo inka ikenera kugira ngo itange umukamo utubutse, yatangiye kugira inka ikamwa litiro 20 ku munsi kandi umusaruro w’imyumbati uriyongera cyane kubera kumenya ubwoko atera, akabona n’ifumbire yo gushyira mu murima.

Mukarugambwa ahamya ko yungutse no kuba atekesha Biyogazi ituruka ku mase, abana be bose barize baraminuza, atanga n’imirimo. Kuri ubu arasaba Abanyarwanda bakiri mu bushomeri kuyoboka ubuhinzi  n’ubworozi by’umwuga kuko bigifite ibanga ritaratahurwa na benshi.

Yagize ati “Nabashije gutanga imirimo ku bantu 15 bakora buri munsi kandi nta kintu na kimwe nshobora gukenera  ngo nkibure kuko ibyo maze kugeraho bimpa amafaranga abinshoboza.”

Uburyo bwo gutubura imbuto y’imyumbati yatanzwe na RAB mu mwaka ushize bwatangiye gutanga umusaruro kuko ingeri z’imyumbati zakwijwe mu baturage, zakwijwe mu bahinzi bato n’abaciriritse.

Igihingwa cy’imyumbati gitunze abaturage benshi bo mu Ruhango

Nanone kandi Ibikorwa by’Ingabo z’Igihugu mu Iterambere ry’Abaturage  (Citizen Outreach Program) byakozwe mu Murenge wa Mwendo, Kinihira na Bweramana byasize abaturage bongereye ubuso buhingwaho imyumbati iteye ku materasi y’indinganire.

Kugeza ubu imyumbati ihinzwe ku buso bugera kuri hegitari 7,747 mu mwaka w’imihigo wa 2017- 2018 hitezwe kugeza kuri hegitari   7937.

Umukozi w’Akarere ushinzwe ibihingwa byoherezwa mu mahanga, HAKIZIMANA Emmanuel, yemeza ko mu Karere ka Ruhango abahinzi bagera ku 12,070 bafite ibiti by’ikawa bisaga 2,800,000 biri ku buso bwa  hegitari 1100.

Kubera gukorera neza ikawa abaturage bayeza ari nyinshi ku buryo hari inganda zirindwi zirimo enye z’amakoperative y’abahinzi b’ikawa naho 3 zikagirwa n’abashoramari.

Abagore mu gikorwa cyo gutoranya kawa ku ruganda rwa Ntenyo CWS, mu Murenge wa Ruhango , mu Karere ka Ruhango

Muri uyu mwaka wa 2018 abaturage bejeje kandi bagurisha ibiro 5,004,713 by’ikawa maze binjiza amafaranga y’u Rwanda arenga miliyari imwe na miliyoni 251 n’ibihumbi 178 (Frw 1,251,178,250) hatabariwemo ayahembwe abakozi n’imisoro itangwa.

Ayo mafaranga yose yinjijwe n’abaturage mu gihe kitarenze amezi atatu n’igice kubera ko uruganda rwa mbere rwatangiye gutunganya umusaruro tariki ya 7 Gashyantare 2018, kandi bakomeje gusarura ikawa yabo muri iki gihembwe.

Ibikorwa remezo bikomeje kubakwa ubutitsa

Uko iminsi ishira, hari impinduka nyinshi zigaragara mu Karere ka Ruhango. Harimo kubakwa Umudugudu w’Ikitegererezo wa Buhoro uzatuzwamo abaturage 32,  ukurikira indi ari yo uwa Kinihira watujwemo abaturage 16, Kabagari ucumbikiye abaturage 12, uwa Karama wakiriye abaturage 24 n’uwa Bweramana watujwemo abaturage 4. Abagenewe gutura muri iyi midugudu bose ni 78.

Amazu yo mu Mudugudu w’icyitegerezo wa Kigabiro

Iyi midudugu y’ikitegererezo yiyongera ku mubare w’abaturage batujwe mu midugudu muri gahunda ya Leta isanzwe yoroshya ikwirakwizwa ry’ibikorwa remezo. Muri uyu mwaka w’ingengo y’imari hubatswe ibyumba by’amashuri 28 n’ubwiherero 36 mu Mirenge igize Akarere ka Ruhango, Igikoni k’Ibitaro bya Ruhango mu murenge wa Kinazi, Poste de Sante ya Vunga mu Murenge wa Mbuye mu rwego rwo kugabanya urugendo abaturage bakora bajya kwivuza, hubatswe Urwibutso rwa Mayunzwe mu Murenge wa Mbuye hanavugururwa Urwibutso rwa Kabagali, n’ibindi byinshi bigaragaza neza isura y’Akarere ka Ruhango.

Urwibutso rwa Jenoside rwa Mayunzwe

Ubuyobozi bw’Akarere bukomeje imishinga yo kubaka amateme arimo irya Kabuga-Douane bahuriraho n’Akarere ka Kamonyi n’irya Rwamakungu ribahuza n’Akarere ka Nyanza.  Undi mushinga ni uwo kubaka inzu y’urubyiruko (Youth Center), gukomeza gukwiza amashanyarazi mu karere ku bufatanye na REG, gucanira imihanda (public lighting) n’iyindi.

Ubu hari gukwirakwizwa amatara yo ku muhanda (public lighting) mu dusanteri  twa Karambi mu Murenge wa Kabagali, Muyunzwe mu Murenge wa Kinihira, Nyakarekare na Kizibere mu Murenge wa Mbuye. Ubuyobozi bw’Akarere burahamya ko bukomeje kwesa imihigo nubwo habayeho ibiza by’imvura  byasenye ibikorwa remezo binyuranye byari bimaze kugerwaho, bikangiza imyaka y’abaturage ndetse bikanatwara ubuzima bwa bamwe.

Imiryango itegamiye kuri Leta n’abandi bafatanyabikorwa b’Akarere barashimirwa cyane  uruhare rukomeye bakomeje kugira mu guhindura imibereho y’abaturage no gushyigikira iterambere ry’Akarere kuko bafite inzego zinyuranye bashyizemo imbaraga.