23°C , Mostly cloudy with thundershowers | Kigali-Rwanda

Ruhango: Mu gukorera hamwe byose birashoboka – Meya Habarurema abwira abafundi

Yanditswe na Twizeyimana Fabrice

Ku ya 11-09-2019 saa 13:57:27
Meya Habarurema aganira n'abafundi bo mu Byimana na Mwendo

Umuyobozi w’Akarere ka Ruhango, Habarurema Valens, yabwiye abafundi ko kwishyira hamwe ari yo nzira izabafasha kwiteza imbere ndetse bakanagira uruhare muri gahunda yo guteza imbere aka karere buri wese abigizemo uruhare.

Ni ubutumwa yagarutseho mu kiganiro yagiranye n’abafundi bo mu mirenge ya Byimana na Mwendo muri aka karere, cyari kigamije kungurana ibitekerezo ku Itegeko ryo ku wa 16/04/2019 rigenga imyubakire n’amabwiriza bigendana.

Ni ikiganiro kandi cyagarutse ku bihano bihabwa uwubatse atubahirije itegeko n’amabwiriza abigenga, amabwiriza agenga ikoreshwa rya rukarakara, kwibumbira hamwe mu makoperative, n’inzu zigenewe abatishoboye batagira aho baba.

Muri iki kiganiro Meya Habarurema yabwiye abafundi ko gukorera hamwe bibafasha gutizanya imbaraga, bigatuma bagirirwa ikizere kurushaho, kandi bikabongerera amahirwe yo kubona akazi.

Bibukijwe kandi ko amabwiriza ateganya ko umufundi wemerewe kubaka rukarakara ari uri muri Koperative.

Bashishikarijwe kandi gukorera hamwe mu makoperative kugira ngo babashe gutizanya imbaraga, binatume bagirirwa ikizere kurushaho, binabongerere amahirwe yo kubona akazi.

Meya Habarurema yabagaragarije ingero za bimwe mu bikorwa bashobora kugeraho babikesha kwishyira hamwe no gukoresha imbaraga zabo bwite. Ati “Ni kuki mutakwishyira hamwe na etage (igorofa) mukayubaka, mu gukorera hamwe byose birashoboka “.

Yanagarutse ku ruhare rw’abaturage mu iterambere, ababwira ko ubu muri aka karere hari gahunda yo kuzamura iterambere n’imibereho myiza y’abaturage Ruhango, kandi ngo si ibintu bizakorwa n’ubuyobozi gusa ahubwo buri wese mu kiciro ke akwiye kubigira ibye, agaharanira ko bigerwaho.

Yakomeje agira ati “Muri iki gihe turashaka ko Ruhango iba nziza kurushaho buri wese abigizemo uruhare.Twaganiriye n’ibyiciro binyuranye, ubu turaganira tureba uruhare mwagira (abafundi) mu kuyigira nziza. Nk’ubu twakwibaza tuti kuki mu Mudugudu haba umukecuru utishoboye utagira ubwiherero abafundi duhari?”.

Nyuma yo gusobanurirwa itegeko rigenga imyubakire, n’ibihano biteganyirijwe abatubahiriza ibisabwa, aba bafundi bashishikarijwe kujya babanza kumenya niba uwo bagiye gukorera afite ibyangombwa bitangwa n’ubuyobozi.

Abafundi bitabiriye iyi nama yabereye mu cyumba k’inama cy’Umurenge wa Byimana bavuze ko iyi nama bayungukiyemo byinshi, kuko bahamya ko uretse kuba bari bazi ko hasohotse amabwiriza yemerera abantu kubakisha rukarakara, batari basobanukiwe neza ibisabwa ngo inyubako izamurwe.

Ku birebana n’uruhare rwabo mu gukemura ibibazo bibangamiye imibereho myiza y’abaturage, aba bafundi bagaragaje ko biteguye kwitaba aho ari ho hose hakenewe imbaraga z’abafundi, nko mu kubaka ubwiherero n’inzu z’abatishoboye, bakazabikorera mu matsinda y’abantu batanu.

Meya Habarurema aganira n’abafundi bo mu Byimana na Mwendo

Umwanditsi:

Twizeyimana Fabrice

One Comment on “Ruhango: Mu gukorera hamwe byose birashoboka – Meya Habarurema abwira abafundi”

  1. muraho nasabaga, akarere ka Ruhango umurenge wa ruhango akagari ka Rwoga umudugudu wa kabambati ko mwaduha umuriro bawuhaye bamwe twebwe baradusiga

Tanga Igitekerezo

Email yanyu ntigaragazwa ku rubuga. Amazina na Email ni ngombwa.