20°C , Partly sunny | Kigali-Rwanda
Umuyobozi w'Akarere ka Ruhango Mbabazi François Xavier

Ruhango ishishikajwe no kubakira iterambere ryayo ku bikorera

Yanditswe na admin

Ku ya 07-11-2017 saa 09:47:10

Akarere ka Ruhango kazwiho kugira amasantere y’ubucuruzi akomeye, ibi ni bimwe mu bigize amateka yayo, kuri ubu Ruhango ishyize imbere ndetse ihanze amaso ubukungu n’iterambere bishingiye ku bikorera.

Umuyobozi w’Akarere ka Ruhango Mbabazi François Xavier, avuga ko Akarere ka Ruhango gafite Santere z’ubucuruzi zikomeye zirimo iya Kinazi kimwe n’iya Gitwe. Ati ”Ni akarere kazwiho amateka y’ubucuruzi bukomeye turimo gushishikariza abikorera b’abashoramari kwitabira gushora imari, hashingiwe ku gishushanyombonera turimo kubaka imihanda izafasha n’ibindi bikorwa by’ubukerarugendo bizagira uruhare mu guhindura imibereho y’abaturage.”

Umuyobozi w’Akarere ka Ruhango Mbabazi François Xavier

Avuga ko mu guteza imbere ubukerarugendo bushingiye ku iyobokamana, ahazwi kwa Yezu Nyirimpuwe hazubakwa ingoro ikomeye. Ati ”Ni igikorwa gifitwe na Kiliziya Gatolika twe turimo gukora ibikorwaremezo birimo imihanda ijyayo, turateganya imihanda ya kaburimbo ifite hafi kilometero 12 iyi izanarushaho guhindura isura ya Ruhango, turimo kunoza inyigo y’ubukerarugendo hagamijwe ko za site zigera kuri 26 tumaze kubona zose zibyazwa umusaruro by’umwihariko ku rutare rwa Kamegeri tuhateganyiriza kuhubaka nka ‘One Stop Center’ ku buryo uhageze wese ahita abona ishusho ya Ruhango n’ibindi byose biyirimo ibi bizagira uruhare mu gukurura abashoramari.”

Umuyobozi w’Akarere avuga ko uretse iterambere rishingiye ku bucuruzi n’ishoramari mu rwego rw’abikorera rizakomeza kwaguka, ati “Dufite uruganda ruri mu za mbere mu karere rutunganya ifu y’imyumbati ikoherezwa no ku masoko yo hanze bikatwinjiriza amadovize, turateganya kongera ubuso bwayo umusaruro wayo ukiyongera, dufite kawa, geraniyumu, umuceri, ibigori n’ibishyimbo,  ibi bihingwa byose dufite ingamba zo kurushaho kongera umusaruro wabyo haba mu bwinshi n’ubwiza hagamijwe ko amafaranga abikomokaho yiyongera.”

Uyu muyobozi mu kurushaho kuvugurura ubuhinzi n’urutoki ngo ntiruzasigara inyuma ati “Dufite gahunda yo kuvugurura urutoki rukava ku nsina zisanzwe rukajya ku nsina zitanga umusaruro, umuntu akagira urutoki n’iyo rwaba ruke ariko rutanga umusaruro ukwiye, aha tuzibanda cyane ku bitoki biribwa.”

Ruhango kimwe n’utundi turere ifite umuhigo wo kugeza amazi ku baturage akava ku rugero rwa 81% akagera ku 100%, amashanyarazi akava kuri 27% akagera kuri 70% muri uyu mwaka wa 2017. Ati ”Turava kure ariko n’aho tujya ni ahandi mu myaka 4,5 ishize  mu mashanyarazi twari kuri 4% ubu turi kuri 27%, amazi hafi 81% umuhigo ni uko amazi agomba kuva kuri metero 200 akagera mu rugo rw’umuturage nkuko intego z’iterambere rirambye zibiteganya aho kugira ngo umuturage bivugwe ko afite amazi meza agomba kuba afite amazi  iwe mu rugo.”

Mu rwego rw’ubuzima umuyobozi w’Akarere ka Ruhango, avuga ko bazarushaho kunoza serivisi zitangwa. Ati ”Dufite ibigo nderabuzima 15 n’ibitaro 2 biri ku rwego rw’Akarere n’Intara, turarushaho kunoza imitangire ya serivisi haba muri ibyo bitaro kimwe no mu mavuriro ngoboka, ibi bigomba kujyana no kugera ku rugero rwa 100% mu bwisungane mu kwivuza.”

Mu burezi avuga ko bazateza imbere amashuri y’ubumenyi ngiro hagamijwe ko benshi mu rubyiruko babona akazi. Ati ”Hejuru y’amashuri asanzwe tuzateza imbere amashuri y’ubumenyi ngiro kuko afasha benshi kubona akazi, n’abize ibindi mu gihe batarabona imirimo ntibyababuza kuyigamo kugira ngo bibafashe kubona akazi byihuse.”

Asaba abanyaruhango gukomeza kugira uruhare mu iterambere ry’akarere kabo buri wese akaryiyumvamo bityo u Rwanda rugakomeza inzira yo kuva mu bihugu bikennye rujya mu bihugu biteye imbere. Ati ”Ibi birasaba ko buri wese abigiramo uruhare, bityo n’aho ubonye ibitagenda ukabivuga kugira ngo bishakirwe ibisubizo hagamijwe ko iterambere ryifuzwa rigerwaho.”

GATETE JEAN BOSCO 

TANGA IGITEKEREZO

Leave a Reply

Your email address will not be published. Required fields are marked *