22°C , Partly sunny | Kigali-Rwanda

Ruhango: Hagaragajwe umuti ku bikibangamiye ireme ry’uburezi

Yanditswe na Uwimana Donatha

Ku ya 09-10-2019 saa 10:52:17
Inzego zitandukanye zasabwe guhangana n'ibibangamira ireme ry'uburezi

Itsinda ryari rimaze iminsi 10 mu gikorwa cy’ubukangurambaga ku ireme ry’uburezi ryagaragaje umuti wa bimwe mu  bibazo byagaragaye ahasuwe bikibangamira ireme ry’uburezi.

Mu nama zatanzwe harimo gushyira imbaraga mu gusura imiryango no kuyishishikariza gukangurira abana kudata no kudasiba ishuri, gushyira imbaraga mu gusura abarimu, gutanga ibitabo n’ingwa bifite ubuziranenge, gusana no kongera intebe mu byumba by’amashuri, kongera umubare w’ibyumba bishya, kwita ku isuku mu mashuri, mu bikoni no ku bwiherero, gutanga ndetse no kongera ibikoresho byigirwaho mu mashuri y’imyuga n’ubumenyingiro, gushyira mu myanya abarimu babura,…

Ibi byavugiwe mu nama yo gusoza ku mugaragaro ubu bukangurambaga yayobowe n’Umuyobozi w’Akarere wungirije ushinzwe imibereho myiza y’abaturage, Mukangenzi Alphonsine, ikaba yitabiriwe n’abagize itsinda rya Minisiteri y’Uburezi n’abafatanyabikorwa bayo riyobowe na Nimpano Désiré, ba nyiri ibigo by’amashuri n’abayobozi b’ibigo by’amashuri abanza n’ayisumbuye yo mu Karere.

Umuyobozi w’itsinda Nimpano yatangiye agaragaza ko hari ibyo gushima ndetse abandi bashobora kwigiraho, hakaba n’ibitameze neza byo gukosorwa.

Mu bishimwa yavuzemo aho abagize itsinda basanze amashuri abyaza umusaruro ubutaka afite, uwo musaruro ugafasha gukemura bimwe mu bibazo by’ishuri.

Hari kandi ahagaragaye ibikoresho bifasha abana, abarezi n’abagana ishuri kwisukura, ndetse n’ahari ibigega by’amazi meza abana banywa (Smart Tanks).

Mu byagawe harimo ahakigaragara isuku nke, inyubako z’amashuri, ubwiherero, ibikoni cyangwa se mu bice byabyo byangiritse ntibisanwe kandi wenda biri mu bushobozi bw’amashuri, ubumenyi butajyanye n’ikigero cyangwa umwaka abana bigamo, gusiba kw’abanyeshuri, umubare muke w’abarimu, ingwa mbi, umutekano utizewe w’ibikoresho cyane cyane iby’ikoranabuhanga, kutagira ibikoresho bihagije cyangwa kutagira na mba, …

Nimpano Désiré yavuze ko ibireba Minisiteri y’Uburezi n’abafatanyabikorwa bayo bagiye kubikorera ubuvuguzi bwihuse kugira ngo bikemuke bityo bye kubangamira ireme ry’uburezi.

Ibireba abarezi, abayobozi b’amashuri, ba nyiri ibigo ndetse n’ubuyobozi bw’inzego z’ibanze na byo yasabye ko bihabwa umwanya wo kubikemura mu buryo bwihuse.

Yasabye ba nyiri ibigo gukora uko bashoboye bakongera ubufatanye mu gushimangira ireme ry’uburezi, dore ko ngo byagaragaye ko ubwitabire bwabo muri ubu bukangurambaga butari bushimishije.

Umuyobozi w’Akarere wungirije ushinzwe imibereho myiza y’abaturage Mukangenzi yashimye iki gikorwa, agaragaza ko hari byinshi cyunganiyemo gahunda idasanzwe y’Akarere yo gukemura ibibazo bibangamiye imibereho myiza y’abaturage yiswe “Ruhango ikeye”.

Yasabye kandi abayobozi b’amashuri, ari abasuwe n’abatarasuwe kwihutira gukosora ibitameze neza bigaragara aho bayobora kandi biri mu bushobozi bwabo.

Ubu bukangurambaga bwasojwe bukaba bwari bufite insanganyamatsiko igira iti “Gushimangira uruhare rw’abafatanyabikorwa mu kuzana impinduka mu burezi, hagamijwe kuzamura ireme ry’imyigire n’imyigishirize”.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.