21°C , Partly cloudy | Kigali-Rwanda
Abaturage baca umusingi ahazubakwa amashuri mu Murenge wa Byimana (Foto Kanamugire E)

Ruhango: Batangiye kubaka ibyumba by’amashuri bishya bigera kuri 30

Yanditswe na Kanamugire Emmanuel

Ku ya 13-08-2019 saa 11:09:39

Ubuyobozi bw’Akarere ka Ruhango bwatangije igikorwa cyo kubaka ibyumba by’amashuri bishya mu mirenge itandukanye igize aka karere aho biteganyijwe ko hazubakwa ibigera kuri 30 hamwe n’ubwiherero 45.

Iki gikorwa cyatangijwe binyuze mu muganda udasanzwe wabaye kuri uyu wa 10 Kanama 2019 wahujwe n’umuganda w’urubyiruko wo kwitegura Umunsi Mpuzamahanga w’Urubyiruko, wabereye ku ishuri ribanza rya Kageyo riherereye mu Kagari ka Ntenyo, Umurenge wa Byimana, ahazubakwa ibyumba bitatu.

Ibyumba by’amashuri byatangiye kubakwa ni ibiteganyijwe mu ngengo y’imari y’umwaka wa 2019/2020, bikaba bigomba kuba byuzuye mu mpera z’ukwezi kwa 12 uyu mwaka kugira ngo abanyeshuri bazatangire kubyigiramo mu ntangiriro za Mutarama 2019 nk’uko Umuyobozi w’Akarere wungirije ushinzwe imibereho myiza y’abaturage, Mukangenzi Alphonsine yabitangaje.

Mukangenzi yavuze ko bizafasha mu kugabanya ubucucike mu mashuri ndetse bikazagira uruhare mu koroshya ingendo ku banyeshuri bajyaga kwiga baturutse kure.

Yagize ati: “Gahunda dufite ni ukubaka ibyumba by’amashuri 30 n’ubwiherero 48, abana bakazatangira mu kwezi kwa Mbere babyigiramo; bizadufasha kugabanya ubucucike mu mashuri no kugabanya ingendo abana bakoraga bajya ku ishuri no kwimakaza umuco w’isuku mu mashuri.”

Umukozi ushinzwe ibijyanye n’imyubakire y’amashuri mu Karere ka Ruhango, Bavugamenshi Diogène, yatangaje ko inyubako z’ibyumba by’amashuri hamwe n’ubwiherero byateganyirijwe ingengo y’imari igera kuri miriyoni 186 z’amafaranga y’u Rwanda.

Aya mafaranga arimo azagurwa ibikoresho by’ubwubatsi birimo amabuye, amatafari n’umucanga kimwe no guhemba abafundi n’abakurikirana imyubakire nk’uko Bavugamenshi yakomeje abisobanura, mu gihe ibindi birimo amabati na sima biteganyijwe ko bizatangwa na Minisiteri y’Uburezi.

Mudahinyuka Sylvain wari intumwa ya Minisiteri y’Uburezi washyize ibuye ry’ifatizo ahubakwa aya mashuri, yabwiye abaturage ko bagiye kubona akazi ndetse bakazabona n’amashuri mashya azagira uruhare mu kugabanya ubucucike bw’abanyeshuri.

Yasabye ababyeyi kurushaho kwita ku burere bw’abana kugira ngo igihugu cy’ahazaza kizabe gifite abaturage bazima bateguriwe kugikorera no kugiteza imbere.

Akarere ka Ruhango kazakoresha ingengo y’imari ingana na miriyari zisaga 16 z’amafaranga y’u Rwanda mu mwaka w’ingengo y’imari wa 2019/2020 arimo azatangwa na Leta, imiryango nterankunga n’azava mu misoro n’amahoro y’akarere.

Abaturage baca umusingi ahazubakwa amashuri mu Murenge wa Byimana (Foto Kanamugire E)

TANGA IGITEKEREZO

Leave a Reply

Your email address will not be published. Required fields are marked *