Ruhango: Basobanukiwe ko indyo yuzuye idasaba ubushobozi buhambaye

Yanditswe na TUMUKUNDE GEORGINE

Ku ya 02-11-2020 saa 11:36:36
Uzamuranga Rachel avugurura akarima k'igikoni

Abaturage bo mu Karere ka Ruhango baratangaza ko basobanukiwe akamaro ko gutegura indyo yuzuye kandi bamenye ko idasaba ubushobozi buhambaye; itegurwa hifashishijwe amafunguro aboneka hafi yabo.

Bamwe mu baganiriye n’Imvaho Nshya bo mu Murenge wa Munini bagaragaje ko ubumenyi bwo gutegura indyo yuzuye babukuye mu gikoni cy’umudugudu n’inama bagenda bahabwa n’Abajyanama b’ubuzima babahora hafi.

Usanga kandi abatari bake baritabiriye kugira akarima k’igikoni basoromaho imboga zibafasha kunoza imirire.

Uzamuranga Rachel utuye mu Mudugudu rwa Rwezamenyo mu Kagari ka Munini mu Murenge wa Ruhango, ubwo yavugururaga akarima k’igikoni, yagize ati: “Duhinga imboga mu karima k’igikoni tugira ngo turye indyo yuzuye, abana barye neza imboga, turwanye imirire mibi. Akarima k’igikoni tuba tugafite buri gihe no ku zuba turavomerera, hari umushinga watwubakiye ikigega cy’amazi.”

Agaruka ku bijyanye n’indyo yuzuye yagize ati: “Guteka indyo yuzuye ni uguteka imboga, ugashyiramo ibikomoka ku nyamaswa nk’indagara, amagi, n’ibinyamafufu, ukarya n’imbuto. Indyo yuzuye nayigiye mu gikoni cy’umudugudu.”

Mukeshimana Elina utuye mu Mudugudu wa Ngurukizi, Akagari ka Nyamagana na we yishimira igikoni cy’umudugudu ajyamo buri wa kane wa nyuma w’ukwezi.

Yagize ati: “Muri iki gihe cya COVID-19, turagenda bagapima abana tukanateka, haza bake bake dukurikije uko gahunda ya Leta imeze yo kwirinda iki cyorezo.”

Mukeshimana Elina asobanura uko indyo yuzuye itegurwa

Avuga ko kurwaza imirire mibi kuri iki gihe bidakwiye kubera gahunda zashyizweho. Ati: “Leta iduha amahugurwa ahagije, ikindi nk’akarima k’igikoni kariho ibirinda indwara, guteraho imboga za dodo biroroshye, nange ubu ndakagira.”

Igikoni cy’umudugudu hari abo cyafashije kuva mu mirire mibi

Abaturage bavuga ko igikoni cy’umudugudu kibafasha gukumira imirire mibi bategura indyo yuzuye ariko n’abayirwaye kibafasha kuyisohokamo.

Munganyuwera Clenia utuye mu Mudugudu wa Rwezamenyo, afite abana bane, atanga ubuhamya avuga ko babiri muri bo b’impanga ubu bafite imyaka 4 bakize imirire mibi (bari mu muhondo) nyuma yo kubaha inyongeramikurire abifashijwemo n’Abanyabuzima (Abajyanama b’ubuzima), banamweretse uko indyo yuzuye itegurwa binyuze mu gikoni cy’umudugudu na gahunda y’agakono k’abana.

Avuga ko ubu yasobanukiwe indyo yuzuye atazongera kurwaza imirire mibi. Mbere yumvaga ko kuba yarayirwaje byatewe no kutagira ubushobozi bwo kwita ku bana b’impanga, ariko amaze gusobanukirwa indyo yuzuye yasanze bidasaba kuba ufite ibya mirenge.

Ati: “Nasanze bisaba ubushake; nk’izo mboga wazihingira, rwose ufite ubushake nta bwo umwana yajya mu mirire mibi.”

Munganyuwera Clenia avuga ko gutegura indyo yuzuye bidasaba ibintu bihambaye

Misago Eneas ni Umuyobozi w’Abajyanama b’ubuzima mu Kagari ka Munini, ashimangira ko gahunda y’igikoni cy’umudugudu itanga umusaruro ufatika mu kurwanya imirire mibi binyuze mu kwigisha abaturage gutegura indyo yuzuye.

Yagize ati: “Leta yashyizeho gahunda y’igikoni cy’umudugudu, mu ngamba natwe dufite ni uko tudasiba umunsi n’umwe w’igikoni cy’umudugudu, tukanapima abana, iyo tubona hari usatira imirire mibi duhita dutangira agakono k’iminsi 12.”

Agaragaza ko mu bihe bishize, muri kariya kagari bari bafite abana bari mu mirire mibi bagera kuri 45 ariko ubu nta n’umwe ufite icyo kibazo. Intego bafite ni uko nta mirire mibi yakongera kuharangwa, gusa ngo bakunze guhura n’imbogamizi z’abahimukira bamwe bakaza bayifite, abo babafasha binyuze mu gakono k’iminsi 12, ukeneye ubundi bwunganizi bwisumbuyeho bakabumuha.

Misago ati: “Ufite ubushobozi buke, Abajyanama b’ubuzima ubu turi 80 mu Kagari ka Munini, turafatanya n’ubuyobozi bukadufasha tukamwubakira akarima k’igikoni, tukamuremera tukamuha itungo.”

Uko abaturage batozwa gutegura indyo yuzuye

Hagenimana Marie Josée ushinzwe imirire ku Kigo Nderabuzima cya Ruhango yavuze ko bigisha abaturage gutegura indyo yuzuye bakoresheje ibiribwa babona hafi yabo.

Yongeyeho ati: “Iyo tugiye kubibigisha dukurikiza ikiciro kuko bose nta bwo baba banganya ubushobozi, tubigisha dukurikije uko tubona umubyeyi, tubigisha baje gukingiza, abatwite baje gupimisha inda, igihe twagiye mu gikoni cy’umudugudu, ahantu hose tubonye ababyeyi turabibigisha.”

Yasobanuye indyo yuzuye anagaragaza ko ibiyigize ari ibyo abaturage babona hafi. Ati: “Indyo yuzuye ni indyo igizwe n’amoko atatu y’ibiryo; harimo ibyubaka umubiri tubonamo ibikomoka ku matungo (amafi, amagi, inyama) n’ibikomoka ku bihingwa duhinga (soya, ibishyimbo), mu birinda indwara harimo imboga ( karoti, dodo, amashu, inyanya…) n’imbuto (avoka, amacunga, inanasi,…), mu bitera imbaraga harimo ibijumba, ibirayi, amateke, imyumbati,… Byose ni ibyo tubona iwacu mu giturage.”

Hagenimana avuga ko banigisha ababyeyi gutegura amafunguro bita ku isuku kuko umwana ashobora kugira imirire mibi bitewe n’isuku nkeya.

Hagenimana Marie Josée ushinzwe imirire ku Kigo Nderabuzima cya Ruhango

Uretse ko ahanini imirire mibi igaragara ku bana, asobanura ko n’abantu bakuru bashobora kuyigira biturutse ku kubura indyo yuzuye cyangwa igaturuka ku bundi burwayi bagize.

Kwigisha abaturage indyo yuzuye bikubiye muri gahunda ngari yo kurwanya imirire mibi

Ntaganda Gervais umukozi w’Akarere ka Ruhango ushinzwe Gahunda Mbonezamikurire y’abana bato, yatangaje ko bakomeje ubukangurambaga kuko abenshi mu bahura n’imirire mibi biterwa n’ imyumvire; usanga hari ibiryo bafite batagaburira abana babo.

Asobanura ko kwigisha abaturage gutegura indyo yuzuye bikubiye muri gahunda ngari yo kurwanya imirire mibi, ishyirwa mu bikorwa na Komite yo kurwanya imirire mibi yashyizweho kuva ku rwego rw’umudugudu kugera ku rwego rw’Akarere (DPM).

Ntaganda ati: “Ni gahunda ngari duhurizamo inzego zitandukanye, yaba abashinzwe iby’ubuhinzi n’ubworozi, abashinzwe ibigendanye n’ubuzima, uburezi, abo bose bahurira hamwe kugira ngo bite kuri ba bana bafite ikibazo k’imirire mibi, turahura tukigira hamwe ingamba twifashishije ibitaro n’ibigo nderabuzima, bakadufasha gushyira mu bikorwa gahunda yo kwita ku bana no kureba abafite imirire mibi bagahabwa ubufasha.”

Avuga ko kugeza ubu abana bafite imirire mibi mu karere ari 69. Baritabwaho bahabwa amata, hakifashishwa n’igikoni cy’umudugudu, ababyeyi bakanakangurirwa kugira akarima k’igikoni.

Ntaganda Gervais umukozi w’Akarere ka Ruhango ushinzwe Gahunda Mbonezamikurire y’abana bato

Yongeyeho ati: “Amahirwe yandi dufite mu Karere kacu; twabonye umushinga SPRP ushinzwe kurwanya igwingira n’imirire mibi mu bana batoya, hari amafaranga uduha buri mwaka, mu bikorwa utera inkunga harimo kugurira abana igikoma, mu ngengo y’imari y’umwaka ushize baduhaye amafaranga yo kugura ibiti by’imbuto ziribwa, buri muryango ugomba kugira nibura ibiti bitatu, turagenda tubiha abaturage. Twatanze n’imirama y’imboga yo gutera mu turima tw’igikoni ku miryango yo mu kiciro cya mbere n’icya kabiri by’ubudehe ifite abana bari munsi y’imyaka 2.”

Ibi bikorwa binakubiye muri gahunda ngari ya Ruhango Ikeye yo kurwanya ibibazo bibangamiye imibereho myiza y’abaturage.

Muri gahunda y’igikoni cy’umudugudu habaho gahunda yo gupima abana, abagore batwite n’ ababyaye harebwa uko bahagaze mu mirire

Mutwewingabo Valerien ni Umujyanama w’ubuzima, iwe hakorerwa igikoni cy’umudugudu akanasangiza ababyeyi ubumenyi bwo korora amatungo magufi

Misago Eneas ni Umuyobozi w’Abajyanama b’ubuzima mu Kagari ka Munini

Bamwe mu baturage babonye amashyiga abafasha kunoza gahunda z’igikoni cy’umudugudu

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.