29°C , Partly sunny | Kigali-Rwanda

Ruhango: Abayobozi b’Akarere barakemurira ibibazo by’abaturage kuri terefoni

Yanditswe na TUMUKUNDE GEORGINE

Ku ya 14-09-2020 saa 15:11:54
Hashyizweho ubundi buryo bwo gukemura ibibazo by'abaturage mu gihe Inteko z'abaturage zitagiterana

Ubuyobozi bw’Akarere ka Ruhango buratangaza ko muri iki gihe Inteko z’abaturage zitagiterana kubera kwirinda ikwirakira ry’icyorezo cya COVID-19 bwashyizeho uburyo bushya bwo gukemurira abaturage ibibazo.

Mu itangazo bwashyize ahagaragara, busobanura ko buri wa kabiri kuva saa mbiri kugeza saa sita abayobozi b’Akarere bazajya bakira bakanakemura ibibazo by’abaturage ku murongo wa terefoni utishyurwa 4052, nyuma ya saa sita bazajya basanga abafite ibibazo ku biro by’imirenge yabo.

Iki gikorwa kizatangira ejo tariki 15 Nzeri 2020, ku ikubitiro kizabera ku biro by’imirenge ya Kinazi, Mbuye na Kinihira. Ubu buyobozi buvuga ko gahunda ya buri cyumweru izajya itangwa kare kugira ngo abafite ibibazo bayimenye.

Mbere y’uko icyorezo cya COVID-19 kigera mu Rwanda, mu Nteko z’abaturage zateranaga kabiri mu cyumweru, abaturage bahuriraga mu tugari twabo n’abayobozi bakamanuka bakabegera, bagafatanya gukemura ibibazo, bakungurana ibitekerezo ku iterambere n’imibereho myiza, bakanaganira kuri gahunda za Leta.

Urwego rw’Igihugu rushinzwe Imiyoborere (RGB) ruvuga ko Inteko z’Abaturage zashyizweho kugira ngo zifashe abaturage gukemura ibibazo neza kandi mu gihe gito, bikabarinda gusiragira kandi zishimangira umuco wo gukorera mu mucyo, bikagabanya ruswa n’akarengane kuko ibibazo bikemurirwa mu ruhame.

Ruvuga kandi ko zifite inkomoko mu muco nyarwanda aho abagize umuryango mugari bahuraga bakajya inama bagakemura n’ibibazo byagaragaye bayobowe n’umukuru w’umuryango, nyuma y’umuryango ibibazo byananiranye byoherezwaga ku mutware naho byananirana bikajya ku mwami.

Gusa muri iki gihe cyo kwirinda ikwirakwira rya Covid-19, serivisi nyinshi ziratangwa hifashishijwe ikoranabuhanga, izindi zigatangwa hirindwa ko abantu benshi bahurira hamwe.

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.