19°C , Mostly cloudy | Kigali-Rwanda

Ruhango: Abahinzi mu nzira zo kwegerezwa ifumbire

Yanditswe na Kayitare Jean Paul

Ku ya 16-06-2019 saa 09:54:35
Akarere ka Ruhango kiyemeje kwegereza abahinzi ifumbire y'imborera

Ubuyobozi bw’Akarere ka Ruhango mu Ntara y’Amajyepfo, buratangaza ko bufasha abahinzi kubona ifumbire mu rwego rwo kwirinda ko abahinzi bangiza ibidukikije.

Mu karere ka Ruhango hagaragara ibikorwa by’ubuhinzi bituma abahinzi batabona umusaruro ushimishije. Ku rundi ruhande, hari abahinzi batarumva gahunda zo guhuza ubutaka, ibyo bigatuma badahingira rimwe ndetse bikajyana no kuteza neza ibyo bahinze.

Mukandamage Séraphine, umuhinzi w’igihingwa k’ibigori mu gishanga cya Nkondogoro giherereye mu kagari ka Ntenyo mu murenge wa Byimana aho bahuje ubutaka bahingaho ibigori, avuga ko abatishyize hamwe bigorana guhinga kinyamwuga, ibyo bigatuma babona umusaruro udashimishije, hakiyongeraho n’ikibazo cyo kutabona ifumbire.

Yagize ati “Kudahuza ubutaka bituma tudahinga kinyamwuga, ibyo bikanatuma tutabona umusaruro mwiza nkuko byakagombye kuba biri. Ikindi kibazo dufite tubona ko gikwiye gukemuka, ni uko hari abahinzi batema amashyamba adakuze kugira ngo babone ibiti byo gushingirira ibishyimbo ndetse bagashaka n’ifumbire mu nzira zitarizo, ibyo bikagira ingaruka ku mihindagurikire y’ikirere”.

Musabimana Consolée uhinga mu gishanga cya Nyagafunzo, avuga ko gukorera mu mashyirahamwe byatumye umubano we n’abandi usugira kandi bikaba byaranoroheje kuzamura imyumvire y’abahinzi benshi ku ruhare rwabo mu kurengera ibidukikije no kugira umusaruro mwiza.

Ati “Ibintu byo gukorera hamwe byatumye nk’abahinzi dushobora gusabana ndetse n’umubano wacu uriyongera. Ikindi nakongeraho, ni uko twese twamaze guhuza imyumvire ku ngingo yo kurengera ibidukikije mu buhinzi bwacu ariko tukaba tugifite ikibazo k’ifumbire.”

Umuyobozi w’akarere ka Ruhango wungirije ushinzwe iterambere ry’ubukungu, Rusiribana Jean Marie Vianney, avuga ko nk’akarere kiyemeje gufasha abahinzi mu rwego rwo kubegereza ifumbire y’imborera ndetse no kugabirana.

Ati “Nk’akarere icyo dushyize imbere ni ugufasha abahinzi bacu harimo no kubegera ibyo bikajyana no kubagezaho ifumbire y’imborera kugira ngo badakomeza kwangiza ibidukikije. Hari kandi no kubageza ku rwego rwo kugera ahantu bagira ubushobozi bwo kwibonera ifumbire, guha amatungo abatayafite, kugira ubushobozi bwo kurwanya ibiza hacukurwa imirwanyasuri ndetse no gutunganya ibishanga.”

Akarere ka Ruhango kiyemeje kwegereza abahinzi ifumbire y’imborera

Tanga Igitekerezo

Email yanyu ntigaragazwa ku rubuga. Amazina na Email ni ngombwa.